ຊອນ ເຮືອງມິນ ກອງໜ້າຊາວ ສ. ເກົາຫຼີ ຂອງທ໊ອດແນມ ຮ໊ອດສະເປີ ກາຍເປັນຮີໂຣຍິງປະຕູໄຊຊ່ວຍໃຫ້ກັບທີມເອົາຊະນະ ແມນເຊັສເຕີ ຊິຕີ້ ແຊັມເກົ່າ 1-0 ໃນການແຂ່ງຂັນບານເຕະພຣີເມຍລີກ ອັງກິດ ນັດທໍາອິດຂອງລະດູການ 2021-2022 ເມື່ອວັນທີ 15 ສິງຫາ 2021.
ນັດດັ່ງກ່າວ ທ໊ອດແນມ ຮ໊ອດສະເປີ ບໍ່ມີ ແຮຣີ ເຄນ ກອງໜ້າຕົວເກັ່ງຂອງທີມທີ່ຍັງບໍ່ພ້ອມລົງສະໜາມ ແຕ່ກໍບໍ່ເປັນບັນຫາຂອງທີມ, ສາມາດສູ້ກັບ ແມນເຊັສເຕີ ຊິຕີ້ ໄດ້ຢ່າງສູສີ ແລະ ສຸດທ້າຍແລ້ວ ເຮືອງ-ມິນ ກາຍເປັນຮີໂຣຍິງປະຕູໄຊໃຫ້ກັບທີມເອົາຊະນະ ແມນເຊັສເຕີ ຊິຕີ້ 1-0 ໃນນາທີໆ 55 ເກັບ 3 ຄະແນນທໍາອິດໃນພຣີເມຍລີກ ອັງກິດ 2021-2022.
ຫຼັງຈົບການແຂ່ງຂັນ ເຮືອງມິນ ກ່າວວ່າ: ແນ່ນອນວ່າພວກເຮົາຢາກເລີ່ມຕົ້ນໃຫ້ດີທີ່ສຸດໃນນັດທໍາອິດ ແລະ ຕໍ່ໜ້າແຟນບານຂອງພວກເຮົາ ເຊິ່ງມັນເປັນຟອມທີ່ໜ້າເຫຼືອເຊື່ອ ແລະ ທຸກໆຄົນເຮັດວຽກໜັກ ເພື່ອທີ່ຈະຄວ້າ 3 ຄະແນນໃຫ້ໄດ້ ແລະ ແມນເຊັສເຕີ ຊິຕີ ເປັນທີມທີ່ເກັ່ງທີ່ສຸດໃນໂລກປັດຈຸບັນ. ດັ່ງນັ້ນ, ມັນຈິ່ງມີຄວາມໝາຍກັບພວກເຮົາຫຼາຍ .
ຮູບຈາກ: AP
