ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງຄຳມ່ວນ ຂອງທ່ານ ບຸນທອງ ຈິດມະນີ ຮອງປະທານປະເທດ ໃນວັນທີ 28 ສິງຫາ 2023 ທີ່ຜ່ານມານີ້, ໂດຍມີ ທ່ານ ວັນໄຊ ພອງສະຫວັນ ເຈົ້າແຂວງ ຄໍາມ່ວນ ແລະ ບັນດາການນໍາຂັ້ນແຂວງ, ການນໍາເມືອງທ່າແຂກ ໄດ້ໃຫ້ການຕ້ອນຮັບ.
ໃນໂອກາດດັ່ງກ່າວ ທ່ານຮອງປະທານປະເທດ ໄດ້ມີຄຳເຫັນ ຕໍ່ການພັດທະນາ ຕົວເມືອງທ່າແຂກ ໂດຍໄດ້ແນະນໍາໃຫ້ຄະນະການນໍາຂັ້ນເມືອງ ຈົ່ງໄດ້ເປັນເຈົ້າການເອົາໃຈໃສ່ ສືບຕໍ່ໃນການພັດທະນາ ໃຫ້ສົມກັບວ່າ ເມືອງທ່າແຂກ ເປັນເມືອງໃຈກາງທາງດ້ານເສດຖະກິດ, ວັດທະນະທໍາ-ສັງຄົມ, ສ້າງຕົວເມືອງໃຫ້ມີຄວາມສະອາດຈົບງາມ ແລະ ເປັນເມືອງໜ້າຢູ່, ສ້າງຂະບວນການຕ້ອນຮັບວັນສໍາຄັນຕ່າງໆ ຂອງຊາດຂອງພັກ.
ພ້ອມນີ້, ທ່ານຍັງໄດ້ເນັ້ນ ໃຫ້ເອົາໃຈໃສ່ ໃນວຽກງານຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ການແກ້ໄຂບັນຫາປະກົດການຫຍໍ້ທໍ້ຕ່າງໆ ໃນສັງຄົມ, ລວມເຖິງຕິດຕາມສະພາບບັນຫາຂອງບຸກຄົນທີ່ບໍ່ຫວັງດີ ໃຊ້ເລ່ຫລ່ຽມກົນອຸບາຍ ຕໍ່ຕ້ານແນວທາງນະໂຍບາຍ ຂອງພັກ-ລັດ; ສ່ວນດ້ານເສດຖະກິດ ກໍສືບຕໍ່ຊຸກຍູ້ສົ່ງເສີມການຜະລິດກະສິກໍາ ດ້ວຍການປູກ-ການລ້ຽງ, ສ້າງທ່າແຮງພັດທະນາ ໃຫ້ສາມາດກຸ້ມຕົນເອງ ເພື່ອແກ້ໄຂຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ. ຄຽງຄູ່ກັນນັ້ນ, ເຂດເສດຖະກິດສະເພາະທ່າແຂກ ກໍໃຫ້ສົ່ງເສີມໂຄງການລົງທຶນຕ່າງໆ ໃຫ້ກາຍເປັນທ່າແຮງໃນການພັດທະນາທາງດ້ານເສດຖະກິດທີ່ແທ້ຈິງ.
ພ້ອມກັນນີ້, ກໍຕ້ອງໄດ້ກະກຽມກອງປະຊຸມໃຫຍ່ຂັ້ນເມືອງ ແລະ ຂັ້ນຮາກຖານ, ພ້ອມກັນເອົາໃຈໃສ່ປະຕິບັດຄາດໝາຍທີ່ກອງປະຊຸມໃຫຍ່ວາງອອກ, ເລັ່ງປັບປຸງຄະນະພັກຮາກຖານຂັ້ນບ້ານ, ຕິດພັນກັບການລົງຮາກຖານ, ດ້ານວຽກງານການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ກໍຕ້ອງສ້າງໃຫ້ໄດ້ຕາມລະບຽບຫລັກການ ຢ່າງມີຄຸນນະພາບ. ນອກນັ້ນ, ທ່ານຍັງແນະນໍາໃຫ້ສືບຕໍ່ເຝົ້າລະວັງກ່ຽວກັບສະພາບບັນຫາໄພພິບັດ ແລະ ປ້ອງກັນການລະບາດຂອງພະຍາດ ທີ່ເກີດຂື້ນຕາມລະດູການອີກດ້ວຍ.
ໂດຍ: ຂ່າວສານຄຳມ່ວນ
