3 ບໍລິສັດ ຈັບມືລົງນາມການຮ່ວມມືພັດທະນາພາຫານະທີ່ແລ່ນດ້ວຍໄຟຟ້າ

253

ພິທີເຊັນລົງນາມຮ່ວມມືເບື້ອງຕົ້ນໃນການພັດທະນາລະບົບພາຫານະທີ່ແລ່ນດ້ວຍໄຟຟ້າ ຈັດຂຶ້ນ ໃນວັນທີ 20 ຕຸລາ 2020 ຢູ່ທີ່ໂຮງແຮມແລນມາກ ນະຄອນຫຼວງວຽງຈັນ.

ລະຫວ່າງ ລັດວິສາຫະກິດໄຟຟ້າລາວ, ບໍລິສັດ Geely ຈໍາກັດ ແລະ ບໍລິສັດ ກຣິດຕິພົງ ກຣູບ ຈໍາກັດ ໂດຍເປັນກຽດເຂົ້າຮ່ວມຂອງ ທ່ານ ຄໍາມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່.

ຈຸດປະສົງຂອງພິທີລົງນາມຮ່ວມມືກັນພັດທະນານໍາໃຊ້ພາຫານະທີ່ແລ່ນດ້ວຍກະແສໄຟຟ້າ ແລະ ສົ່ງເສີມການນໍາໃຊ້ໄຟຟ້າເຂົ້າລະບົບຄົມມະນາຄົມ-ຂົນສົ່ງ ໃນຄັ້ງນີ້ເພື່ອສົ່ງເສີ່ມນໍາໃຊ້ພະລັງງານທີ່ສະອາດ ຫຼຸດຜ່ອນມົນລະຜິດ, ຕິດພັນກັບຄຸນນະພາບຊີວິດ ເປັນມິດກັບສີ່ງແວດລ້ອມ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ສປປລາວ ໄປຕາມທິດສີຂຽວ ແລະ ຍືນຍົງ.

ທ່ານ ລັດຖະມົນຕີກະຊວງ ພະລັງງານ ແລະ ບໍ່ແຮ່ ໄດ້ມີຄຳເຫັນວ່າ: ພິທີເຊັນເງື່ອນໄຂການຮ່ວມມືເບື້ອງຕົ້ນ ເພື່ອພັດທະນາໂຄງການນຳໃຊ້ພາຫະນະທີ່ແລ່ນດ້ວຍກະແສໄຟຟ້າ ຢູ່ ສປປ ລາວ ຊຶ່ງແມ່ນໂຄງການພັດທະນາທີ່ມີຄວາມສຳຄັນ ແລະ ໄດ້ຖືກກຳນົດໄວ້ຢູ່ໃນແຜນຍຸດທະສາດ ຮອດປີ 2025 ແລະ ວິໄສທັດຮອດປີ 2030 ການພັດທະນາວຽກງານພະລັງງານ ແລະ ບໍ່ແຮ່.

ໂດຍຕາງໜ້າໃຫ້ ການນຳກະຊວງພະລັງງານ ແລະ ບໍແຮ່ ຂ້າພະເຈົ້າ ຂໍສະແດງຄວາມຊົມເຊີຍ ລັດວິສາຫະກິດໄຟຟ້າລາວ, ກຸ່ມບໍລິສັດວິທະຍາສາດ-ເຕັກໂນໂລຊີ GEELY ແລະ ກຸ່ມບໍລິສັດກິດຕິພົງ ທີ່ໄດ້ມີແນວຄວາມຄິດລິເລີ້ມ, ຮ່ວມກັນປຶກສາຫາລື, ເກັບກຳຂໍ້ມູນມາເປັນເວລາດົນພໍສົມຄວນ ແລະ ມາຮອດມື້ນີ້, ກໍໄດ້ມີພື້ນຖານທີ່ສຳຄັນ ແລະ ສາມາດບັນລຸການ ເຊັນເງື່ອນໄຂການຮ່ວມມືເບື້ອງຕົ້ນ ກັນໄດ້ຢ່າງເປັນທາງການ.

ສປປ ລາວ ໄດ້ດໍາເນີນການພັດທະນາອຸດສາຫະກໍາພະລັງງານໄຟຟ້າຕາມແນວທາງຫັນເປັນອຸດສາຫະກຳ ແລະ ທັນສະໄໝ ໂດຍອີງໃສ່ແຫຼ່ງນ້ຳທຳມະຊາດທີ່ມີຢູ່ຢ່າງອຸດົມສົມບູນເປັນທ່າແຮງນັ້ນແມ່ນຖືກຕ້ອງ, ສອດຄ່ອງກັບເງື່ອນໄຂ, ທັງສາມາດຕອບສະໜອງກັບຄວາມຮຽກຮ້ອງຕ້ອງການຂອງເພື່ອນມິດ, ສາກົນ ທີ່ຕ້ອງການພະລັງງານທີ່ສະອາດ, ເປັນມິດກັບສິ່ງແວດລ້ອມ ແລະ ມີຄວາມຍືນຍົງນັ້ນ.


ມາຮອດປັດຈຸບັນ, ຂະແໜງອຸດສາຫະກຳໄຟຟ້າຢູ່ ສປປ ລາວ ໄດ້ເປັນຜູ້ເຮັດບົດບາດທີ່ສຳຄັນ ແລະ ມີລັກສະນະເປັນພື້ນຖານ ໃນການພັດທະນາເສດຖະກິດ-ສັງຄົມຂອງ ສປປ ລາວ, ອູດສາຫະກໍາໄຟຟ້າ ໄດ້ກາຍເປັນຂະແໜງເສດຖະກິດ ທີ່ມີບົດບາດສຳຄັນໃນລະບົບເສດຖະກິດແຫ່ງຊາດ ຂອງ ສປປ ລາວ ຊຶ່ງສາມາດດຶງດູດການມາລົງທຶນຂອງຜູ້ປະກອບການທັງພາຍໃນ ແລະ ຕ່າງປະເທດ ແລະ ໄດ້ຮັບການສະໜັບສະໜູນຈາກເພື່ອນມິດ-ສາກົນຢ່າງໜັກແໜ້ນກວ້າງຂວາງ.

ແຫຼງທ່ີ່ມາ:ສູນຂ່າວພະລັງງານ ແລະ ບໍ່ແຮ່, ລັດວິສາຫະກິດໄຟຟ້າລາວ EDL