ຢ່າປະໝາດ ທ່ານໃດທີ່ຂັບລົດແລ້ວໃຊ້ໂຕຫຼອກສາຍຮັດນິລະໄພ ອຸປະກອນເສີມທີ່ຫາຊື້ໄດ້ງ່າຍ ຕາມທົ່ວໄປໃນທ້ອງຕະຫຼາດ ແລະ ຮ້ານຄ້າແຄຣ ເຊິ່ງເປັນການຕັດສັນຍານສຽງ ຫຼື ສັນຍານເຕືອນພຽງເພາະບໍ່ຢາກໃສ່ ຫຼື ຮັດສາຍນິລະໄພ ໃນຂະນະທີ່ຂັບລົດ ຫຼື ໂດຍສານ ເນື່ອງຈາກຮັດສາຍນິລະໄພແລ້ວອຶດອັດ ຂັບພຽງແຕ່ໄລຍະທາງບໍ່ໄກ ບໍ່ຢາກເສຍເວລາຮັດໃຫ້ວຸ່ນວາຍ ແຕ່ຖ້າເກີດອຸບັດເຫດອາດສ່ຽງໄດ້ຮັບບາດເຈັບຢ່າງຮຸນແຮງກໍເປັນໄດ້.
ໂຕຫຼອກສາຍຮັດນິລະໄພ ອຸປະກອນເສີມທີ່ບໍ່ມີປະໂຫຍດ ເປັນອຸປະກອນເສີມທີ່ຜະລິດມາເພື່ອຈໍາໜ່າຍເພື່ອສຽບໃສ່ຊ່ອງສາຍຮັດນິລະໄພ ເພື່ອບໍ່ໃຫ້ລະບົບແຈ້ງເຕືອນຜູ້ຂັບຂີ່ ຫຼື ຜູ້ໂດຍສານທີ່ບໍ່ຮັດສາຍນິລະໄພ ໃຫ້ເຂົ້າໃຈວ່າໄດ້ຮັດສາຍຮັດນິລະໄພຮຽບຮ້ອຍແລ້ວ ໂດຍຖືກຜະລິດມາເພື່ອໃຊ້ແທນວິທີ ການດັ້ງເດີມຢ່າງການຮັດສາຍນິລະໄພ ປະໄວ້ກັບເບາະ ເຊິ່ງເບິ່ງເກະກະກວ່າ ແຕ່ບໍ່ວ່າຈະເປັນດ້ວຍວິທີໃດກໍຕາມ ທ່ານທີ່ບໍ່ຮັດສາຍນິລະໄພຂະນະຂັບຂີ່ ຫຼື ນັ່ງໂດຍສານໃນທຸກຕໍາແໜ່ງ ຖືວ່າສ່ຽງອັນຕະລາຍຫຼາຍ ເຖິງວ່າເກີດອຸບັດເຫດບໍ່ຮຸນແຮງ ຍິ່ງລົດລຸ້ນໃໝ່ທີ່ມີຖົງລົມນິລະໄພອາດຈະພາໃຫ້ເກີດອາການບາດເຈັບຫຼາຍຂຶ້ນ ຫາກບໍ່ຮັດສາຍຮັດນິລະໄພ ເມື່ອຖົງລົມນິລະໄພແຕກ.
▶ ເປັນຫຍັງຕ້ອງໄດ້ຮັດນິລະໄພ ດີກວ່າການໃສ່ສາຍສຽບຫຼອກ.
ສາຍຮັດນິລະໄພຄືອຸປະກອນເພື່ອຄວາມປອດໄພພື້ນຖານ ທີ່ຈໍາເປັນຕ້ອງໃຫ້ມີລະບົບຄວາມປອດໄພ ເຊິ່ງປົກປ້ອງໄດ້ ແຕ່ຖ້າບໍ່ໃສ່ສາຍຮັດນິລະໄພ ອາດໄດ້ຮັບອັນຕະລາຍຈາກການອັດກະແທກ ຢ່າງຮຸນແຮງ ເມື່ອເກີດອຸບັດເຫດ, ດັ່ງນັ້ນການໃສ່ສາຍຮັດນິລະໄພ ໃຫ້ຖືກຕ້ອງຈະຊ່ວຍຢຶດຮ່າງກາຍບໍ່ໃຫ້ປະທະກັບສ່ວນຕ່າງໆພາຍໃນລົດ ລວມທັງການຟົ້ງອອກຈາກລົດ ເພື່ອຫຼຸດການບາດເຈັບທີ່ຮຸນແຮງ.
ພ້ອມດຽວກັນນັ້ນ, ການໃສ່ໂຕຫຼອກສາຍຮັດນິລະໄພ ແທນການໃສ່ສາຍຮັດນິລະໄພໃນຂະນະຂັບລົດ ແມ່ນມີຄວາມຜິດຕາມກົດໝາຍ ເພາະຖືວ່າເປັນການບໍ່ໃສ່ສາຍຮັດນິລະໄພ ນັ້ນເອງ.
ແນວໃດກໍດີ ອາດມີການນໍາໂຕຫຼອກສຽບສາຍຮັດນິລະໄພ ສຽບເພື່ອບໍ່ໃຫ້ສັນຍານເຕືອນດັງ ເພາະວາງຂອງໜັກໃນເບາະນັ່ງເຊິ່ງລະບົບຈະເຂົ້າໃຈວ່າ ມີຜູ້ໂດຍສານນັ່ງຂ້າງຄົນຂັບ ຍັງພໍສາມາດປະຕິບັດແບບນັ້ນໄດ້ ແຕ່ການວາງສິ່ງຂອງໃນລົດ ລວມທັງໃນຄອນໂຊນໜ້າ ໂດຍສະເພາະສິ່ງຂອງທີ່ແຂງ ຫຼື ມີນໍ້າໜັກອາດກໍ່ໃຫ້ເກີດການບາດເຈັບທີ່ຮຸນແຮງເມື່ອມີອຸບັດເຫດໄດ້ເຊັ່ນກັນ ຫາກເປັນໄປໄດ້ຄວນເກັບສິ່ງຂອງໃນທີ່ເໝາະສົມເຊັ່ນ ທ້າຍລົດ ໃຫ້ເປັນລະບຽບຈະປອດໄພກວ່າ.
