ງາມຈັບຈິດຈັບໃຈ! ງາມແບບທໍາມະຊາດເສກສັນປັ້ນແຕ່ງແທ້ໆ ງາມຕາມແບບສະບັບສາວຫຼວງພະບາງ ຂ່າວບັນເທີງພາຊົມຄວາມງາມຂອງ ນາງສັງຂານນະຄອນຫຼວງພະບາງ ປະຈຳປີ ຈຸລະສັກກະຣາຊ (ຈສ) 1386 (ພສ 2567) ເທບທິດາອົງສຸດທ້ອງ ຫຼື ນາງສັງຂານຄົນທີ 7 ເຊິ່ງມີພະນາມວ່າ ” ມະໂຫທອນເທວີ “ເຊິ່ງເປັນລູກສາວຫຼ້າຂອງພຣະຍາກະບິນລະພົມ ສະເດັດມາເທິງຫຼັງຂອງພະຍາມະຍຸຣາປັກສາ (ນົກຍູງຄຳ) ພະຫັດຊ້າຍຖືກົງຈັກ ແລະ ພະຫັດຂວາຖືຕຣີສູນ ຫຼື ຫອກສາມຫງ່າມ ແລະ ຜູ້ທີ່ໄດ້ຮັບຕໍາແໜ່ງອັນຊົງກຽດນີ້ຂອງຄື ນ້ອງ ອາລິຍາ ອິນທະສອນ ນາງສັງຂານນະຄອນຫຼວງພະບາງ ພສ 2567 ຄສ 2024 ນັ້ນເອງ.
ພາຍຫຼັງທີ່ນ້ອງໄດ້ຮັບຕໍາແໜ່ງກໍເຮັດໜ້າທີ່ຂອງຕົນເອງຢ່າງເຕັມທີ່ ແລະ ສະຫງ່າງາມ ແລະ ນ້ອງຍັງໄດ້ມີການໂພສບັນຍາຍຄວາມຮູ້ສຶກຂອງຕົນເອງຜ່ານເຟສບຸ໊ກສ່ວນຕົວວ່າ: “ຂ້າພະເຈົ້າ ນາງ ອາລິຍາ ອິນທະສອນ ນາງສັງຂານນະຄອນຫຼວງພະບາງ ພສ 2567 ຄສ 2024 ນ້ອງຮູ້ສຶກເປັນກຽດ ແລະ ພູມໃຈທີ່ສຸດ ທີ່ໄດ້ຮັບຕໍາແໜ່ງນາງສັງຂານປະຈໍາປີນີ້ ປຽບເໝືອນໃບເບີກທາງທີ່ດີທີ່ສຸດໃນຊີວິດຄັ້ງ 1 ນ້ອງມາຮອດຈຸດນີ້ໄດ້ ຍ້ອນຄໍາວ່າ:”ກໍາລັງໃຈ” ກໍາລັງໃຈຈາກພໍ່ແມ່, ໝູ່ເພື່ອນ ແລະ ຄົນອ້ອມຂ້າງ ພ້ອມທັງຄໍາຕິຊົມທີ່ມາຈາກ ຄວາມຫວັງດີ ເປັນຈຸດທີ່ເຮັດໃຫ້ນ້ອງພັດທະນາປັບປຸງຕົນເອງຈົນໄດ້ຮັບຕໍາແໜ່ງນີ້ ຂໍສະແດງຄວາມຂອບໃຈມາຍັງການນໍາພັກ – ລັດ, ພໍ່ແມ່, ຄູຝຶກຊ້ອມ, ໝູ່ເພື່ອນ, ປະຊາຊົນຊາວຫຼວງພະບາງ ແລະ ສະປອນເຊີທຸກພາກສ່ວນ ພ້ອມທັງຄະນະກໍາມະການຜູ້ຊົງຄຸນວຸດທິທຸກທ່ານ ຂອບໃຈຜູ້ຢູ່ເບື້ອງຫຼັງຄວາມງາມທຸກໆຄົນ.
ທັງໝົດນີ້ ຄືຜູ້ສະໜັບສະໜູນທີ່ມາສ້າງຄວາມຊົງຈໍາດີໆໃຫ້ກັບຊີວິດນ້ອງ ແລະ ນ້ອງຈະຈົດຈໍາໄປຕະຫຼອດການ. ໃນປີໃໝ່ນີ້ຂໍອວຍພອນໄຊໃຫ້ທຸກທ່ານທີ່ຢູ່ກັບຊ່ວງເວລາທີ່ດີຂອງນ້ອງ ຈົ່ງມີສຸຂະພາບແຂງແຮງ ປະສົບຜົນສໍາເລັດໃນໜ້າທີ່ວຽກງານທຸກປະການ ອາລິຍາ ອິນທະສອນ ນາງສັງຂານນະຄອນຫຼວງພະບາງ 2567/2024 ຂໍຂອບໃຈ”.
ນີ້ກໍຄືຄໍາເວົ້າທີ່ກັ່ນກອງອອກຈາກໃຈຂອງນ້ອງ ແລະ ປີນີ້ກໍສຸດພິເສດ ເປັນບຸນຕາຂອງລູກຫຼານລຸ້ນສືບທອດແທ້ໆ ທີ່ໄດ້ເຫັນເອກະລັກຂອງຊາວຫຼວງພະບາງ ທີ່ມີມາແຕ່ບູຮານ ຮ່ວມສ້າງຕໍານານ ແລະ ສືບສານວັດທະນະທໍາເຊິ່ງຜູ້ແຕ່ງເຄື່ອງຫຼາຍໆທ່ານ ລັກສະນະເດັ່ນສະເພາະແມ່ນນຸ່ງສີ້ນລວດລາຍດຽວກັນທີ່ພະມະເຫສີແຫ່ງປະເທດລ້ານຊ້າງສວມໃສ່ໃນສະໄໝກ່ອນ ເຮັດຕາມຮີດຄອງບູຮານເມືອງຫລວງແທ້ໆ ຄືໃຫ້ນາງສັງຂານນຸ່ງຕາມສີປະຈຳວັນ ທີ່ເປັນສີມຸງຄຸນ ຄື ນາງສັງຂານລ່ວງຖືກວັນເສົາ ສີປະຈຳວັນເສົາຄືສີມ່ວງ ນາງສັງຂານກໍມາໃນຊຸດສີມ່ວງ.
ຊຸດດອກດວງກໍມາໃນຊຸດດອກຜັກຕົບ ທີ່ເປັນດອກປະຈຳກາຍນາງມະໂຫທອນເທວີ ເຊິ່ງທັງໝົດນີ້ ຖືກວາງໃນຕໍາລາລາວບູຮານຢ່າງລະອຽດ ປີນີ້ຜູ້ທີ່ມີຄວາມຮູ້ຄວາມຊໍານານສະເພາະດ້ານ ຊ່ວຍກັນສ້າງຊູເອກະລັກບໍ່ໃຫ້ຈາງຫາຍໄປ ພ້ອມຢູ່ຄູ່ແຜ່ນດິນເປັນປະຫວັດສາດຕະຫຼອດໄປ.
ອາລິຍາ ນາງສັງຂານຄົນຫຼ້າສຸດຂອງແຂວງຫຼວງພະບາງ ມີອາຍຸ 17 ປີ, ສ່ວນສູງ 160 ຊັງຕີແມັດ, ນໍ້າໜັກ 50 ກິໂລ ມາຈາກໂຮງຮຽນ ມສ ສັນຕິພາບ ໄດ້ຮັບນາມເປັນ ມະໂຫທອນ ລູກສາວ ຄົນທີ່ 7 ຂອງພະຍາກະບິນລະພົມ ຂຶ້ນຂີ່ນົກຍູງ ເປັນພາຫະນະ ພ້ອມແຫ່ກັບລູກສາວ ອີກ 6 ຄົນ ເພື່ອນໍາເອົາກະສຽນຂອງພໍ່ ໄປຫົດສົງ ຕາມປະເພນີ ໃນໄລຍະບຸນປີໃໝ່ລາວ.
ຂ່າວບັນເທີງເອງຝາກແຟນຂ່າວທຸກຄົນຕິດຕາມຜົນງານ ແລະ ການເຄື່ອນໄຫວຂອງນ້ອງແນ່ເດີ້ ເຊື່ອວ່າທັງຮູບຮ່າງໜ້າຕາກິລິຍາມາລະຍາດ ຈະພາໃຫ້ນ້ອງກ້າວໄກໃນວົງການບັນເທີງລາວແນ່ນອນ ສາມາດຕິດຕາມນ້ອງໄດ້ທີ່ Judy Inthasone.
