ພິທີເປີດການແຂ່ງຂັນກີລາດອກປີກໄກ່ທົ່ວປະເທດ ປະເພດທີມ ຊີງຂັນທ່ານນາຍົກລັດຖະມົນຕີ 2020 ເປີດສາກຂຶ້ນຢ່າງເປັນທາງການ ໃນວັນທີ 4 ພະຈິກ 2020 ທີ່ເດີ່ນດອກປີກໄກ່ໃນຮົ່ມ ເສດຖາ ( ບ້ານບຶງຂະຫຍອງ ) ໃຫ້ກຽດກ່າວເປີດພິທີໂດຍ ທ່ານ ປອ ບຸນເຫຼືອ ສິນໄຊວໍລະວົງ ປະທານສະຫະພັນກີລາດອກປີກໄກ່ແຫ່ງຊາດລາວ ໂດຍມີຄະນະນໍາ, ຕາງໜ້າຈາກຜູ້ສະໜັບສະໜູນ, ຄູຝຶກນັກກີລາ ແລະ ສື່ມວນຊົນເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ ທ່ານ ປອ ບຸນເຫຼືອ ສິນໄຊວໍລະວົງ ປະທານສະຫະພັນດອກປີກໄກ່ແຫ່ງຊາດລາວ ກ່າວວ່າ: ການແຂ່ງຂັນໃນຄັ້ງນີ້ ຖືເປັນໃບໜ້າປະຫວັດສາດຂອງວົງການກີລາດອກປີກໄກ່ບ້ານເຮົາ ເພາະໄດ້ຮັບກຽດເປັນຢ່າງສູງຈາກ ທ່ານ ນາຍົກລັດຖະມົນຕີແຫ່ງ ສປປ ລາວ ອະນຸຍາດໃຫ້ນຳໃຊ້ ນາມມະຍົດ “ ຊີງຂັນທ່ານນາຍົກລັດຖະມົນຕີ ” ເປັນຄັ້ງທໍາອິດ ເພື່ອສະເຫຼີມສະຫຼອງວັນຊາດ ທີ 2 ທັນວາ ຄົບຮອບ 45 ປີ, ສ້າງຂະບວນ, ເປັນເວທີໃຫ້ນັກກີລາໄດ້ມີໂອກາດໃນການທົດສອບສີມືຂອງຕົນເອງ ແລະ ເລືອກເຟັ້ນໄດ້ນັກກີລາດີເດັ່ນ ປະກອບເຂົ້າເປັນນັກກີລາທີມຊາດໃນແຕ່ລະຮຸ່ນອາຍຸ ລວມເຖິງເປັນການສ້າງເງື່ອນໄຂກັບແຕລະແຂວງ ໄດ້ມີການກະກຽມນັກກີລາທົ່ວປະເທດ ເພື່ອກຽມເຂົ້າຮ່ວມການແຂ່ງຂັນກີລາແຫ່ງຊາດຄັ້ງທີ 11 ທີ່ແຂວງຊຽງຂວາງ ໃນປີໜ້າອີກດ້ວຍ.
ສໍາລັບ ການແຂ່ງຂັນຄັ້ງນີ້ຈະໃຊ້ 5 ເດີ່ນທີ່ເດີ່ນໃນຮົມ ເສດຖາ ບ້ານບຶງຂະຫຍອງ ໂດຍຈະເລີ່ມແຂ່ງເວລາ 9 ໂມງເຊົ້າ ຈົນຮອດ 22 ໂມງໃນລະຫວ່າງວັນທີ 3-6 ທັນວາ 2020, ສ່ວນທີມໜຶ່ງສາມາດມີນັກກີລາ 6 ຄົນ ( ທີມຊາດສົ່ງໄດ້ 2 ຄົນ ) ແລະ ຄູຝຶກ 1 ຄົນ ໂດຍມີການຊີງໄຊທັງໝົດ 6 ລາຍການ ເປັນຮູບແບບທີມຄື: ທີມຊາຍທົ່ວໄປ 18 ທີມ, ທີມຍິງທົ່ວໄປ 8 ທີມ, ທີມປະສົມທົ່ວໄປ 9 ທີມ, ທີມເຍົາວະຊົນຊາຍ 13 ທີມ, ທີມເຍົາວະຊົນປະສົມ 5 ທີມ ແລະ ທີມອາວຸໂສຊາຍ 6 ທີມ.
ສໍາລັບ ເງິນລາງວັນໃນການແຂ່ງຂັນໃນຄັ້ງນີ້ ລວມມູນຄ່າເປັນເງິນ 150 ລ້ານກີບ ລວມມູນຄ່າໃຊ້ຈ່າຍໃນການຈັດການແຂ່ງຂັນຄັ້ງນີ້ 300 ລ້ານກວ່າກີບ ໂດຍສະເພາະ ຊະນະເລີດປະເພດທີມຊາຍ ແລະ ທີມປະສົມ ແມ່ນຈະໄດ້ຮັບເຖິງ 12 ລ້ານກີບ, ຫຼຽນລາງວັນ ແລະ ຂັນລາງວັນ, ອັນດັບ 2 ໄດ້ 8 ລ້ານກີບ ແລະ ອັດນັບ 3 ໄດ້ 5 ລ້ານກີບ, ສ່ວນປະເພດທີມຍິງ, ທີມເຍົາວະຊົນຊາຍ ແລະ ທີມເຍົາວະຊົນປະສົມ ຊະນະເລີດໄດ້ 8 ລ່ານກີບ ພ້ອມຫຼຽນລາງວັນ ແລະ ຂັນລາງວັນ. ຂະນະທີ່ ຊະນະເລີດທີມອາວຸໂສ ໄດ້ 5 ລ້ານກີບ. ນອກນັ້ນ, ນັກກີລາທີ່ສາມາດເຂົ້າຮອບ 8 ທີມສຸດທ້າຍຂຶ້ນໄປ ກໍຈະໄດ້ຮັບຄະແນນສະສົມເຊັ່ນກັນ.
ສໍາລັບ ພາກສ່ວນທີ່ໃຫ້ສະໜັບສະໜູນລາຍການນີ້ປະກອບມີ:
1.ບໍລິສັດ ການບິນລາວ ມອບໃຫ້ 50 ລ້ານກີບ
2.ບໍລິສັດ ພີເອັສແອລ ເຊີວິດ ຈຳກັດ (PSL) 30 ລ້ານກີບ
3.ທະນາຄານການຄ້າຕ່າງປະເທດລາວ ມະຫາຊົນ 50 ລ້ານກີບ
- ບໍລິສັດ ລາວໂທລະຄົມ 30 ລ້ານກີບ
5.ທະນາຄານ ບີໄອຊີ ລາວ ຈຳກັດ 50 ລ້ານ
6.ກຸ່ມບໍລິສັດ ພົງຊັບທະວີ 50 ລ້ານກີບ
7.ບໍລິສັດ ຈະເລີນເຊກອງ ພະລັງງານ ຈຳກັດ 50 ລ້ານ
8.ບໍລິສັດ ເບຍລາວ ຈຳກັດ 50 ລ້ານກີບ
9.ທະນາຄານ ລາວ-ຫວຽດ 15 ລ້ານກີບ
10.ຮ້ານອາຫານ ອາຊໍ້ຫູສະຫຼາມ 30 ລ້ານກີບ
11.ບັນດາຜູ້ອຸປະຖຳຮ່ວມ ອື່ນອີກຫຼາຍໆພາກສ່ວນ
