ລັດຖະມົນຕີກະຊວງ ອຄ ເຂົ້າຮ່ວມພິທີເປີດງານວາງສະແດງນໍາເຂົ້າສາກົນ ສປ ຈີນ ຄັ້ງທີ 4 ໂດຍມີ 3 ບໍລິສັດຈາກສປປລາວ ເຂົ້າຮ່ວມງານວາງສະແດງດັ່ງກ່າວ

229

ງານວາງສະແດງນໍາເຂົ້າສາກົນ ສປ ຈີນ ຄັ້ງທີ 4 ປີ 2021 ໄດ້ຈັດຂຶ້ນທີ່ນະຄອນຊຽງໄຮ ໂດຍມີຫົວໜ່ວຍທຸລະກິດທີ່ມີທ່າແຮງຈາກ ສປປ ລາວ ເຂົ້າຮ່ວມ 3 ບໍລິສັດ.


ໃນຕອນຄ່ຳຂອງວັນທີ 4 ພະຈິກ 2021 ຜ່ານມາ ທີ່ກະຊວງອຸດສາຫະກຳ ແລະ ການຄ້າ (ອຄ), ທ່ານ ຄຳແພງ ໄຊສົມແພງ ລັດຖະມົນຕີກະຊວງ ອຄ ພ້ອມດ້ວຍຄະນະ ແລະ ທ່ານ Zhao WENYU ທູດເສດຖະກິດ-ການຄ້າ ສປ ຈີນ ປະຈຳ ສປປ ລາວ ໄດ້ເຂົ້າຮ່ວມພິທີເປີດງານວາງສະແດງນໍາເຂົ້າສາກົນ ສປ ຈີນ ຄັ້ງທີ 4 ປີ 2021 (The 4 China International Import Expo 2021) ແບບອອນລາຍ ເຊິ່ງງານດັ່ງກ່າວຈະຈັດຂຶ້ນໃນລະຫວ່າງ ວັນທີ 5-11 ພະຈິກນີ້ ທີ່ນະຄອນຊຽງໄຮ.


ງານວາງສະແດງນໍາເຂົ້າສາກົນ ສປ ຈີນປີນີ້ ໄດ້ມີການເຂົ້າຮ່ວມຂອງພາກທຸລະກິດໃນ ສປປ ລາວ ມີຫ້ອງວາງສະແດງມາດຕະຖານ ຂະໜາດ 3×3 ແມັດ, ຈໍານວນ 2 ຫ້ອງວາງສະແດງໂດຍບໍ່ໄດ້ເສຍຄ່າ ເພື່ອໂຄສະນາສິນຄ້າທ່າແຮງຂອງລາວ ມີ 02 ບໍລິສັດເຂົ້າຮ່ວມຄື: 1. ບໍລິສັດ Meely Decore Sole Co.,Ldt ແລະ 2. ບໍລິສັດ LAO GUOTONG Livestock Farming Development Co., Ldt. ນອກຈາກນີ້, ຍັງມີຫົວໜ່ວຍທຸລະກິດຈ່າຍຄ່າຫ້ອງວາງສະແດງເອງ ໂດຍຍຜ່ານກົມສົ່ງເສີມການຄ້າ ໄດ້ຮັບສ່ວນຫຼຸດ 10% ເຂົ້າຮ່ວມມີ 1 ບໍລິສັດຄື ບໍລິສັດ Lao Three Six Manor Trade Export-Import Sole Co.,Ldt.


ພ້ອມດຽວກັນ, ຍັງມີຫ້ອງວາງສະແດງແຫ່ງຊາວລາວ ເຊິ່ງການເຂົ້າຮ່ວມຂອງຫ້ອງວາງສະແດງແຫ່ງຊາດລາວ ແມ່ນເຂົ້າຮ່ວມແບບອອນລາຍ ແລະ ສໍາເລັດການອັບເນື້ອໃນ, ຮູບພາບ ແລະ ວີດີໂອ ລົງໃນຫ້ອງວາງສະແດງແຫ່ງຊາດ ດີຈີຕອນ ໂດຍມີເນື້ອໃນຫຍໍ້ຄື: ເນັ້ນໃສ່ເນື້ອໃນກວມເອົາທາງດ້ານການຄ້າ, ການລົງທຶນ, ວັດທະນະທຳ, ທ່ອງທ່ຽວ ແລະ ໂຄສະນາຜະລິດຕະພັນສິນຄ້າທ່າແຮງທີ່ມີເງື່ອນໄຂສາມາດສົ່ງອອກໄປຕະຫຼາດ ສປ ຈີນ ແລະ ຕະຫຼາດສາກົນເຊັ່ນ: ເຂົ້າ, ຊາ, ກາເຟ, ນໍ້າຕານ, ໝາກໄມ້, ສັດ (ງົວ) ແລະ ເຟີນີເຈີ./ ເຊິ່ງຈັດເປັນສອງເຂດ ເພື່ອວາງສະແດງຮູບພາບພ້ອມຂຽນຂໍ້ຄວາມອະທິບາຍ ແລະ ວີດີໂອ ການໂຄສະນາປະເທດລາວ, ຜະລິດຕະພັນສິນຄ້າລາວ ຢູ່ໃນຫ້ອງວາງສະແດງແຫ່ງຊາດ ຫໍວາງສະແດງດີຈີຕອນ.

["]


ການຈັດງານສໍາລັບປີ 2020 ແລະ 2021 ນີ້ ເນື່ອງຈາກມີການແຜ່ລະບາດຂອງເຊື້ອພະຍາດ ໂຄວິດ 19. ດັ່ງນັ້ນ, ຝ່າຍ ສປ ຈີນ ຈຶ່ງເຊື້ອເຊີນຝ່າຍ ສປປ ລາວ ເຂົ້າຮ່ວມງານແບບອອນລາຍ ໂດຍນໍາໃຊ້ເວບໄຊທາງການຂອງງານ ເພື່ອແນະນໍາສະພາບການຄ້າ, ການລົງທຶນ ແລະ ຂົງເຂດອື່ນໆຂອງປະເທດລາວ ຊຶ່ງໄດ້ສ້າງຫ້ອງວາງສະແດງແຫ່ງຊາດດີຈີຕອນດ້ວຍເຕັກນິກ 3D ເພື່ອບັນລະຍາຍຮູບພາບ, ວິດິໂອ ແລະ ຂໍ້ມູນອື່ນໆເປັນການສະແດງຜົນງານການພັດທະນາຂະແໜງການທີ່ມີທ່າແຮງດ້ານການຄ້າ, ວັດທະນະທຳ, ທ່ອງທ່ຽວ ແລະ ບັນດາຫົວໜ່ວຍທຸລະກິດລາວທີ່ພົ້ນເດັ່ນ, ຝ່າຍ ສປ ຈີນ ໄດ້ສືບຕໍ່ໃຫ້ການຊ່ວຍເຫຼືອຫ້ອງວາງສະແດງມາດຕະຖານ ຂະໜາດ 3×3 ແມັດ, ຈຳນວນ 2 ຫ້ອງວາງສະແດງໂດຍບໍ່ໄດ້ເສຍຄ່າ.