ອີງຕາມຂໍ້ມູນຂອງສູນຂ່າວສານການແພດສຸຂະສຶກສາ ກະຊວງສາທາລະນະສຸກ ລາຍງານໃຫ້ຮູ້ໃນວັນທີ 02 ກໍລະກົດ 2023 ຜ່ານມາວ່າ: ປະຈຸບັນໄດ້ມີຜູ້ເສຍຊີວິດຍ້ອນຕິດພະຍາດໄຂ້ຍຸງລາຍໃຫມ່ 1 ຄົນ, ຊຶ່ງຜູ້ເສຍຊີວິດຄົນນີ້ ແມ່ນຢູ່ບ້ານປາກເບັ່ງ, ເມືອງທ່າແຂກ, ແຂວງຄຳມ່ວນ ສັງລວມມາຮອດປະຈຸບັນນີ້ ທົ່ວປະເທດ ແມ່ນມີຕົວເລກຂອງຜູ້ເສຍຊີວິດສະສົມ 3 ຄົນ, ຕິດເຊື່ອສະສົມທົ່ວປະເທດ 7.474 ຄົນ, ຕິດເຊື່ອໃຫມ່ 102 ຄົນ.
ພະຍາດໄຂ້ຍຸງລາຍ ເປັນອີກພະຍາດໜຶ່ງ ທີ່ຕ້ອງໄດ້ເອົາໃຈໃສ່ ເຝົ້າລະວັງຢ່າງເຂັ້ມງວດ ການທຳລາຍແຫຼ່ງເພາະພັນ ໜອນນ້ຳຍຸງລາຍ ໜ້າທີ່ນີ້ບໍ່ແມ່ນຂອງສຳນັກງານ, ອົງການໃດໜຶ່ງເທົ່ານັ້ນ, ແຕ່ຍັງເປັນໜ້າທີ່ ຂອງໝົດທຸກຄົນໃນທົ່ວສັງຄົມ ທີ່ຈະຕ້ອງໄດ້ພ້ອມກັນເອົາໃຈໃສ່ກຳຈັດ ແລະ ທຳລາຍໃຫ້ໝົດໄປ ໂດຍການອະນາໄມສິ່ງແວດລ້ອມອ້ອມເຮືອນ ບໍ່ໃຫ້ມີນ້ຳຂັງຢູ່ຕາມກະໂປະ, ກະປ໋ອງ, ຢາງຕີນລົດ ແລະ ອື່ນໆ ກໍຄືເພີ່ມທະວີການຈັດຕັ້ງປະຕິບັດຫລັກການ 5 ປ ຂອງກະຊວງສາທາລະນະສຸກ ວາງອອກຢ່າງເຄັ່ງຄັດ ຄື:
– ປ ປິດ (ປົກປິດພາຊະນະທີ່ກັກເກັບນ້ຳທັງໃນ ແລະ ນອກເຮືອນບໍ່ໃຫ້ຍຸງລາຍມາໄຂ່ໃສ່).
– ປ ປ່ຽນ (ປ່ຽນນ້ຳໃນພາຊະນະທີ່ກັກເກັບນ້ຳ ເຊັ່ນເຕົ້າດອກໄມ້, ນ້ຳຮອງຕີນຕູ້ ແລະ ອື່ນໆ).
– ປ ປ່ອຍ (ປ່ອຍປາຫາງນົກຍຸງກິນໜອນນ້ຳ).
– ປ ປັບປຸງ (ປັບປຸງສິ່ງແວດລ້ອມອ້ອມ ເຮືອນໃຫ້ສະອາດເປັນປະຈຳທຸກອາທິດ).
– ປ ປະຕິບັດ ໃຫ້ເປັນນິໄສທຸກອາທິດ.
