ທຸກໆປີໃນໄລຍະເທດສະການກໍ່ຈະເປັນໄລຍະທີ່ສິນຄ້າໄດ້ຂາຍດີເປັນພິເສດ ເປັນຊ່ວງເວລາແຫ່ງການຫຼິ້ນການກິນ ພ້ອມດຽວກັນຄົນຂາຍກໍ່ພັກໄປຢ້ຽມຢາມພີ່ນ້ອງຄອບຄົວແດ່ ເຮັດໃຫ້ຜູ້ຂາຍໜ້ອຍລົງ ຂະນະທີ່ກຳລັງຊື້ຫຼາຍຂຶ້ນ ຈຶ່ງມັກເກີດປະກົດການສິນຄ້າແພງກວ່າປົກກະຕິ.
ເພື່ອປ້ອງກັນບັນຫາດັ່ງກ່າວໃນອາທິດແລ້ວນີ້, ຫ້ອງການອຸດສາຫະກຳ ແລະ ການຄ້າ ເມືອງ ປາກກະດິງ ນຳໂດຍ ທ່ານ ສົມສະຫວັດ ມັງແກ້ວບິດາ ຮອງຫົວໜ້າຫ້ອງການອຸດສາຫະກຳ ແລະ ການຄ້າເມືອງ ປາກກະດິງ ພ້ອມດ້ວຍຄະນະ ໄດ້ລົງຕິດຕາມ, ກວດກາ ລາຄາສິນຄ້າ ແລະ ຄ່າບໍລິການ ພາຍໃນເມືອງ ໂດຍປະຕິບັດຕາມແຈ້ງການ ຂອງເຈົ້າເມືອງ ປາກກະດີງ ສະບັບເລກທີ 189 / ມປດ. ເຊີ່ງການລົງເຄື່ອນໄຫວເຮັດວຽກໃນຄັ້ງນີ້ໄດ້ລົງຕິດຕາມ, ກວດກາ ຕາມທ້ອງຕະຫຼາດພາຍໃນເມືຶອງ ໂດຍສະເພາະແມ່ນກວດກາລາຄາຊີ້ນ, ປາ, ອາຫານທະເລ, ພືດຜັກຕ່າງໆ ແລະ ຊິງຊັ່ງນ້ຳໜັກ ພ້ອມທັງໄດ້ສ້າງບົດບັນທຶກກັບຜູ້ປະກອບການຈຳນວນໜື່ງ.
ຈຸດປະສົງຂອງຫ້ອງການອຸດສາຫະກຳ ແລະ ການຄ້າ ລົງເຄື່ອນໄຫວໃນຄັ້ງນີ້ກໍ່ເພື່ອແນ່ໃສ່ປຸກຈິດສຳນືກໃຫ້ພໍ່ຄ້າ,ແມ່ຄ້າ ມີສະຕິເຄົາລົບຕໍ່ລະບຽບກົດໝາຍ , ຫຼີກເວັ້ນການສວຍໂອກາດຂື້ນລາຄາສີນຄ້າຕາມລຳພັງໃຈ, ໂດຍສະເພາະແມ່ນໃນຊ່ວງເທດສະການປີໄຫມ່ລາວ( ກຸດສົງການ ) ພສ 2567 ນີ້.