ກອງທຶນລັດຖະບານໄດ້ຈັດຊື້ງົວຈຳນວນ 60 ໂຕໄປມອບ ໃຫ້ປະຊາຊົນ ບ້ານມະກາ ເມືອງນາກາຍ ແຂວງຄຳມ່ວນ 30 ຄອບຄົວ (ຄອບຄົວລະ 2 ໂຕ) ລວມມູນຄ່າ 480 ລ້ານກີບ ເພື່ອຕໍ່ຍອດເຮັດໃຫ້ພໍ່ແມ່ປະຊາຊົນນຳໄປຂະຫຍາຍພັນສ້າງເສດຖະກິດຄອບຄົວຕໍ່ໄປ.
ທ່ານ ພູວິໄລ ຫອມໜູຮັກ ຫົວໜ້າຫ້ອງການກະສິກຳ ແລະ ປ່າໄມ້ເມືອງນາກາຍ ໄດ້ລາຍງານວ່າ: ບ້ານມະກາ ແມ່ນໜຶ່ງໃນ 4 ບ້ານ ທີ່ນອນຢູ່ໃນເປົ້າໝາຍຂອງໂຄງການ ຕັ້ງຢູ່ເຂດພູດອຍ ແລະ ນອນຢູ່ໃນຂອບເຂດປ່າສະຫງວນແຫ່ງຊາດ ນາກາຍນໍ້າເທີນ ຫລື ເຂດປົກປັກຮັກສາ, ອະນຸລັກ ແລະ ພັດທະນາແຫລ່ງນໍ້າ ນໍ້າເທີນ 2, ລວມມີ 90 ຄອບຄົວ, ເຊິ່ງກອງທຶນລັດຖະບານ ຈະໄດ້ປ່ອຍທຶນເປັນສັດລ້ຽງ ປະເພດ ງົວ ລວມທັງໝົດ 60 ໂຕ ໃຫ້ 30 ຄອບຄົວ, ຄອບຄົວລະ 2 ໂຕ, ໂດຍມີກຳນົດເວລາການລ້ຽງ 5 ປີ ເຊິ່ງພາຍຫລັງລ້ຽງຄົບຕາມກຳນົດແມ່ນ ຈະໄດ້ເກັບຕົ້ນທຶນ ແລະ ດອກເບ້ຍ (ກອງທຶນຈະໄດ້ເກັບຄືນ ງົວ 2 ໂຕທີ່ເປັນຕົ້ນທຶນ ແລະ ອີກ 1 ໂຕທີ່ເປັນດອກເບ້ຍ ລວມເປັນ 3 ໂຕ) ເພື່ອເປັນກອງທຶນຂະຫຍາຍໃນບ້ານຕໍ່ໆໄປ.
ໂອກາດດຽວກັນ, ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ໄດ້ໂອ້ລົມຕໍ່ອຳນາດການປົກຄອງ ແລະ ພໍ່ແມ່ປະຊາຊົນ ບ້ານມະກາ ກ່ຽວກັບການດຳລົງຊີວິດ, ການທຳມາຫາກິນຂອງພໍ່ແມ່ປະຊາຊົນ. ເນື່ອງຈາກບ້ານມະກາ ແມ່ນຕັ້ງຢູ່ເຂດຍອດນໍ້າ ຫ່າງໄກສອກຫລີກ ການເດີນທາງເຂົ້າ-ອອກ ຍັງມີຄວາມຫຍຸ້ງຍາກ, ພື້ນຖານໂຄງລ່າງດ້ານຕ່າງໆ ຍັງບໍ່ໄດ້ຮັບການພັດທະນາ, ການດຳລົງຊີວິດຂອງພໍ່ແມ່ປະຊາຊົນ ກໍຍັງມີຄວາມຫລ້າຫລັງ ຖ້າທຽບໃສ່ເຂດອື່ນໆ.
ສະນັ້ນ, ເພື່ອເຮັດໃຫ້ປະຊາຊົນມີຢູ່ມີກິນ ແລະ ຊີວິດການເປັນຢູ່ໄດ້ຮັບການພັດທະນາດີຂຶ້ນ ຄະນະພັກ, ອຳນາດການປົກຄອງບ້ານ ຕ້ອງໄດ້ເພີ່ມທະວີໃນການສຶກສາອົບຮົມ, ນຳພາພໍ່ແມ່ປະຊາຊົນສ້າງສາ ແລະ ທຳມາຫາກິນດ້ວຍຄວາມດຸໝັ່ນ, ອົດທົນບົນຄວາມຖືກຕ້ອງຕາມລະບຽບກົດໝາຍ, ມີຄວາມສາມັກຊ່ວຍເຫລືອເຊິ່ງກັນ ແລະ ກັນ, ພ້ອມພາກັນແກ້ໄຂບັນຫາທີ່ຍັງເປັນສິ່ງທ້າທາຍ ແລະ ກົດໜ່ວງຖ່ວງດຶງ ຕໍ່ການພັດທະນາຊີວິດການເປັນຢູ່ຂອງປະຊາຊົນ. ພ້ອມທັງເນັ້ນໃຫ້ຄອບຄົບຂອງພໍ່ແມ່ປະຊາຊົນ ທີ່ໄດ້ຮັບກອງທຶນງົວ ແມ່ນໃຫ້ເອົາໃຈໃສ່ລ້ຽງດູ, ຄຸ້ມຄອງ ແລະ ເບິ່ງແຍງງົວທີ່ໄດ້ຮັບຄັ້ງນີ້ໃຫ້ດີ ເພື່ອໃຫ້ສາມາດແຜ່ຂະຫຍາຍ ເປັນທຶນຮອນທີ່ໝັ້ນຄົງຕໍ່ໄປ.
ຂ່າວ-ພາບ: ກອງຄຳ
