ແຂວງເຊກອງເປັນແຂວງໜຶ່ງທີ່ບໍ່ມີໜ່ວຍງານກູ້ໄພສຸກເສີນ ເຊິ່ງເຮັດໃຫ້ມີຄວາມຫຍຸ້ງຍາກເມື່ອເກີດມີເຫດການສຸກເສີນຕ່າງໆຂຶ້ນ. ດັ່ງນັ້ນ, ເມື່ອເລັງເຫັນບັນຫາດັ່ງກ່າວ ບໍລິສັດ ວັງຕັດ ຂຸດຄົ້ນບໍ່ແຮ່ ຈຶ່ງໄດ້ສະເໜີການນໍາຂັ້ນແຂວງເພື່ອເປີດໜ່ວຍງານກູ້ໄພສຸກເສີນ ເພື່ອຮັບໃຊ້ສັງຄົມຂຶ້ນ, ເຊິ່ງໃນວັນທີ 26 ສິງຫາ 2023 ທີ່ຜ່ານມາ ທີ່ຫ້ອງການ ບໍລິສັດ ດາກຈຶງສໍາຫຼວດບໍ່ແຮ່ ປະຈໍາແຂວງເຊກອງ ໄດ້ມີພິທີ ເປີດໃຫ້ບໍລິການ ມູນນິທິພຣະໄຊຍ໌ ກູ້ໄພສຸກເສີນ ເພື່ອຊ່ວຍເຫຼືອສັງຄົມຂຶ້ນ, ໂດຍມີ ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີ ທ່ານນາງ ມະໂນລາ ສຸດທິຈັກ ຫົວໜ້າອົງການກາແດງ ແຂວງເຊກອງ ໃຫ້ຮູ້ວ່າ: ມູນນິທິ ພຣະໄຊຍ໌ ກູ້ໄພສຸກເສີນ ແຂວງເຊກອງ ເປັນໜ່ວຍງານໜຶ່ງທີ່ເຄື່ອນໄຫວຕາມພາລະບົດບາດ ແລະ ກົດໝາຍວ່າດ້ວຍກາແດງລາວວາງອອກ, ມີອາສາສະຫມັກກູ້ໄພ 7 ຄົນ, ມີລົດກູ້ໄພ 1 ຄັນ, ມີອຸປະກອນຮັບໃຊ້ວຽກງານປະຖົມພະຍາບານກູ້ໄພສຸກເສີນຄົບຊຸດ, ມີສໍານັກງານຕັ້ງຢູ່ ບ້ານໃຫມ່ຫົວເມືອງ ເມືອງລະມາມ, ເຊິ່ງສ້າງຕັ້ງຂຶ້ນເພື່ອຮັບໃຊ້ສັງຄົມ.
ເຮັດໜ້າທີ່ ໃນການຮັບສົ່ງຄົນເຈັບສຸກເສີນ, ຊ່ວຍກູ້ໄພຜູ້ຖືກເຄາະຮ້າຍຈາກເຫດການສຸກເສີນ ແລະ ໄພພິບັດຕ່າງໆ, ຄົ້ນຫາຜູ້ຖືກບາດເຈັບ, ໃຫ້ການປະຖົມພະຍາບານ ແລະ ນຳສົ່ງໄປສະຖານທີ່ບໍລິການສາທາລະນະສຸກ. ພ້ອມກັນນັ້ນກໍເພື່ອ ເຝົ້າລະວັງ ແລະ ໃຫ້ບໍລິການຄົນເຈັບສຸກເສີນໃນກິດຈະກຳຕ່າງໆ, ໃຫ້ການບໍລິການຮັບ-ສົ່ງຄົນເຈັບ, ຊ່ວຍໂຄສະນາປູກຈິດສໍານຶກການຂັບຂີ່ປອດໄພ, ໃຫ້ຄວາມຮູ້ໃນການກັນພະຍາດ ແລະ ຄວບຄຸມການແຜ່ລະບາດຂອງພະຍາດ, ປະກອບສ່ວນຊ່ວຍເຫຼືອສັງຄົມ ແລະ ອື່ນໆ.
ໂອກາດດັ່ງກ່າວ ທ່ານ ເຫຼັກໄຫຼ ສີວິໄລ ໄດ້ເນັ້ນໃຫ້ມູນນິທິ ພຣະໄຊຍ໌ ກູ້ໄພສຸກເສີນ ຕ້ອງເຮັດການບໍລິການຮັບໃຊ້ສັງຄົມຢ່າງເປັນມືອາຊີບ, ມີຫຼັກວິທະຍາສາດ ແລະ ມີຫຼັກວິຊາການຢ່າງແທ້ຈິງ ເພື່ອໃຫ້ທັນກັບສະພາບການປ່ຽນແປງຕ່າງໆຕະຫຼອດເວລາ, ຕ້ອງເຂັ້ມງວດ ໃນການປະຕິບັດພາລະບົດບາດ ແລະ ໜ້າທີ່ຂອງຕົນ ໃນຖານະເປັນຜູ້ກອບກູ້-ຊ່ວຍເຫຼືອສັງຄົມ, ຕ້ອງເອົາໃຈໃສ່ເຮັດການບໍລິການໃຫ້ມີຄວາມສະດວກວ່ອງໄວ.
ໂດຍ: ຂ່າວເຊກອງ
