ເຊື່ອວ່າຫຼາຍໆຄົນບໍ່ຢາກເຖົ້າກ່ອນໄວອັນຄວນ ແລະ ຫຼາຍຄົນກໍ່ຫາສາລະພັດວິທີເພື່ອທີ່ຈະມາຊະລໍຄວາມແກ່ ແຕ່ພັດລືມໄປວ່າການດູແລຮັກສາຕົວນັ້ນເປັນສິ່ງທີ່ສໍາຄັນທີ່ສຸດ. ເຖິງວ່າເຮົາຈະໃຊ້ຄີມລາຄາແພງ ກິນຢາເພື່ອຄວາມງາມ ແຕ່ທັງໝົດເຫຼົ່ານັ້ນກໍ່ບໍ່ມີຄວາມໝາຍເມື່ອທ່ານບໍ່ຮັກຕົນເອງ ເປັນຕົ້ນແມ່ນພັກຜ່ອນບໍ່ພຽງພໍ, ກິນອາຫານບໍ່ຖືກວິທີ ແລະ ອື່ນໆ. ດັ່ງນັ້ນ, ຈຶ່ງຈະມາບອກ 5 ເຄັດລັບງ່າຍໆກັບການຊະລໍ ຄວາມແກ່.
ກ່ອນອື່ນເຮົາຈະໄປທໍາ ຄວາມຮູ້ຈັກກັບຄໍາວ່າ ‘ສານອະນຸມູນອິດສະຫຼະ’ ແມ່ນຫຍັງ?
ສານອະນຸມູນອິດສະຫຼະຄືຕົວທໍາລາຍພູມຄຸ້ມກັນ ແລະ ຈຸລັງຕ່າງໆ ເຊິ່ງກໍ່ໃຫ້ເກີດການເສື່ອມຖອຍຂອງຮ່າງກາຍ ເຊິ່ງສະແດງອອກມາໃນຮູບແບບ ຂອງຮອຍຫ່ຽວເປັນຕົ້ນແມ່ນຮອຍຕີນກາທີ່ແກ່ກ່ອນໄວ ແລະ ໂລກຄວາມເສື່ອມຂອງອະໄວຍະວະຕ່າງໆ ເຊິ່ງໜັກທີ່ສຸດແມ່ນການກໍ່ຕົວເປັນຈຸລັງມະເຮັງນັ້ນເອງ.
ເມື່ອຮຽນຮູ້ວ່າອະນຸມູນອິດສະຫຼະແມ່ນຫຍັງແລ້ວ ເຮົາກໍມາຮູ້ວິທີການດູແລຕົວເອງແບບງ່າຍໆທີ່ໃຜໆກໍ່ເຮັດໄດ້ມີ 5ວີທີດັ່ງນີ້:
- ກິດຈະກໍາຕ່າງໆໃນຊີວິດປະຈໍາວັນ ເປັນຕົ້ນແມ່ນການອອກກໍາລັງກາຍເປັນຕົວຊ່ວຍທີ່ດີໃນການຕ້ານອະນຸມູນອິດສະຫຼະ ແຕ່ຖ້າວ່າຫຼິ້ນຫັກໂຫມຫຼາຍເກີນໄປຈະເຮັດໃຫ້ເກີດຜົນກົງກັນຂ້າມຕໍ່ສຸຂະພາບ. ສະນັ້ນ, ຄວນຫຼີກລ່ຽງການອອກກໍາລັງກາຍທີ່ຫັກໂຫມຕໍ່ກັບຮ່າງກາຍຈົນເກີນໄປ ເປັນຕົ້ນແມ່ນການຍົກນໍ້າໜັກທີ່ເກີນຄວາມສາມາດຂອງຮ່າງກາຍ.
- ຫຼີກລ່ຽງອາຫານທີ່ມີໄຂມັນສູງ ແລະ ອາຫານທີ່ກໍ່ໃຫ້ເກີດການເຜົາຜານພະລັງງານຫຼາຍເຊັ່ນ: ຂອງຈືນ, ອາຫານທີ່ຈັດຢູ່ໃນກຸ່ມໄຂມັນຊະນິດອີ່ມຕົວ, ແປ້ງ ແລະ ອາຫານທີ່ໃຫ້ທາດໂປຣຕີນໃນລະດັບສູງ ຫຼື ອາຫານທີ່ໃຫ້ອະນຸມູນອິດສະຫຼະລະດັບສູງເຊັ່ນ: ຂອງປີ້ງທີ່ມັນໆ ຫຼື ເຄື່ອງດື່ມແອລກໍຮໍເປັນຕົ້ນ.
- ຫຼີກລ່ຽງມົນລະພາວະ ແລະ ເຄມີ ນອກຈາກມົນລະພິດທາງອາກາດເຊັ່ນ: ກາສຄາບອນໄດອອກຊາຍ ທີ່ຫາຍໃຈເຂົ້າໄປເປັນຕົ້ນແມ່ນຄວັນຢາສູບ, ຄວັນໄຟ. ນອກນັ້ນ ຍັງຕ້ອງຫຼີກລ່ຽງສານເຄມີທີ່ປະປົນຢູ່ກັບອາຫານເຊັ່ນ ຢາປາບສັດຕູພືດ ແປ້ງນົວ ສີສັງເຄາະ ເຊິ່ງສານເຫຼົ່ານີ້ຈະໄປເພີ່ມອະນຸມູນອິດສະຫຼະໃຫ້ແກ່ຮ່າງກາຍໃນລະດັບສູງ.
- ເວົ້າເຖິງເລື່ອງຄວາມຄຽດ ເຊິ່ງເກີດຈາກສະພາວະກົດດັນທາງສະໝອງ ແລະ ສະໝອງນັ້ນເອງເປັນອະໄວຍະວະທີ່ຜະລິດອະນຸມູນອິດສະຫຼະສູງ ເນື່ອງຈາກການເຮັດວຽກ ແລະ ມີການເຜົາຜານພະລັງງານຫຼາຍເມື່ອເກີດຄວາມຄຽດໃນຮ່າງກາຍຈະລັ່ງສານເຄມີບໍລິເວນສະໝອງທີ່ກ່ຽວກັບອາລົມ ຄວາມຮູ້ສຶກ ເຊິ່ງເຮັດໃຫ້ເກີດສານອະນຸມູນອິດສະຫຼະເພີ່ມຫຼາຍຂຶ້ນ. ສະນັ້ນ, ການຫຼຸດຜ່ອນຄວາມຄຽດດ້ວຍການນັ່ງສະມາທິອາດເປັນທາງເລືອກໜຶ່ງໃນການຕ້ານອະນຸມູນອິດສະຫຼະ
- ການພັກຜ່ອນ ຫຼືການນອນຫຼັບບໍ່ພຽງພໍເປັນອີກສາເຫດທີ່ກໍ່ໃຫ້ເກີດອະນຸມູນອິດສະຫຼະ ເພາະການນອນຫຼັບຈະຊ່ວຍໃຫ້ອະໄວຍະວະສ່ວນ ໃຫຍ່ໄດ້ຢຸດພັກ ແລະ ຊ່ວຍໃຫ້ອະໄວຍະວະທີ່ຕ້ອງເຮັດວຽກຕະຫຼອດເວລາເຊັ່ນ: ຫົວໃຈ, ປອດ ແລະ ສະໝອງໄດ້ໃຊ້ພະລັງງານໜ້ອຍລົງ ເຊິ່ງເປັນການຫຼຸດອະນຸມູນອິດສະຫຼະໄດ້ອີກທາງໜຶ່ງ. ດັ່ງນັ້ນ, ການພັກຜ່ອນໜ້ອຍ ຮ່າງກາຍຈຶ່ງຕ້ອງເຮັດວຽກຢ່າງໜັກເພື່ອຜະລິດພະລັງງານ ແລະ ເຮັດໃຫ້ເກີດອະນຸມູນອິດສະຫຼະເພີ່ມຂຶ້ນ.
ຂໍ້ມູນຈາກ: sirirad
