ໃນວັນທີ 1 ກໍລະກົດ 2023 ທີ່ຜ່ານມາ ທີ່ເມືອງສັງທອງ ນະຄອນຫຼວງວຽງຈັນ ໄດ້ເປີດຂະບວນການອະນາໄມ ທຳລາຍແຫລ່ງເພາະພັນໜອນນໍ້າຍຸງລາຍຂຶ້ນ, ໂດຍການເຂົ້າຮ່ວມຂອງ ທ່ານ ດຣ. ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ, ທ່ານ ນາງ ລຳພອຍ ສີອັກຄະຈັນ ຮອງປະທານສະພາປະຊາຊົນນະຄອນຫລວງ,ໂຮງໝໍເມືອງ, ມີແພດໝໍ, ພະຍາບານ, ພໍ່ແມ່ປະຊາຊົນ ລວມທັງສາມອົງການຈັດຕັ້ງຂອງເມືອງ ແລະ ນ້ອງໆນັກຮຽນກໍ່ໄດ້ເຂົ້າຮ່ວມ.
ໃນພິທີດັ່ງກ່າວ ທ່ານ ດຣ. ໄພວັນ ແກ້ວປະເສີດ ໄດ້ຊີ້ນຳໃຫ້ທຸກພາກສ່ວນ ຕ້ອງຊ່ວຍກັນເປັນເຈົ້າການໃນການຊີ້ນຳ ນຳພາ ແລະ ໃຫ້ການຮ່ວມມືໃນການສະກັດກັ້ນ ແລະ ຕ້ານພະຍາດໄຂ້ຍຸງລາຍ ໂດຍການນໍາໃຊ້ ມາດຕະການທີ່ສຳຄັນ ຫັນເອົາການມີສ່ວນຮ່ວມ ແລະ ເປັນເຈົ້າການຂອງບຸກຄົນ, ຄອບຄົວ ໃນການປະຕິບັດຫຼັກການ 5 ປ ຄື:
ປ ປິດ (ປົກປິດພາຊະນະທີ່ກັກເກັບນ້ຳທັງໃນ ແລະ ນອກເຮືອນບໍ່ໃຫ້ຍຸງລາຍມາໄຂ່ໃສ່), ປ ປ່ຽນ (ປ່ຽນນ້ຳໃນພາຊະນະທີ່ກັກເກັບນ້ຳ ເຊັ່ນເຕົ້າດອກໄມ້, ນ້ຳຮອງຕີນຕູ້ ແລະ ອື່ນໆ), ປ ປ່ອຍ (ປ່ອຍປາຫາງນົກຍຸງກິນໜອນນ້ຳ), ປ ປັບປຸງ (ປັບປຸງສິ່ງແວດລ້ອມອ້ອມ ເຮືອນໃຫ້ສະອາດເປັນປະຈຳທຸກອາທິດ) ແລະ ປ ປະຕິບັດ ໃຫ້ເປັນນິໄສທຸກອາທິດ.
ແລະສິ່ງສໍາຄັນຖ້າມີຄົນເປັນໄຂ້ແມ່ນໃຫ້ໄປກວດ ແລະ ປິ່ນປົວຢູ່ໂຮງໝໍຂອງລັດ ຫ້າມບໍ່ໃຫ້ໄປກວດຕາມຄຣີນິກ ຫຼື ຊື້ຢາມາກິນເອງ ຫຼື ປິ່ນປົວຕົນເອງຢູ່ບ້ານໂດຍການໃສ່ນໍ້າທະເລ ເພາະອາດຈະພາໃຫ້ມີອາການສົນ ແລະ ເປັນສາເຫດໃຫ້ເສຍຊີວິດໄດ້.
ໂດຍ: ສູນຂ່າວສານການແພດສຸຂະສຶກສາ
