ໃນວັນທີ 6 ກໍລະກົດ 2023 ນີ້ ທີ່ຫ້ອງວ່າການແຂວງຄຳມ່ວນ ໄດ້ຈັດກອງປະຊຸມ ສະຫລຸບການຈັດຕັ້ງປະຕິບັດວຽກງານຕ້ານການຄ້າມະນຸດປະຈຳປີ 2022 ແລະ 6 ເດືອນຕົ້ນປີ 2023, ພ້ອມທັງທິດທາງແຜນການ 6 ເດືອນທ້າຍປີຂຶ້ນ ໂດຍການເປັນປະທານຂອງ ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ, ມີບັນດາທ່ານຕາງໜ້າການນຳຂັ້ນເມືອງໃນ 10 ເມືອງ, ຄະນະກຳມະການຕ້ານການຄ້າມະນຸດຂັ້ນແຂວງ ແລະ ເຈົ້າໜ້າທີ່ກ່ຽວຂ້ອງເຂົ້າຮ່ວມ.
ທ່ານ ພັນເອກ ຄໍາສິງ ນົນທະສອນ ຮອງຫົວໜ້າກອງບັນຊາການ ປກສ ແຂວງ ໄດ້ຜ່ານບົດສະຫລຸບການເຄື່ອນໄຫວວຽກງານຕ້ານການຄ້າມະນຸດປະຈຳປີ 2022 ແລະ 6 ເດືອນຕົ້ນປີ 2023 ຕໍ່ກອງປະຊຸມຄັ້ງນີ້ວ່າ: ໃນໄລຍະຜ່ານມາຜູ້ທີ່ຕົກເປັນຜູ້ເຄາະຮ້າຍຈາກການຄ້າມະນຸດ ແມ່ນພວກຜູ້ກ່ຽວໄດ້ລັກລອບໄປອອກແຮງງານ ແລ້ວຖືກຕົວະຍົວະຫຼອກລວງ ໂດຍການກົດຂີ່ຂູດຮີດແຮງງານຢູ່ບ່ອນອື່ນ ຈຶ່ງຖຶກສົ່ງກັບມາ ແຕ່ກໍ່ເປັນບັນຫາທີ່ໜ້າເປັນຫ່ວງ.
ໃນປະຈຸບັນທີ່ພວກເຮົາໄດ້ປະເຊີນກັບໄພເງິນເຟີ້, ຄ່າຄອງຊີບຖີບໂຕເພີ່ມຂຶ້ນສູງ ແລະ ບັນຫາອັນສໍາຄັນຄື ໃນແຂວງ ທີ່ກໍາລັງໄດ້ຮັບການພັດທະນາທາງດ້ານເສດຖະກິດຢ່າງກວ້າງຂວາງ ເປັນຕົ້ນເຂດສໍາປະທານບໍ່ເກືອກາລີ ບ້ານດົງໃຕ້ ເມືອງທ່າແຂກ ແລະ ໄດ້ຮັບສໍາປະທານໃໝ່ ກໍາລັງເລີ່ມຂຸດຄົ້ນ ຢູ່ທີ່ ບ້ານນາຄໍາ ເມືອງໜອງບົກ.
ເຊິ່ງໃນຂົງເຂດດັ່ງກ່າວໄດ້ມີ ແຮງງານຈາກຕ່າງປະເທດເປັນຕົ້ນຄົນສັນຊາດຈີນ, ໄດ້ເດີນທາງເຂົ້າມາອອກແຮງງານຮັບຈ້າງຫຼາຍພັນຄົນ, ນອກຈາກນັ້ນກໍ່ໄດ້ມີພົນລະເມືອງລາວ ໃນຫຼາຍທ້ອງຖິ່ນເຂົ້າປະກອບອາຊີບໃນຫຼາຍສາຂາ ເປັນຕົ້ນການບໍລິການ ເຮືອນພັກ, ຮ້ານກິນດື່ມ, ຮ້ານຄາລາໂອເກະ, ຮ້ານອົບນວດ ແລະ ອື່ນໆ ເຊິ່ງການປະກອບອາຊີບດັ່ງກ່າວ ໄດ້ມີການແອບແຝງຂາຍປະເວນີຂອງຍິງສາວ ຢູ່ໃນນັ້ນ.
ຜ່ານການປະຕິບັດງານຂອງເຈົ້າໜ້າທີ່ ກອງບັນຊາການ ປກສ ແຂວງ ໄລຍະຜ່ານມາ ສາມາດມ້າງໄດ້ແລ້ວ ຈໍານວນ 4 ຮ້ານ ເຊິ່ງມີຜູ້ຖືກຫາ ຈໍານວນ 13 ຄົນ, ຍິງ 12 ຄົນ, ທາງເຈົ້າໜ້າທີ່ຕໍາຫຼວດໄດ້ສະຫລຸບສົ່ງໃຫ້ອົງການໄອຍະການປະຊາຊົນແຂວງ ຕາມລະບຽບກົດໝາຍຢ່າງເຂັ້ມງວດ, ນອກຈາກນັ້ນໃນຂົງເຂດດັ່ງກ່າວ ກໍ່ຍັງມີການລັກແຕ່ງງານບໍ່ຖືກຕ້ອງຕາມກົດໝາຍ ແລະ ອາດສະຍາກໍາອື່ນໆ.
ໂດຍ: ຂ່າວສານຄຳມ່ວນ
