ພະແນກສຶກສາທິການ ແລະ ກິລາ ແຂວງຫຼວງພະບາງ, ໂຮງຮຽນມັດທະຍົມສົມບູນສັນຕິພາບ ແລະ ອົງການ ສາມັກຄີກັບປະຊາຊາດອາຊິຜູ້ດ້ອຍໂອກາດ (CSA) ປະເທດຍີ່ປຸ່ນ ໄດ້ຈັດພິທີຮ່ວມລົງນາມເຊັນບົດບັນທຶກຄວາມເຂົ້າໃຈກ່ຽວກັບການໃຫ້ທຶນຊ່ວຍເຫຼືອນັກຮຽນຫໍພັກ ໂຮງຮຽນມັດທະຍົມສົມບູນສັນຕິພາບ.
ພິທີລົງນາມດັ່ງກ່າວໄດ້ມີຂື້ນເມື່ອວັນທີ 15 ພຶດສະພາ 2024 ນີ້, ທີ່ພະແນກສຶກສາທິການ ແລະ ກິລາແຂວງ ໂດຍການເປັນກຽດຮ່ວມລົງນາມຂອງທ່ານ ປອ ວົງເພັດ ອຸດົມລິດ ສະມາຊິກສະພາແຫ່ງຊາດ ຫົວໜ້າພະແນກສຶກສາທິການ ແລະ ກິລາແຂວງ, ທ່ານ ສູນທອນ ແກ້ວສະຫວັນ ອຳນວຍການໂຮງຮຽນມັດທະຍົມສົມບູນສັນຕິພາບ, ທ່ານ Takaaki Yamazaki ອົງການສາມັກຄີກັບປະຊາຊາດອາຊິຜູ້ດ້ອຍໂອກາດ (CSA) ປະເທດຍີ່ປຸ່ນ, ມີທ່ານ ຫົວໜ້າ-ຮອງຫົວໜ້າຂະແໜງ, ສູນ ພະນັກງານວິຊາການດ່ຽວຂ້ອງເຂົ້າຮ່ວມ.
ທັງສາມພາກສ່ວນ ແມ່ນມີຄວາມເຂົ້າໃຈແຈ້ງ ຕໍ່ກັບຄວາມສໍາຄັນຂອງການສຶກສາສໍາລັບໄວໜຸ່ມ ເຊິ່ງເປັນອະນາຄົດຂອງຊາດ ຈຶ່ງມີການຄົ້ນຄວ້າພິຈາລະນາ ກ່ຽວກັບຄວາມມຈຳເປັນ ໃນການຂະຫຍາຍໂອກາດທາງດ້ານການສຶກສາ ໃຫ້ນ້ອງນັກຮຽນ ທີ່ມາຈາກເຂດຊົນນະບົດ ແລະ ເຂດ ຫ່າງໄກສອກຫຼີກໃນເຂດພາກເໜືອຂອງ ສປປ ລາວ ເພື່ອຂະຫຍາຍໂອກາດທາງ ດ້ານການສຶກສາໃຫ້ແກ່ເຂົາເຈົ້າ, ກະຊວງສຶກສາທິການ ແລະ ກິລາ ຈະເປັນຜູ້ຄັດເລືອກເອົານັກຮຽນ ເພື່ອເຂົ້າຮ່ວມໂຄງການໃນແຕ່ລະປີ, ອົງການ CSA ປະເທດຍີ່ປຸ່ນຈະເປັນຝ່າຍຮັບຜິດຊອບ ທາງດ້ານງົບປະມານການເງິນ ເພື່ອຮັບໃຊ້ສໍາລັບຄ່າໃຊ້ຈ່າຍຕ່າງໆ, ຄ່າໃຊ້ຈ່າຍໃນການເດີນທາງຈາກບ້ານຢູ່ຂອງນັກຮຽນເຖິງທີ່ພັກ ມສ ສັນຕິພາບ ສໍາລັບນັກຮຽນໂດຍຈ່າຍໃຫ້ ປີລະ 1 ຄັ້ງ.
ນອກຈາກນີ້, ທາງຄະນະຮັບຜິດຊອບທຸກພາກສ່ວນຍັງໄດ້ຮ່ວມກັນຕິດຕາມການກໍ່ສ້າງໂຮງຮຽນມັດທະຍົມສົມບູນບ້ານຫາດປາງເມືອງປາກອູ ທີ່ທາງອົງການສາມັກຄີກັບປະຊາຊາດອາຊີຜູ້ດ້ອຍໂອກາດ (CSA) ປະເທດຍີ່ປຸ່ນໄດ້ໃຫ້ທຶນການຊ່ວຍເຫຼືອການກໍ່ສ້າງອາຄານຮຽນຫຼັງໃໝ່.
ຂ່າວຈາກ: ມສ ສັນຕິພາບ
