ກີມສາຣິດ ປາດ ເປັນນັກສຶກສາຕ່າງປະເທດຄົນໜຶ່ງທີ່ໄດ້ຮັບທຶນການສຶກສາມາຮຽນຢູ່ປະເທດລາວ ເຖິງຈະພົບກັບອຸປະສັກໃນການຮຽນ ແລະ ການໃຊ້ຊີວິດປານໃດກໍຕາມ ແຕ່ກໍສູ້ຊົນ ແລະ ຕັ້ງໃຈຮຽນສາຂາທີ່ຕົນເອງມັກ ພ້ອມທັງສ້າງຜົນງານໃນການຮ່ວມກິດຈະກຳແຂ່ງຂັນຕ່າງໆຢູ່ໃນມະຫາໄລ. ຫຼ້າສຸດ ກີມສາຣິດ ໄດ້ເຂົ້າຮ່ວມການແຂ່ງຂັນອອກແບບສະຖາປັດຕະຍະກໍາ ເພື່ອຄັດເລືອກເອົານັກສຶກສາດີເດັ່ນໄປແຂ່ງຂັນລະດັບອາຊີທີ່ໄທເປປະເທດຈີນ ແລະ ສາມາດຍາດໄດ້ອັນດັບທີ 5 ຈາກມີຜູ້ເຂົ້າຮ່ວມແຂ່ງຂັນທັງໝົດ 12 ຄົນ.
ທ້າວ ກີມສາຣິດ ປາດ ໃຫ້ສໍາພາດວ່າ: ບ້ານເກີດນ້ອງຢູ່ແຂວງກຳປຸງຈາມ ປະເທດກຳປູເຈຍ ( Cambodia ) ປັດຈຸບັນພັກຢູ່ຫໍພັກຊີເກມ ບ້ານດົງໂດກ ເມືອງໄຊທານີ ນະຄອນຫຼວງວຽງຈັນ ຮຽນຢູ່ມະຫາວິທະຍາໄລແຫ່ງຊາດ ຄະນະສະຖາປັດຕະຍະກຳສາດ ສາຂາສະຖາປັດຕະຍະກຳປີທີ 4.
ສາເຫດທີ່ມັກສາຂານີ້ ເພາະວ່າເປັນສາຂາທີ່ຕິດພັນກັບນິດໄສຂອງຕົນເອງຫຼາຍ ຮູ້ສຶກວ່າຕົວເອງເປັນຄົນມັກໃນການແຕ້ມຮູບ, ການອອກແບບ, ງານສິລະປະ, ວັດທະນະທຳ ລວມທັງເລື່ອງປະຫວັດສາດຕ່າງໆທີ່ກ່ຽວຂ້ອງກັບສະຖາປັດຕະຍະກຳ ເມື່ອໄດ້ມາຮຽນຕົວຈິງເຫັນວ່າສາຂາສະຖາປັດຕະຍະກຳມີສິ່ງທີ່ຕົນເອງຢາກສຶກສາຮຽນຮູ້ໃຫ້ເລິກເຊິ່ງ.
ໄລຍະຜ່ານມາ ໄດ້ມີຜົນງານຫຼາຍຢ່າງ ແລະ ໄດ້ພັດທະນາມາເລື້ອຍໆ ພ້ອມທັງເອົາໃຈໃສ່ທຸກໜ້າວຽກທີ່ມີໃນຫ້ອງຮຽນ ແລະ ຜົນການຮຽນດີພໍສົມຄວນ ເຊັ່ນ: ໄດ້ເຂົ້າຮ່ວມ workshop ແລະ ການແຂ່ງຂັນຕ່າງໆໃນປີ2023 ເຊັ່ນ:
1. Award of Excellence the 3rd Prize of the Design Competition for social well-being in Laos PDR 2023;
2. 2 nd Prize Has successfully participated in the Workshop and Design Competition “Blooming CHAMPA at the Old Kaysone Phomvihan City: Reinventing Urban Heritage for tourism Development ”.
3. For awarded fifth of the domestic ACARA2023 Under topic “Naturally Circular ”.
ຫຼ້າສຸດໄດ້ເຂົ້າຮ່ວມງານແຂ່ງຂັນອອກແບບສະຖາປັດຕະຍະກໍາ ຄັ້ງວັນທີ 14 ພະຈິກ 2023 ທີ່ມະຫາວິທະຍາໄລແຫ່ງຊາດ ມີນັກສຶກສາເຂົ້າຮ່ວມແຂ່ງຂັນຈາກ 3 ວິທະຍາໄລ ຜົນງານຂອງນ້ອງໄດ້ອອກແບບກ່ຽວກັບສູນພັດທະນາຊຸມຊົນຢາງພາລາ ຢາກເຜີຍແຜ່ຄວາມຮູ້ຕ່າງໆກ່ຽວກັບບັນຫາທີ່ເຮົາພົບໃນປັດຈຸບັນ ເຊັ່ນ: ຜົນກະທົບຕ່າງໆຂອງຢາງພາລາ ທີ່ເຮັດໃຫ້ດິນຟ້າອາກາດມີການປ່ຽນແປ່ງ ແລະ ຜົນກະທົບທາງດ້ານສັງຄົມທີ່ມີໃນ ສປປ ລາວ ຢາກສະເໜີວິທີ ທີ່ເຮັດໃຫ້ການກິນຢູ່ຂອງປະຊາຊົນໄດ້ຢູ່ດີ ກິນດີ. ທັງດ້ານເສດຖະກິດ ການສຶກສາ ການນໍາເອົາວັດສະດຸໃນທ້ອງຖິ່ນ ສິ່ງເສດເຫຼືອຕ່າງໆເພື່ອສ້າງອາຄານທີ່ເປັນມິດກັບສິ່ງແວດລ້ອມ ແລະ ສິ່ງສຳຄັນອີກອັນໜຶ່ງພະຍາຍາມສະແດງທຸກສິ່ງທຸກຢ່າງທີ່ເປັນເອກະລັກຂອງປະເທດລາວເຂົ້າໄປໃນງານສະຖາປັດຕະຍະກຳໃຫ້ໄດ້ຫຼາຍທີ່ສຸດ. ໃນການແຂ່ງຂັນຄັ້ງນີ້ ມີນັກສຶກສາທັງໝົດ 12 ຄົນ ນ້ອງເອງໄດ້ອັນດັບທີ5.
ຜ່ານມາເຄີຍພົບບັນຫາການຮຽນ ເຊັ່ນ: ການຈັດເວລາໃນການເຮັດວຽກ, ບັນຫາທາງພາສາ ( ຍ້ອນນ້ອງນັກສຶກສາຕ່າງປະເທດ ) ມີແນວເຂົ້າໃຈແດ່ ບໍ່ເຂົ້າໃຈແດ່. ວິທີແກ້ໄຂ ກໍຄືພະຍາຍາມເຮັດວຽກເທື່ອລະໜ້ອຍ ແລະ ພະຍາຍາມເຮັດຕາມຄວາມສາມາດຂອງຕົນເອງທີ່ເຮັດໄດ້, ຫາໝູ່ຄົນລາວມາຊ່ວຍປຶກສາ ແລກປ່ຽນຄວາມຄິດເຫັນ ອະທິບາຍບາງຄຳສັບທີ່ບໍ່ເຂົ້າໃຈ ພິເສດນັ້ນຄູ່ອາຈານຈະເປັນຜູ້ຊ່ວຍສອນຢ່າງໃກ້ຊິດ.ເວລາວ່າງນ້ອງ ມັກຫາໝູ່ໂອ້ລົມເລື່ອງທີ່ເຄີຍຜ່ານມາ, ແບ່ງປັນປະສົບການຕ່າງໆທີ່ເຄີຍພົບ, ເອົາເວລາໄປທ່ຽວເຂດນອກເມືອງເບິ່ງທໍາມະຊາດ, ຟັງແພງ, ແຕ້ມຮູບ, ເປັນຕົ້ນ.
ຮູ້ສຶກພາກພູມໃຈໃນຕົນເອງ ທີ່ສາມາດຜ່ານພົ້ນທຸກບັນຫາມາໄດ້ໃນໄລຍະການຮຽນທີ່ຜ່ານມາ ດ້ວຍຄວາມຕັ້ງໃຈຮຽນ ທັງຕອນຮຽນຢູ່ກຳປູເຈຍ ແລະ ປັດຈຸບັນກໍໄດ້ທຶນມາຮຽນຢູ່ ສປປ ລາວ ຄິດວ່າໄດ້ຊ່ວຍຄອບຄົວຫຼາຍ ແລະ ໃຫ້ຄອບຄົວເບິ່ງເຫັນວ່າເຮົາເປັນຜູ້ໃຫຍ່ດູແລຕົນເອງໄດ້ ແລະ ບໍ່ເຮັດໃຫ້ເພິ່ນເປັນຫ່ວງຫຼາຍ. ມາຢູ່ຕ່າງປະເທດແບບນີ້ ນ້ອງພະຍາຍາມ ຢູ່ຢ່າງມີສະຕິ ແກ້ໄຂບັນຫາທີ່ພົບໄປເທື່ອລະກ້າວ ແລະ ເຊື່ອວ່າທຸກໆຢ່າງຈະດີຂຶ້ນ ແລະ ຕ້ອງເຊື່ອໝັ້ນກັບຕົນເອງວ່າເຮົາຈະຜ່ານມັນໄປ ໄດ້.
ຢາກຝາກເຖິງນ້ອງໆຜູ້ທີ່ສົນໃຈຢາກຮຽນຄະນະ ຄສປ ວ່າ: ຖ້ານ້ອງໆມັກໃນດ້ານທີ່ກ່ຽວຂ້ອງກັບສະຖາປັດ ເຊັ່ນ: ການແຕ້ມຮູບ, ອອກແບບ, ງານສິລະປະ… ໃຫ້ມາສະໝັກເຂົ້າຮຽນສາຂານີ້ເລີຍ ເຖິງຈະບໍ່ເກັ່ງແຕ່ໃຈມັກກໍສາມາດເຂົ້າມາຮຽນໄດ້ ເພາະທຸກໆສາຂາຈະມີຄວາມຍາກ ແລະ ງ່າຍແຕກຕ່າງກັນ ໃຫ້ເຮົາຄ່ອຍໆຮຽນຮູ້ໄປ ຖ້າໃຈເຮົາມັກ ເວລາຮຽນຈະມີຄວາມສຸກ ແລະ ມ່ວນໄປກັບມັນ; ນ້ອງມີຄະຕິປະຈໍາໃຈຢູ່ສະເໜີຄື “ ຫາຈຸດທີ່ສະບາຍໃຈແລ້ວພາຕົວເອງໄປທີ່ນັ້ນ ”.