ໃນຕອນບ່າຍວັນທີ 10 ເມສາ 2023 ຄະນະກອງກວດກາປ່າໄມ້ ເມືອງໄຊເສດຖາ ແຂວງອັດຕະປື ໄດ້ຈັດຕັ້ງພິທີຈູດທໍາລາຍຊິ້ນສ່ວນສັດປ່າ ຂຶ້ນທີ່ເດີນຫ້ອງການກະສິກຳ ແລະ ປ່າໄມ້ເມືອງ. ໂດຍການເຂົ້າຮ່ວມຂອງທ່ານ ສີໃສ ໄຊຍະສິດ ຫົວໜ້າຫ້ອງການກະສິກຳ ແລະ ປ່າໄມ້ເມືອງ, ພ້ອມພະນັກງານໜ່ວຍງານກວດກາປ່າໄມ້ເມືອງ, ໜ່ວຍງານລ້ຽງສັດ ແລະ ການປະມົງ, ເຂົ້າຮ່ວມ.
ຜ່ານມາເຈົ້າໜ້າທີ່ໄດ້ສົມທົບກັບກອງກວດກາປ່າໄມ້ເມືອງລົງກວດກາເອົາໃຈໃສ່ປະຕິບັດໃນການສະກັດກັ້ນເປັນຕົ້ນແມ່ນໄດ້ພົບເຫັນພໍ່ຄ້າຊາວຂາຍລັກລອບຊື້-ຂາຍສັດປ່າ ປະເພດຄຸ້ມຄອງການກະທໍາຜິດຕໍ່ກົດໝາຍສັດນໍ້າ-ສັດປ່າ ສະບັບເລກທີ 07/ສພຊ, ມີ 2 ກໍລະນີ ທີ່ມີຊິ້ນສວນ ສັດປ່າຄື:
ປະເພດ 1. ເຫງັນ 05 ໂຕ ນໍ້າໜັກ 9,5 ກິໂລ, ປະເພດ 2.ໍ ເໝັ້ນ 04 ໂຕ ນ້ຳໜັກ 29 ກິໂລລວມທັງໝົດຢຶດໄດ້ 38,5 ກິໂລ ແລະ ທາງເຈົ້າໜ້າທີ່ກໍ່ໄດ້ສຶກສາອົບຮົມກ່າວເຕືອນຕາມລະບຽບການ, ເພາະວ່າການລັກລອບຄ້າ-ຂາຍ ສັດນໍ້າ-ສັດປ່າປະເພດຄຸ້ມຄອງທີ່ຜິດລະບຽບກົດໝາຍໃນມາດຕາ 112-128 ຂອງກົດໝາຍປ່າໄມ້ ມາດຕາ 327 ຂອງກົດໝາຍ, ແຫ່ງ ສປປ ລາວ ວ່າດ້ວຍມາດຕະການສຶກສາອົບຮົມ ພ້ອມກ່າວເຕືອນ.
ສຳລັບຂອງກາງເປັນຊີ້ນສ່ວນສັດປ່າດັ່ງກ່າວ ທາງເຈົ້າໜ້າທີ່ໄດ້ກັກຢຶດມາ ໄວ້ຢູ່ກອງກວດກາປ່າໄມ້ເມືອງ ແລະ ພ້ອມນີ້ກໍ່ໄດ້ຮ່ວມຈູດທໍາລາຍຊິ້ນສ່ວນສັດປ່າດັ່ງກ່າວນັ້ນຖີ້ມເພື່ອເປັນການຢັ້ງຢືນວ່າເຈົ້າໜ້າທີ່ເຮັດແທ້ທຳຈິງຕໍ່ລະບຽບຫຼັກການ.