ໃນຕອນບ່າຍຂອງວັນທີ 17 ມິຖຸນາ ປີນີ້ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ໄດ້ລົງກວດກາເບິ່ງຄວາມເສຍຂອງຫ້ອງການ ກອງບັນຊາການ ປ້ອງກັນຄວາມສະຫງົບ(ປກສ) ແຂວງ, ໃຫ້ການຕ້ອນຮັບ ແລະ ນໍາພາເບິ່ງສະຖານທີ່ເສຍຫາຍຕົວຈິງໂດຍ ທ່ານພັນເອກ ຄໍາແພງ ເພັດ ຫົວໜ້າ ກອງບັນຊາການ ປກສ ແຂວງ ພ້ອມຄະນະ.
ທ່ານພັນເອກ ຄໍາແພງ ເພັດ ລາຍງານວ່າ: ໄພນໍ້າຖ້ວມຄັ້ງນີ້ໄດ້ຮັບຜົນກະທົບເຊັ່ນ: ລົດໃຫຍ່ຖືກນໍ້າຖ້ວມເສຍຫາຍ 3 ຄັນ, ຄອມພີວເຕີ 35 ຊຸດ, ເຄື່ອງສຽງ 1 ຊຸດ, ເຄື່ອງເຮັດບັດປະຈໍາຕົວ 1 ຊຸດ , ຕູ້ນໍ້າຮ້ອນ-ນໍ້າເຢັນ 17 ໜ່ວຍ, ໂທລະພາບສີ 10 ໜ່ວຍ, ກ້ອງຖ່າຍຮູບ 1 ໜ່ວຍ, ແອ 9 ເຄື່ອງ, ຈັກໂຟນີ 5 ຊຸດ ແລະ ເຄື່ອງຮັບໃຊ້ຫ້ອງການອີກຈໍານວນໜຶ່ງ ລວມມູນຄ່າຄວາມເສຍຫາຍເບື້ອງຕົ້ນ 2 ຕື້ກວ່າກີບ.
ນອກນີ້ຍັງມີຄອບຄົວພະນັກງານໃນກໍາລັງ ປກສ ຖືກນໍ້າຖ້ວມເສຍຫາຍຈໍານວນ 198 ຄອບຄົວ, ມາຮອດປະຈຸບັນແມ່ນກໍາລັງເລັ່ງຟື້ນຟູສໍານັກງານພາຍໃນ ປກສ ແຂວງ ເປັນຕົ້ນແມ່ນ: ອະນາໄມຫ້ອງການ, ຂົນດິນ, ມ້ຽນເສດໄມ້ຕ່າງໆທີ່ມາກັບນໍ້າ, ອະນາໄມຮ່ອງລະບາຍນໍ້າ ເຊິ່ງເຮັດສໍາເລັດແລ້ວ 40%, ຄາດວ່າຈະໃຫ້ສໍາເລັດພາຍໃນທ້າຍເດືອນ ມິຖຸນາ ນີ້.
ໂອກາດດັ່ງກ່າວ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ກໍ່ໄດ້ຍ້ອງຍໍຊົມເຊີຍຕໍ່ຄະນະກອງບັນຊາການ ປກສ ທີ່ໄດ້ຮີບຮ້ອນເລັ່ງດ່ວນໃນການອະນາໄມສໍານັກງານ ໃນໄລຍະ 4 ມື້ຜ່ານມາ ແລະ ໄດ້ຮຽກຮ້ອງໃຫ້ສືບຕໍ່ໃນການອະນາໄມເກັບມ້ຽນສິ່ງເສດເຫຼືອຕ່າງໆທີ່ມາກັບນໍ້າໃຫ້ແລ້ວໂດຍໄວເພື່ອຈະໄດ້ມາປະຈໍາການເຮັດວຽກເປັນປົກກະຕິ.
ພ້ອມດຽວກັນນີ້ ທ່ານ ເຈົ້າແຂວງເຊິ່ງຕາງໜ້າໃຫ້ອົງການປົກຄອງແຂວງ ໄດ້ມອບເງິນສົດຈໍານວນ 20 ລ້ານກີບໃຫ້ ກໍາລັງ ປກສ ເພື່ອຟື້ນຟູ ແລະ ສ້ອມແປງອາຄານທີ່ເປ່ເພໃຫ້ກັບມາໃຊ້ງານໄດ້ປົກກະຕິ.
