ໃນລະດູໜາວຫຼາຍຄົນມັກຈະມີບັນຫາເລື່ອງຜິວເປັນຕົ້ນແມ່ນຜິວໜ້າ, ຜິວກາຍ ແລະ ປາກ, ເນື່ອງຈາກຮີມສົບເປັນສ່ວນໜຶ່ງທີ່ສໍາຄັນຂອງຮ່າງກາຍ ແລະ ເປັນຈຸດທີ່ອ່ອນໂຍນກວ່າຜິວຈຸດອື່ນໃນໜ້າ ຍິ່ງລະດູໜາວກໍຈະແຕກແຫ້ງໄດ້ງ່າຍ ດັ່ງນັ້ນເຮົາຄວນໃສ່ໃຈເປັນພິເສດ.
ປາກແຫ້ງແຕກໃນລະດູໜາວເກີດຈາກຫຼາຍສາເຫດ ຄື:
– ຢູໃນສະພາບອາກາດໜາວເຢັນ ຫຼື ແຫ້ງ ເຊັ່ນ: ໃນຫ້ອງທີ່ມີເຄື່ອງປັບອາກາດ ຫຼື ສໍາຜັດກັບແສງແດດຫຼາຍເກີນໄປ.
– ການເລຍຮີມສົບ: ບາງຄົນເລຍຮີມສົບຂອງຕົນເອງຈົນເປັນນິດໄສ ຈະເຮັດໃຫ້ປາກແຫ້ງກວ່າເກົ່າ ເພາະນໍ້າລາຍຈະດຶງເອົາຄວາມຊຸ່ມຈາກຮີມສົບ ແລະ ເຮັດໃຫ້ປາກແຫ້ງ.
– ການດື່ມນໍ້າໜ້ອຍເປັນສາເຫດໜຶ່ງທີ່ເຮັດໃຫ້ເກີດພາວະຂາດນໍ້າ ປົກກະຕິຮ່າງກາຍຕ້ອງການນໍ້າຢ່າງພຽງພໍ ເພື່ອຮັກສາຄວາມຊຸ່ມຊື່ນຂອງຮ່າງກາຍ, ການດື່ມນໍ້າບໍ່ພຽງພໍນອກຈາກຈະເຮັດໃຫ້ຮ່າງກາຍຂາດນໍ້າແລ້ວ ຍັງເຮັດໃຫ້ປາກແຫ້ງ, ວິນຫົວ ແລະ ເຮັດໃຫ້ທ້ອງຜູກໄດ້.
– ເກີດຈາກພະຍາດຜິວໜັງເຊັ່ນ: ເປັນພະຍາດຜິວໜັງອັກເສບ, ພະຍາດແພ້ພູມຕົນເອງຈົນເຮັດໃຫ້ປາກແຫ້ງໄດ້.
▶ວິທີຮັກສາປາກແຫ້ງແຕກໃນລະດູໜາວມີດັ່ງນີ້:
– ສໍາຜັດກັບແສງແດດ ຫຼື ລົມໜາວໃຫ້ໜ້ອຍລົງ ຖ້າບໍ່ຈໍາເປັນ
– ບໍ່ຄວນເລຍຮີມສົບ, ກັດປາກ, ລອກປາກ ເພາະຈະເຮັດໃຫ້ສູນເສຍຄວາມຊຸ່ມຊື່ນ ແລະ ເຮັດໃຫ້ຮີມສົບລອກ ແລະ ແຫ້ງກວ່າເກົ່າ.
– ຫຼີກລ່ຽງຜະລິດຕະພັນ ຫຼື ສິ່ງທີ່ເຮັດໃຫ້ເກີດການລະຄາຍເຄືອງ ເຊັ່ນ: ຜະລິດຕະພັນດູແລຜິວທີ່ມີສານລະຄາຍເຄືອງ ຫຼື ນໍ້າຫອມ.
– ຄວນດື່ມນໍ້າໃຫ້ຫຼາຍໆ ເພື່ອປ້ອງກັນຮ່າງກາຍຂາດນໍ້າ, ຮັກສາຄວາມຊຸ່ມຂອງຜິວ ແລະ ຮີມສົບ ໂດຍການດື່ມນໍ້າໃຫ້ພຽງພໍມື້ລະ
8 – 10 ຈອກ ຢ່າງສະໝໍ່າສະເໝີ.
– ໃຊ້ຜະລິດຕະພັນທີ່ໃຫ້ ຄວາມຊຸ່ມເປັນປະຈໍາ ເພື່ອປ້ອງກັນແສງແດດ ແລະ ປ້ອງກັນອາກາດໜາວເຢັນ.
ຂໍ້ມູນຈາກ: Eucerin
