ໃນໂອກາດທີ່ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ພ້ອມດ້ວຍທ່ານຫົວໜ້າຫ້ອງວ່າການແຂວງ ເດີນທາງເຄື່ອນໄຫວເຮັດວຽກຢູ່ ເມືອງຄູນຄໍາ ໃນວັນທີ 26 ສິງຫາ 2023 ທີ່ຜ່ານມາ, ໂອກາດດັ່ງກ່າວ ທ່ານໄດ້ເຄື່ອນໄຫວຕິດຕາມ ການຈັດຕັ້ງປະຕິບັດການກໍ່ສ້າງຕິດຕັ້ງລະບົບຕາຂ່າຍ 22 ກິໂລໂວນ ແຕ່ ບ້ານນາພົງ ເມືອງປາກກະດິງ ຫາ ບ້ານຄູນເງິນ ເມືອງຄູນຄໍາ ເພື່ອສະໜອງໄຟຟ້າໃຫ້ເຂດເມືອງຄູນຄໍາ ໄດ້ຊົມໃຊ້.
ເນື່ອງຈາກລະບົບຕາຂ່າຍເກົ່າ ຖືກໄພທຳມະຊາດ ດິນເຈື່ອນທັບຖົມ ທີ່ເກີດຂຶ້ນໃນຄັ້ງວັນທີ 3 ສິງຫາ 2023 ເຮັດໃຫ້ແລວຕາຂ່າຍ 22 ກິໂລໂວນ ແຕ່ສະຖານີ ທ່າສາລາ ເມືອງຄໍາເກີດ ຫາ ເມືອງຄູນຄຳ ໄລຍະທາງ 7.580 ແມັດ ບໍ່ສາມາດສົ່ງໄຟຟ້າໄດ້ ຈົນຮອດປະຈຸບັນ.
ສະນັ້ນ, ເພື່ອເປັນການປັບປຸງຟື້ນຟູຕໍ່ສະພາບຜົນກະທົບດັ່ງກ່າວໃຫ້ເຂົ້າສູ່ສະພາບປົກກະຕິໂດຍໄວ, ເຮັດໃຫ້ການສະໜອງໄຟຟ້າ ແກ່ປະຊາຊົນເຂດ ເມືອງຄູນຄໍາ ໄດ້ຊົມໃຊ້ຢ່າງທົ່ວເຖິງ, ສາຂາ ລັດວິສາຫະກິດໄຟຟ້າລາວ ແຂວງຄຳມ່ວນ ໄດ້ປະສານກັບ ຝ່າຍຄຸ້ມຄອງລະບົບໄຟຟ້າພາກໃຕ້ ກ່ຽວກັບວຽກງານການກໍ່ສ້າງຕາຂ່າຍ 22 ກິໂລໂວນ ເຊື່ອມຕໍ່ ລະຫວ່າງ ບ້ານນາພົງ ເມືອງປາກກະດິງ ແຂວງບໍລິຄໍາໄຊ ຫາ ບ້ານຄູນເງິນ ເມືອງຄູນຄຳ ແຂວງຄຳມ່ວນ. ເຊິ່ງມີລວງຍາວທັງໝົດ 9.220 ແມັດ, ຄິດເປັນມູນຄ່າໃນການກໍ່ສ້າງທັງໝົດເປັນຈຳນວນເງິນ 3 ຕື້ກວ່າກີບ.
ໂດຍໄດ້ເລີ່ມລົງມືຈັດຕັ້ງປະຕິບັດ ນັບແຕ່ວັນທີ 20 ສິງຫາ 2023 ເປັນຕົ້ນມາ, ປະຈຸບັນ ແມ່ນກໍາລັງເລັ່ງປະຕິບັດຢ່າງຮີບດ່ວນ ເພື່ອໃຫ້ພໍ່ແມ່ປະຊາຊົນເຂດເມືອງ ຄູນຄໍາ ໄດ້ຊົມໃຊ້ໄຟຟ້າໃຫ້ໄວທີ່ສຸດ ຄາດວ່າຈະໃຫ້ສໍາເລັດ ແລະ ເປີດການນໍາໃຊ້ໃນຕົ້ນ ເດືອນກັນຍາ 2023 ນີ້.
ໂດຍ: ຂ່າວສານຄຳມ່ວນ
