ກອງບັນຊາການທະຫານແຂວງຫຼວງພະບາງ ໄດ້ຈັດພິທີມອບເງິນອຸດໜູນໃຫ້ຄອບຄົວຜູ້ເສຍຊີວິດ ແລະເງິນອຸດໜູນເທື່ອດຽວໃຫ້ນາຍທະຫານທີ່ອອກການ,ໃນວັນທີ 19 ມີນາ 2024 ນີ້, ທີ່ຫ້ອງປະຊຸມຫ້ອງການເມືອງທະຫານແຂວງ, ໂດຍມີສະຫາຍ ພັນໂທ ສົມໃຈ ສີສະຫວັດ ຄະນະພັກກອງບັນຊາການ, ຮອງຫົວໜ້າຫ້ອງການເມືອງທະຫານແຂວງ, ມີພະແນກກການ, ກົມກອງ ແລະພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ພັນໂທ ຫານຊະນະ ຂັດຕິຍະວົງສາ ຫົວໜ້າພະແນກພະນັກງານ ແລະ ສະຫາຍ ພັນໂທ ລືໄຊ ພົມວັນຄຳ ຫົວໜ້າພະແນກປະກັນສັງຄົມຫ້ອງການເມືອງທະຫານແຂວງ ໄດ້ຜັດປ່ຽນຂຶ້ນຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການອະນຸມັດໃຫ້ນາຍທະຫານພັກການຮັບອຸດໜູນເທື່ອດຽວ ແລະພະນັກງານບຳນານເສຍຊີວິດ ລວມທັງພະນັກງານປະຈຳການເສຍຊີວິດທັງໝົດ 20 ສະຫາຍ.
ໃນນີ້ມີພະນັກງານບຳນານເສຍຊີວິດ 4 ສະຫາຍ, ນາຍທະຫານປະຈຳການເສຍຊີວິດ 5 ສະຫາຍ ແລະພະນັກງານອອກອຸດໜູນເທື່ອດຽວ 11 ສະຫາຍ, ລວມເປັນເງິນທັງໝົດ 1.175.124.016 ກີບ, ພິທີໄດ້ມອບເງິນຈຳນວນດັ່ງກ່າວໃຫ້ 3 ພາກສ່ວນຢ່າງສົມກຽດ. ໂອກາດດັ່ງກ່າວ ພັນໂທ ສົມໃຈ ສີສະຫວັດ ກໍໄດ້ສະແດງຄວາມເປັນຫ່ວງເປັນໃຍ ແລະເປັນກໍາລັງໃຈ ຕໍ່ພະນັກງານທະຫານ ທີ່ເສຍຊີວິດ ແລະຜູ້ທີ່ໄດ້ຮັບເງິນອຸດໜູນຄັ້່ງນີ້ຕື່ມອີກ.
ຂ່າວ: ສົມພອນ ສຸວັນທອນ.
