ເມນູມື້ນີ້ຜູ້ຂຽນມາເອົາໃຈສາຍຄົນມັກອາຫານບ້ານນາ ອາຫານພື້ນບ້ານທຳມະດາ ແຕ່ລົດຊາດບໍ່ທຳມະດາ ໂດຍໄດ້ມີການປະສົມປະສານຂອງກົບ ແລະ ເຄື່ອງຕ່າງໆທີ່ນຳເອົາໄປຍັດໃສ່ໃນທ້ອງຂອງກົບ ເພື່ອໃຫ້ໄດ້ລົດຊາດ ແລະ ມີກິ່ນຫອມ ສາມາດຊ່ວຍແກ້ດັບຄາວໄດ້ເປັນຢ່າງດີ ເມນູນີ້ກໍຄື ກົບຍັດໄສ້ ຫຼື ໄສ້ອົ່ວກົບນັ້ນເອງ ທຸກຄົນພ້ອມແລ້ວເຮົາໄປເບິ່ງສູດການເຮັດກົບຍັດໄສ້ພ້ອມກັນເລີຍ.
ວັດຖຸດິບ ແລະ ເຄື່ອງປຸງ
ກົບ 4 ໂຕ ເອົາໂຕກາງ ຫຼື ໂຕໃຫຍ່ ຄົວເອົາເຄື່ອງໃນອອກ ແລະ ລ້າງໃຫ້ສະອາດ.
ໝາກເຜັດດິບແດງ 10 ໜ່ວຍ.
ກະທຽມສົດ 5 ກີບ ປອກເປືອກ.
ຫອມບົ່ວແດງ 2 ຫົວ.
ຫົວສີໃຄ 2 ກ້ານ.
ເກືອ 1 ບ່ວງແກງ
ແປ້ງນົວ 2 ບ່ວງຊາ.
ເກືອ 1 ບ່ວງຊາ ທາໃສ່ກົບ
ວິທີເຮັດກົບຍັດໄສ້
1 ຕຳເຄື່ອງໂດຍເອົາໝາກເຜັດ, ກະທຽມ, ຫອມບົ່ວແດງ, ຫົວສີໃຄ, ເກືອ ແລະ ແປ້ງນົວໃຫ້ເຂົ້າກັນ.
2 ນຳເອົາກົບທີ່ຄົວແລ້ວມາຄັ້ນໃສ່ເກືອແລ້ວຍັດເຄື່ອງທີ່ຕຳນັ້ນໃສ່ເທື່ອລະໂຕ ແລ້ວເອົາໃບຕອງມາພັນ ແລະ ມັດໄວ້.
3 ເອົາໄປປີ້ງໄຟອ່ອນຫາກາງ ໃຫ້ສຸກທົ່ວທາງໃນ ແລະ ແຫ້ມທາງນອກ ສຸກດີແລ້ວຈັດໃສ່ຈານພ້ອມເສີບກັບເຂົ້າຮ້ອນໆໄດ້ເລີຍ.
ທີ່ມາ: https://www.zap.la/lo/recipe-275-grilled-frog-with-herbs
