ວັນທີ 13 ກັນຍາ ນິ້. ກົງກັບມື້ແຮມ 13 ຄໍ່າເດືອນ 9 ລາວ,ເປັນມື້ຫ້າງຫາກະກຽມເຄື່ອງໄຊຍະທານຕ່າງໆໄວ້ ໃນບຸນຫໍ່ເຂົ້າປະດັບດິນ. ຕາມລາຍງານຂອງສື່ທ້ອງຖິ່ນ ໄດ້ລົງຕິດຕາມເບີ່ງບັນຍາກາດ ຢູ່ບັນດາຕະຫຼາດເທດສະບານເມືອງຫ້ວຍຊາຍ ແຂວງບໍ່ແກ້ວ.ແຕ່ເຊົ້າໆເຫັນວ່າມີປະຊາຊົນ ຊາວພຸດລາວບັນດາເຜົ່າ ແຂວງບໍ່ແກ້ວ ພາກັນຫຼັ່ງໄຫຼ ເຂົ້າສູ່ຕະຫຼາດຢ່າງຄັບຄາໜ້າແໜ້ນ. ເພື່ອຊອກຫາຊື້ ເຂົ້າຕົ້ມ,ເຂົ້າໜົມ,ດອກໄມ້,ໝາກໄມ້ສົດ ແລະ ເຄື່ອງໄຊຍະທານ ແລະ ອື່ນໆຕາມຄວາມຕ້ອງການ,ເພື່ອນໍາມາປຸງແຕ່ງອາຫານກະກຽມໄວ້ ເປັນຕົ້ນແມ່ນ ອາຫານຫວານຄາວ ເພື່ອກຽມເຮັດບຸນໃສ່ບາດ ຖວາຍໃຫ້ແກ່ພຣະສົງ ສາມະເນນ ອຸຸທິດຢາດນໍ້າຕາມປະເພນີ.
ພໍຮຸ່ງເຊົ້າຂອງວັນທີ 14 ກັນຍາ ກົງກັບມື້ແຮມ 15 ຄໍ່າ ເດືອນ 9 ດັບ, ຂອງທຸກໆປີ ເປັນມື້ຫໍ່ເຂົ້າປະດັບດິນ. ຊາວພຸດລາວທັງຫຼາຍ ກໍ່ຄື ສາສະນີກະຊົນຊາວພຸດ ໄດ້ຮ່ວມກັນມາທໍາບຸນໃສ່ບາດ ຢູ່ຕາມຫົວວັດຕ່າງໆຖວາຍສັງຄະທານໃຫ້ແກ່ພະສົງ ສາມາເນນ ແລະ ອຸທິດບຸນກຸສົນ ໄປໃຫ້ດວງວິນຍານ ຍາດມິດສະຫາຍ ຜູ້ທີ່ລ່ວງລັບໄປແລ້ວໃຫ້ມາຮັບເອົາເຄື່ອງທານ.
ນອກນັ້ນ,ຍັງໄດ້ນໍາເອົາເຂົ້າປາອາຫານ ເຂົ້າຕົ້ມ,ເຂົ້າໜົມ ໄປວາງໄວ້ຢູ່ຕາມດິນ, ຕາມຫຍ້າ,ຕາມເຫງົ້າໄມ້, ຕາມກໍາແພງວັດ,ທາດເຈດີ,ໜ້າເຮືອນຂອງຕົນ,ຕາມທາງ ແລະ ບ່ອນອື່ນໆ ;ຖືວ່າເປັນການສ້າງບຸນ ສ້າງກຸສົນໃຫ້ແກ່ຕົນເອງ,ຕາມຮີດຄອງປະເພນີອັນດີງາມ ແລະ ມີຄວາມເຊື່ອວ່າ ເປັນນິມິດໂຊກລາບ ໃຫ້ມີຄວາມສຸກ ຄວາມຈະເລີນ ແລະ ຢູ່ເຢັນເປັນສຸກ.
ບຸນຫໍ່ເຂົ້າປະດັບດິນມີຄວາມສໍາຄັນຫຼາຍ ໃນການເຮັດຄວາມດີ ເພື່ອຕອບແທນຄຸນແຜ່ນດິນ,ບັນພະບູລຸດ ແລະ ສັບພະສັດທັງຫຼາຍ ຕາມຄວາມເຊື່ອຖືມາແຕ່ຍາວນານ.
