ກະຊວງການຕ່າງປະເທດ ໄດ້ສະເໜີຮ່າງກົດໝາຍ ວ່າດ້ວຍຊັ້ນນັກການທູດ ເຊິ່ງເປັນກົດໝາຍທີ່ສ້າງຂຶ້ນໃໝ່ ເພື່ອສ້າງມາດຕະຖານ ໃຫ້ພະນັກງານ-ລັດຖະກອນ ຂອງກະຊວງການຕ່າງປະເທດ ທີ່ສອດຄ່ອງກັບກົດໝາຍສາກົນ ແນໃສ່ພັດທະນານັກການທູດໃຫ້ມີຄຸນນະພາບສູງ.
ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ໃນວັນທີ 9 ພະຈິກ 2020 ພາຍໃຕ້ການເປັນປະທານຂອງ ທ່ານ ພົນໂທ ແສງນວນ ໄຊຍະລາດ ຮອງປະທານສະພາແຫ່ງຊາດ, ເຊິ່ງວາລະກອງປະຊຸມ ໄດ້ຮັບຟັງການສະເໜີຮ່າງກົດໝາຍ ວ່າດ້ວຍຊັ້ນນັກການທູດ ໂດຍ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ.
ທ່ານ ສະເຫຼີມໄຊ ກົມມະສິດ ໄດ້ສະເໜີຮ່າງກົດໝາຍ ວ່າດ້ວຍຊັ້ນນັກການທູດ (ສ້າງໃໝ່) ວ່າ: ຮ່າງສະບັບນີ້ ປະກອບມີ 9 ພາກ, 10 ໝວດ ແລະ 53 ມາດຕາ. ການສ້າງກົດໝາຍສະບັບນີ້ ແມ່ນເພື່ອສ້າງມາດຕະຖານ ໃຫ້ພະນັກງານ-ລັດຖະກອນ ຂອງກະຊວງການຕ່າງປະເທດ ທີ່ສອດຄ່ອງກັບກົດໝາຍສາກົນ ແນໃສ່ພັດທະນານັກການທູດໃຫ້ມີຄຸນນະພາບສູງ ທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ແບບແຜນການນຳພາ ແລະ ວິທີເຮັດວຽກ, ເຂັ້ມແຂງທາງດ້ານການຈັດຕັ້ງ, ວິຊາການການທູດ, ພາສາຕ່າງປະເທດ, ມີລະບຽບວິໄນເຂັ້ມງວດ ທັງເປັນມາດຕະການໃນການກະຕຸກຊຸກຍູ້ ຂະບວນການພັດທະນາຂະແໜງການຕ່າງປະເທດ, ເປັນພື້ນຖານໃຫ້ແກ່ການປະເມີນ, ບັນຈຸ, ແຕ່ງຕັ້ງ, ຊັບຊ້ອນພະນັກງານ-ລັດຖະກອນ ຂອງກະຊວງການຕ່າງປະເທດ, ເພີ່ມທະວີຄວາມເປັນເຈົ້າການຂອງຖັນແຖວນັກການທູດ ໃນການປະຕິບັດນະໂຍບາຍການຕ່າງປະເທດຂອງ ສປປ ລາວ ໃນໄລຍະໃໝ່ ໃຫ້ມີໝາກຜົນສູງຂຶ້ນກວ່າເກົ່າ.
ພາຍຫຼັງທີ່ກົດໝາຍສະບັບນີ້ ໄດ້ຖືກຮັບຮອງ ແລະ ປະກາດໃຊ້ ຈະເປັນບ່ອນອີງທາງດ້ານກົດໝາຍສຳຄັນທີ່ສຸດໃຫ້ແກ່ກະຊວງການຕ່າງປະເທດ ໃນການເປັນເສນາທິການ ໃຫ້ລັດຖະບານເພື່ອຄຸ້ມຄອງວຽກງານຊັ້ນນັກການທູດ ຈະເຮັດໃຫ້ພະນັກງານ-ລັດຖະກອນ ຂອງກະຊວງການຕ່າງປະເທດມີມາດຕະຖານສອດຄ່ອງກັບກົດໝາຍສາກົນ, ເປັນພື້ນຖານໃຫ້ແກ່ການການປັບປຸງມະຕິກົມການເມືອງສູນກາງພັກ ວ່າດ້ວຍວຽກງານຄຸ້ມຄອງພະນັກງານ ທີ່ກ່ຽວຂ້ອງກັບການແບ່ງຂັ້ນຄຸ້ມຄອງຖັນແຖວພະນັກງານ-ລັດຖະກອນຂອງກະຊວງການຕ່າງປະເທດໃຫ້ຖືກຕ້ອງ ຄືກັບການແບ່ງຂັ້ນຄຸ້ມຄອງນາຍທະຫານ ແລະ ນາຍຕຳຫຼວດ, ເຫັນໄດ້ຄວາມແຕກຕ່າງຢ່າງຈະແຈ້ງ ລະຫວ່າງຊັ້ນນັກການທູດ ກັບຕຳແໜ່ງການທູດ ແລະ ຕຳແໜ່ງກົງສຸນ ແລະ ຍັງເປັນກົດໝາຍທີ່ກຳນົດວັນການທູດລາວ ເພື່ອຍົກສູງບົດບາດຄວາມໝາຍສຳຄັນຂອງການທູດລາວ ໃນພາລະກິດການປະຕິວັດຊາດ ປະຊາທິປະໄຕ ໃນເມື່ອກ່ອນ ກໍຄືພາລະກິດປົກປັກຮັກສາ ແລະ ພັດທະນາປະເທດຊາດໃນໄລຍະໃໝ່.
ຫຼັງຈາກນັ້ນ, ບັນດາ ສສຊ ກໍໄດ້ປະກອບຄຳເຫັນໃສ່ຮ່າງກົດໝາຍດັ່ງກ່າວ ເພີ່ມຕື່ມເພື່ອໃຫ້ມີເນື້ອໃນຄົບຖ້ວນ ແລະ ສົມບູນ. ພ້ອມໄດ້ລົງຄະແນນສຽງຮັບຮອງເອົາ ຮ່າງກົດໝາຍ ວ່າດ້ວຍຊັ້ນນັກການທູດ (ສ້າງໃໝ່) ດັ່ງກ່າວດ້ວຍຄະແນນສຽງເຫັນດີເປັນສ່ວນຫຼາຍ.
