ມີນ້ອງໆຫຼາຍຄົນ ຫຼັງຈາກຮຽນຈົບມາ ເວລາຈະໄປສຳພາດວຽກໃດໜຶ່ງ ແລ້ວຮູ້ສຶກກັງວົນວ່າຈະພົບກັບຄຳຖາມແບບໃດແດ່? ຈະຕອບໄດ້ບໍ່? ຖ້າກຳລັງພົບບັນຫານີ້ຢູ່ ມື້ນີ້ຂໍນຳເອົາຂໍ້ມູນຈາກ job fest ເຊິ່ງມີ 9 ຄຳຖາມສຳພາດວຽກຍອດນິຍົມທີ່ທຸກຄົນຕ້ອງພົບ ຄື:
1 ຊ່ວຍແນະນຳຕົວເອງໃຫ້ຟັງແດ່
ແນວທາງຕອບແບບນັກສຶກສາຈົບໃໝ່ ແນະນຳຊື່ ແລະ ນາມສະກຸນ, ຄະນະວິຊາ, ສາຂາ ແລະ ສະຖາບັນການສຶກສາທີ່ຮຽນຈົບ. ຈາກນັ້ນ, ໃຫ້ເລົ່າກ່ຽວກັບປະສົບການກ່ຽວກັບການເຮັດວຽກໃນລະຫວ່າງຮຽນ ຕົວຢ່າງເຊັ່ນ: ໃນວຽກທີ່ເຮັດແມ່ນເຮັດຫຍັງ? ພົບອຸປະສັກອັນໃດແດ່? ວິທີການແກ້ໄຂບັນຫາ ແລະ ປະສົບການທີ່ໄດ້ຮັບຈາກການເຮັດວຽກນັ້ນຈະນໍາໃຊ້ໃນການສະໝັກວຽກນີ້ແນວໃດ?.
ແນວທາງຕອບແບບຄົນມີປະສົບການຫຼາຍຄົນທີ່ເຮັດວຽກແລ້ວ ອາດຈະຜ່ານການສໍາພາດວຽກມາຫຼາຍ ແຕ່ພຽງຄຳຖາມງ່າຍໆກໍສາມາດພາດໄດ້ ຖ້າແນະນໍາຕົວເອງໜ້ອຍເກີນໄປ, ເຈົ້າຈະບໍ່ສາມາດສະແດງຈຸດແຂງ ແລະ ຈຸດອ່ອນຂອງເຈົ້າໄດ້ ຫຼື ຖ້າເຈົ້າບອກຫຼາຍເກີນໄປມັນຍັງສາມາດສົ່ງຜົນກະທົບທາງລົບໄດ້. ວິທີທີ່ດີທີ່ສຸດແມ່ນການແນະນໍາຕົວເອງຢ່າງພໍດີ ພຽງແຕ່ຊື່ ແລະ ນາມສະກຸນ ຕຳແໜ່ງວຽກປັດຈຸບັນ ຫຼື ຕຳແໜ່ງກ່ອນໜ້າ ບອກກ່ຽວກັບວຽກງານທີ່ປະສົບຜົນສໍາເລັດ ມີລາຍລະອຽດ ແລະ ຄວາມຮັບຜິດຊອບ ລວມທັງປະສົບການທີ່ມີ ມັນສາມາດປັບຕົວເຂົ້າກັບຕໍາແໜ່ງທີ່ກໍາລັງສໍາພາດໄດ້ແນວໃດ?.
2 ມີເປົ້າໝາຍໃນອາຊີບແນວໃດ? ເປົ້າໝາຍໄລຍະສັ້ນ:
ອາດຈະເປັນເປົ້າໝາຍໃນອີກ 1 – 2 ປີຂ້າງໜ້າ ເຊິ່ງເປັນເປົ້າໝາຍທີ່ເຮົາຄວນຕັ້ງເປັນຈຸດເລັກໆນ້ອຍໆກ່ອນທີ່ຈະບັນລຸເປົ້າໝາຍໄລຍະຍາວ ເຊິ່ງເປົ້າໝາຍນີ້ອາດຈະຕັ້ງເປົ້າໝາຍໃນດ້ານການຮຽນ ເຊັ່ນ: ນັກສຶກສາທີ່ຮຽນຈົບໃໝ່ ມຸ່ງເປົ້າໝາຍທີ່ຈະຮຽນຮູ້ວຽກງານ ແລະ ໜ້າທີ່ທີ່ໄດ້ຮັບມອບໝາຍໃຫ້ຢ່າງຄ່ອງແຄ້ວ. ໃນຂະນະທີ່ຜູ້ທີ່ມີປະສົບການທີ່ມີຄວາມຊໍານິຊໍານານ ແລະ ສາມາດປະຕິບັດຄວາມຮັບຜິດຊອບຂອງເຂົາເຈົ້າອາດຈະມຸ່ງໄປສູ່ສິ່ງທ້າທາຍໃໝ່, ເຄື່ອງມືການຮຽນຮູ້ ຫຼື ໂຄງການໃໝ່ທີ່ພວກເຂົາຕ້ອງການເຮັດ.
3 ເຈົ້າຄິດວ່າຄວາມທ້າທາຍໃນການເຮັດວຽກມີຫຍັງແດ່?
ຄຳຖາມນີ້ເກີດຂຶ້ນເພື່ອຢາກຮູ້ວ່າເຮົາມັກເຮັດວຽກແບບໃດ ບາງຄົນມັກວຽກທີ່ເປັນລະບົບ ຫຼື ວຽກປະຈຳ, ບາງຄົນກໍມັກວຽກທີ່ຕ້ອງການການປະດິດສ້າງ ເຊິ່ງວຽກທັງສອງມີຂໍ້ດີ ແລະ ຂໍ້ເສຍ ອີງຕາມຕໍາແໜ່ງວຽກ ແລະ ຄວາມຮັບຜິດຊອບທີ່ເຮົາຮັບຜິດຊອບ ເຊັ່ນ: ຖ້າເຮົາສະໝັກວຽກທີ່ສ້າງສັນ ຫຼື ວຽກທີ່ຕ້ອງການຄວາມຄິດສ້າງສັນ, ຄວາມຕ້ອງການທີ່ເປັນວຽກປະຈຳອາດຈະບໍ່ກົງກັບຕໍາແໜ່ງນີ້ ແລະ ເຮັດໃຫ້ພວກເຮົາພາດຈຸດໃນການສໍາພາດວຽກ.
4 ເຈົ້າມີເປົ້າໝາຍໃນອາຊີບຂອງຕົວເອງແນວໃດ?
ເປັນຄຳຖາມຍອດນິຍົມອີກຢ່າງໜຶ່ງ ທີ່ບັນດາອົງກອນຕ້ອງຖາມເພື່ອຮັບປະກັນວ່າ ເມື່ອເຂົາເຈົ້າຮັບເຂົ້າເຮັດວຽກ ຈະບໍ່ມີການລາອອກໃນໄວໆນີ້ ແລະ ມັນຍັງເປັນການກວດສອບວ່າ ເປົ້າໝາຍຂອງພວກເຮົາສອດຄ່ອງກັບບໍລິສັດໄດ້ ຫຼື ບໍ່. ຄໍາຕອບໃນອະນາຄົດອາດຈະເປັນອີກປັດໄຈໜຶ່ງທີ່ອົງກອນຈະໃຊ້ພິຈາລະນາຮັບເອົາພວກເຮົາເຂົ້າເຮັດວຽກເຊັ່ນກັນ.
5 ສິ່ງທີ່ເຈົ້າສົນໃຈກ່ຽວກັບວຽກນີ້ແມ່ນຫຍັງ?
ຄຳຖາມນີ້ຈະພິສູດໄດ້ວ່າ ເຈົ້າຢາກເຮັດວຽກໃນຕຳແໜ່ງນັ້ນແທ້ ຫຼື ບໍ່ ພ້ອມທັງຊ່ວຍກັ່ນຕອງວ່າ ເຮົາມີຄວາມສົນໃຈໃນວຽກນີ້ແທ້ໆ ແລະ ກຽມພ້ອມສະໝັກວຽກນີ້ມາ ຫຼື ບໍ່?. ຈົ່ງຈື່ໄວ້ວ່າມີຜູ້ສະໝັກຫຼາຍຄົນທີ່ຍື່ນຄໍາຮ້ອງຂອງພວກເຂົາ ໂດຍບໍ່ໄດ້ເອົາໃຈໃສ່ກັບລາຍລະອຽດວຽກ ຫຼື ເຮັດວຽກບ້ານເພີ່ມຕື່ມກ່ຽວກັບບໍລິສັດ ແລະ ເມື່ອໄດ້ຮັບການຍອມຮັບ ມັນອາດຈະເຮັດໃຫ້ເກີດບັນຫາໃນອະນາຄົດ.
6 ຈຸດແຂງ ແລະ ຈຸດອ່ອນຂອງເຈົ້າມີຄືແນວໃດ?
ໃນຄວາມເປັນຈິງ ຜູ້ສໍາພາດວຽກຖາມຄໍາຖາມນີ້ ເຂົາເຈົ້າບໍ່ຕ້ອງການທີ່ຈະໄດ້ຍິນພຽງແຕ່ຂໍ້ດີ ຫຼື ຂໍ້ເສຍຂອງພວກເຮົາເທົ່ານັ້ນ ແຕ່ມັນຍັງເປັນວິທີການປະເມີນພຶດຕິກໍາ, ປະຕິກິລິຍາ ແລະ ທັດສະນະຄະຕິ ເພື່ອເບິ່ງວ່າຜູ້ຖືກສຳພາດເຫັນຕົນເອງເປັນຄົນແນວໃດ? ຮູ້ຈັກຕົວເອງດີສໍ່າໃດ? ແລະ ເໝາະສົມກັບຕໍາແໜ່ງນີ້ແທ້ ຫຼື ບໍ່?.
7 ຊ່ວຍບອກສິ່ງທີ່ບໍລິສັດຈະໄດ້ຮັບຈາກເຈົ້າໃຫ້ຟັງແດ່?
ເລີ່ມຕົ້ນຄໍາຕອບຂອງເຮົາດ້ວຍຄວາມສໍາເລັດທີ່ຜ່ານມາຂອງຕົວເຮົາເອງ ທີ່ສາມາດເຊື່ອມໂຍງກັບສິ່ງທີ່ຈະບັນລຸໃນອະນາຄົດໃນອົງກອນນີ້, ຕົວຢ່າງ: ວຽກທີ່ພວກເຮົາໄດ້ເຮັດ ຫຼື ເປົ້າໝາຍທີ່ໄດ້ບັນລຸໃນອະດີດ ເຮັດໃຫ້ເຮົາສາມາດປັບຕົວໃນບໍລິສັດນີ້ໄດ້ແນວໃດ? ແລະ ຈະສ້າງວຽກງານແບບໃດໃຫ້ອົງກອນນີ້.
8 ເປັນຫຍັງຈຶ່ງຄິດວ່າເຈົ້າເໝາະສົມກັບວຽກງານໂຕນີ້?
ຖ້າເຮົາແນ່ໃຈວ່າ ເຮົາມີຄຸນສົມບັດທີ່ໄດ້ປຽບກວ່າຜູ້ສະໝັກອື່ນໆ ຂໍໃຫ້ເຮົາພິຈາລະນາຄວາມເຂັ້ມແຂງ, ຄຸນສົມບັດ ຫຼື ຄວາມສາມາດທີ່ພວກເຮົາມີ ເລືອກພຽງແຕ່ສິ່ງທີ່ເຮົາຄິດວ່າດີເດັ່ນຢ່າງແທ້ຈິງ ແລະ ສອດຄ່ອງກັບຕໍາແໜ່ງທີ່ກໍາລັງສະໝັກຢູ່ ພ້ອມກັບເວົ້າໃຫ້ຊັດເຈນ ແລະ ເຂົ້າໃຈງ່າຍດາຍ. ນອກຈາກນັ້ນ, ໃຫ້ແນ່ໃຈວ່າຈະສະແດງຄວາມກະຕືລືລົ້ນຕໍ່ຜູ້ສໍາພາດ.
9 ມີຄຳຖາມຫຍັງເພີ່ມຕື່ມບໍ່ເຈົ້າ?
ຄຳຕອບທີ່ດີຄື ການຖາມຄືນບາງຄຳຖາມກ່ຽວກັບອົງກອນ ຫຼື ລາຍລະອຽດວຽກເຊັ່ນ: ຂອບເຂດຂອງວຽກທີ່ເຮົາຮັບຜິດຊອບທີ່ເຮົາບໍ່ແນ່ໃຈ ຫຼື ມີຄວາມສົງໄສຫຼັງຈາກອ່ານໂຄສະນາວຽກ, ພະແນກຕ່າງໆທີ່ເຮົາຕ້ອງເຮັດວຽກນຳ ວັດທະນະທໍາຂອງບໍລິສັດ ຫຼື ສະຫວັດດີການຂອງອົງກອນ ລວມທັງຂໍ້ສົງໄສຕ່າງໆ.
ຂໍ້ມູນຈາກ: job fest 2023
