ມື້ນີ້ພາມາຮູ້ຈັກ ໜຶ່ງສາວງາມ ຕົວແທນນໍາສະເໜີແຂວງ ໄຊຍະບູລີ ໃນເວທີ ນາງງາມຈັກກະວານລາວ 2024 ( Miss Universe Laos 2024 ) ຊົມພູ້ ເພັດອາລຸນ ຈິດຕະວົງ ທີ່ກໍາລັງ ສຶກສາຢູ່ປີ 1 ມະຫາວິທະຍາໄລແຫ່ງຊາດ ປັດຈຸບັນອາໄສ ຢູ່ບ້ານໂນນສະອາດ ເມືອງໄຊທານີ ນະຄອນຫຼວງວຽງຈັນ.
ຊົມພູ້ ສາວງາມຜູ້ມີເອກກະລັກ ຮອຍຍິ້ມ ງາມມີສະເໜ່ ພ້ອມຄະຕິປະຈໍາໃຈ “ຄວາມພະຍາມຢູ່ບ່ອນໃດ ຄວາມສຳເລັດ ຢູ່ບ່ອນນັ້ນ” ໄດ້ບອກວ່າ ເຫດຜົນທີ່ມາປະກວດໃນເວທີນີ້ ຍ້ອນຢາກກ້າວຜ່ານຄວາມຢ້ານຂອງຕົນເອງ ແລະ ຢາກເປັນແຮງບັນດານໃຈໃຫ້ກັບຫລາຍຄົນທີບໍ່ກ້າສະແດງອອກ ແລະ ຢາກເປັນກະບອກສຽງໃຫ້ທຸກຄົນມາເປັນຈິດອາສານຳກັນ ແລະ ກໍຍັງຄາດຫວັງວ່າ ຈະໄດ້ປະສົບການໃໝ່ທີ່ຕົນເອງບໍ່ເຄີຍເຮັດ ໄດ້ຮູ້ສິ່ງໃໝ່ໆ ທີ່ເຮົາບໍ່ເຄີຍພົບ.
ສໍາລັບນ້ອງຄິດວ່າ ຄວາມກ້າຫານກ້າສະແດງອອກເທົ່ານັ້ນ ທີ່ຈະສາມາດຊິງມຸງກຸດໄດ້ ນ້ອງເອງເປັນຄົນອາລົມດີ ສາມາດເຂົ້າໄດ້ທຸກສະຖານະການ, ນ້ອງຈະສ້າງພາບໃຫ້ກັບທຸກຄົນທີ່ບໍ່ກ້າລົງມືເຮັດໃນຕົວເອງຢາກເຮັດ ໃຫ້ກາຍເປັນຄົນກ້າລົງມືເຮັດມັນ ເພາະ ນ້ອງເອງກໍເຊື່ອຄວາມພະຍາມນັ້ນ ມັນບໍ່ເຄີຍທໍລະຍົດໃຜ ຫາກເຮົາຕັ້ງໃຈ ແລະ ເຊື່ອໝັ້ນ ໂຕເອງພໍ ທຸກຢ່າງທີ່ເຮົາຕັ້ງໃຈກໍຈະເກີດຜົນສຳເລັດ.
ຫາກນ້ອງໄດ້ມີໂອກາດໄປຕ່າງປະເທດ ນ້ອງກໍຈະແນະນຳພາສາການເວົ້າ ແລະ ການນຸ່ງຖື ວັດທະນາທຳ ທີ່ປະຕີບັດກັນມາແຕ່ດົນນານ ເພື່ອໃຫ້ສາກົນໄດ້ຮັບຮູ້ຄວາມເປັນລາວ.
ຊົມພູ້ ຄິດວ່າຄຸນຄ່າຂອງຜູ້ຍິງນັ້ນ ບໍ່ມີວັນສິ້ນສຸດ ເພາະຜູ້ຍິງສະໄໝໃໝ່ ມີ ຄວາມສາມາດເທົ່າທຽມຜູ້ຊາຍ ແລະ ຜູ້ຍິງດຽວນີ້ ກໍສາມາດເປັນຜູ້ນຳໄດ້ຄືກັບຜູ້ຊາຍ.
ສຸດທ້າຍນີ້ ຢາກຝາກເປັນກຳລັງໃຈກັບ ຕົວແທນນຳສະເໜີແຂວງໄຊຍະບູລີແດ່ເດີ້! ແລະ ເຊຍສາວໆທັງ 18 ຄົນນຳທຸກຄົນທີ່ມາເວທີນີ້ລ້ວນແຕ່ຄວາມຝັນ ແລະ ຄວາມສາມາດທັງນັ້ນ.
ໂດຍ: ເມລີ; ຮູບ: som phou Chittavong