ຈຳນວນຜູ້ເສຍຊີວິດຈາກເຊື້ອໄວຣັສໂຄໂຣນາສາຍພັນໃໝ່ ຫຼື ໄວຣັສອູ່ຮັນ ເພີ່ມຂຶ້ນຢ່າງໜ້ອຍ 213 ຄົນ ໃນປະເທດຈີນ ແລະ ຜູ້ປ່ວຍສະສົມ ເກືອບ 10 ພັນ ຄົນ.
ສຳນັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນສຸກ ທີ 31 ມັງກອນ ວ່າ ຄະນະກຳມາທິການສາທາລະນະສຸກແຫ່ງຊາດຈີນ ໄດ້ຖະແຫຼງການ ເມື່ອວັນສຸກ ກ່ຽວກັບສະພາບການຂອງໄວຣັສໂຄໂຣນາສາຍພັນໃໝ່ ທີ່ເລິ່ມແຜ່ລະບາດຢູ່ເມືອງອູ່ຮັນ ເມືອງໃຫຍ່ຂອງມົນທົນຫູເປີ່ຍ ພາກກາງຂອງປະເທດຈີນ ວ່າ ສະຖິຕິຕັ້ງແຕ່ເດືອນທັນວາ ປີຜ່ານມາ ເຖິງວັນທີ 30 ມັງກອນ ມີຜູ້ເສຍຊີວິດຢ່າງໜ້ອຍ 213 ຄົນ ເຊິ່ງສ່ວນໃຫຍ່ແມ່ນອາໄສຢູ່ມົນທົນຫູເປີ່ຍ ສ່ວນຜູ້ປ່ວຍສະສົມທີ່ລວມທັງຢູ່ໃນຮົງກົງ, ມາເກົ໋າ ແລະ ໄຕ້ຫວັນ ຢ່າງໜ້ອຍ 9.720 ຄົນ.
ຂະນະດຽວກັນ, ເຈົ້າໜ້າທີ່ສາທາລະນະສຸກກຳລັງກວດກາກໍລະນີຕ້ອງສົງໄສການຕິດເຊື້ອອີກຢ່າງໜ້ອຍ 15.238 ກໍລະນີ ດ້ານສະຖານະການການແຜ່ລະບາດໃນຕ່າງປະເທດ ພົບແລ້ວຢ່າງນ້ອຍ 18 ປະເທດ ໄດ້ແກ່: ໄທ, ຍີ່ປຸ່ນ, ສິງກະໂປ, ອົດສະຕຣາລີ, ມາເລເຊຍ, ເກົາຫຼີໃຕ້, ສະຫະລັດ ອາເມລິກາ, ຝຣັ່ງ, ຫວຽດນາມ, ເຢຍລະມັນ, ສະຫະລັດ ອາຣັບເອມິເຣດ (UAE), ການາດາ, ອິຕາລີ, ກຳປູເຈຍ, ຟິນແລນ, ອິນເດຍ, ເນປານ, ຟີລິບປິນ ແລະ ສີລັງກາ. ໂດຍປະເທດໄທ ແລະ ຍີ່ປຸ່ນ ເປັນປະເທດທີ່ມີຜູ້ປ່ວຍລະສົມຫຼາຍທີ່ສຸດ ຢ່າງໜ້ອຍ 14 ຄົນ.
ທັງນີ້, ລັດຖະບານປັກກິ່ງໄດ້ເຜີຍແຜ່ຂໍ້ມູນດັ່ງກ່າວໄດ້ບໍ່ດົນ ຫຼັງອົງການອະນາໄມໂລກ (WHO) ໄດ້ປະກາດໃຫ້ສະຖານະການການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່ຈາກເມືອງອູ່ຮັນ “ເປັນສະຖານະການສຸກເສີນດ້ານສາທາລະນະສຸກສາກົນ” ເປັນຄັ້ງທີ 6 ໃນຮອບໜຶ່ງທົດສະວັດ ຕໍ່ຈາກການແຜ່ລະບາດຂອງໄຂ້ຫວັດສັດປີກ ເມື່ອປີ 2009, ການແຜ່ລະບາດຂອງໄວຣັສອີໂບລາ ໃນພາກຕາເວັນຕົກຂອງທະວີບອາຟຣິກາ ລະຫວ່າງປີ 2013-2016, ສະຖານະການພະຍາດໂປລີໂອ ເມື່ອປີ 2014, ການແຜ່ລະບາດຂອງເຊື້ອໄວຣັສຊິກາ ເມື່ອປີ 2016 ແລະ ການແຜ່ລະບາດຂອງເຊື້ອໄວຣັສອີໂບລາ ໃນສາທາລະນະລັດ ປະຊາທິປະໄຕຄອງໂກ (DR Congo) ເມື່ອປີ 2019.