ແຂວງຜົ້ງສາລີໄດ້ສຳເລັດການສ້າງໄຟຟ້າເຍືອງທາງ ໂຊລາເຊວຫຼື ແສງຕາເວັນ ພິທີເຊັນສັນຍາລະຫວ່າງສະພາປະຊາຊົນແຂວງຜົ້ງສາລີ ກັບໂຮງໝໍແຂວງຜົ້ງສາລີ ໄດ້ມີຂຶ້ນໃນວັນທີ 18 ມີນຜ່ານມາ ໂດຍມີ ທ່ານ ທອງສີ ເສົາສຸລິພົມ ປະທານສະພາປະຊາຊົນແຂວງ, ມີຄະນະອຳນວຍການໂຮງໝໍແຂວງ, ພະນັກງານແພດໝໍ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ຄໍາມາ ສຸລິວົງ ຮອງເລຂາທິການສະພາປະຊາຊົນແຂວງ, ຄະນະຮັບຜິດຊອບຕິດຕັ້ງໄຟຟ້າເຍືອງທາງໂຊລາເຊວ ໄດ້ລາຍງານກ່ຽວກັບຜົນການກະກຽມ ແລະ ດຳເນີນການຕິດຕັ້ງໄຟຟ້າເຍືອງທາງໂຊລາເຊວ ໃຫ້ໂຮງໝໍແຂວງ ສໍາເລັດ 100% ມີຈໍານວນ 7 ຊຸດ ລວມມູນຄ່າທັງໝົດ 146 ລ້ານກວ່າກີບ, ເຊິ່ງຊຸດໄຟຟ້າໂຊລາເຊວ ດັ່ງກ່າວນີ້, ແມ່ນໄດ້ມາຈາກສະພາແຫ່ງຊາດ ໂດຍແມ່ນ ທ່ານ ສົມມາດ ພົລເສນາ ຮອງປະທານສະພາແຫ່ງຊາດ ໄດ້ປຸກລະດົມນໍາ ເຂດພັດທະນາກວມລວມໄຊເສດຖາ ເພື່ອມອບໃຫ້ສະພາປະຊາຊົນແຂວງຜົ້ງສາລີ.
ໃນພິທີ ໄດ້ເຊັນບົດບັນທຶກມອບ-ຮັບ ຕາງໜ້າສະພາປະຊາຊົນແຂວງ ໂດຍ ທ່ານ ນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງ ແລະ ຕາງໜ້າໂຮງໝໍແຂວງ ເຊັນຮັບໂດຍ ທ່ານ ຄໍາເພັດ ຈອມອູ່ນມີໄຊ ອໍານວຍການໂຮງໝໍແຂວງ.
ທັງນີ້, ເພື່ອເປັນການປະກອບສ່ວນໃນການພັດທະນາພາຍໃນບໍລິເວນໂຮງໝໍແຂວງ ໃຫ້ມີແສງສະຫວ່າງພຽງພໍ ແລະ ເພື່ອອໍານວຍຄວາມສະດວກໃຫ້ແກ່ປະຊາຊົນ, ພົນລະເມືອງທີ່ມາໃຊ້ບໍລິການປີ່ນປົວຢູ່ໂຮງໝໍແຂວງດີຂຶ້ນເທື່ອລະກ້າວ.
ໃນໂອກາດດັ່ງກ່າວ, ທ່ານ ທອງສີ ເສົາສຸລິ (ໃນນາມສ່ວນຕົວ ແລະ ຄອບຄົວ) ໄດ້ນໍາເອົາຊຸດກິລາ ຈໍານວນ 70 ຊຸດ, ລວມມູນຄ່າ 7.600.000 ກີບ ແລະ ເງິນສົດ ຈໍານວນ 5.000.000 ກີບ ມອບໃຫ້ໂຮງໝໍແຂວງ ເພື່ອເປັນການຊຸກຍູ້ວຽກງານໂຮງໝໍ ແລະ ວຽກງານຂະບວນການກິລາໃຫ້ມີບັນຍາກາດຟົດຟື້ນ.
