ແຈ້ງເຕືອນປະຊາຊົນເຝົ້າລະວັງລະດັບນໍ້າເຊກອງ ຫຼັງຈະມີການປ່ອຍນໍ້າຈາກເຂື່ອນຢູ່ຫວຽດນາມ - Laoedaily

ແຈ້ງເຕືອນປະຊາຊົນເຝົ້າລະວັງລະດັບນໍ້າເຊກອງ ຫຼັງຈະມີການປ່ອຍນໍ້າຈາກເຂື່ອນຢູ່ຫວຽດນາມ

ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງເຊກອງ ອອກແຈ້ງການເຕືອນໄພເຝົ້າລະວັງລະດັບນໍ້າເຊກອງ ໃນລະຫວ່າງວັນທີ 7-10 ຕຸລາ 2020 ຫຼັງຮັບຮູ້ແຈ້ງການຈາກບໍລິສັດຫຸ້ນສ່ວນເຂື່ອນໄຟຟ້ານໍ້າຕົກພາກກາງຂອງ ສສ ຫວຽດນາມ ຈະປ່ອຍນໍ້າບໍລິຫານອ່າງເກັບນໍ້າເຂື່ອນໄຟຟ້າອາເລື້ອຍ.

ພາບປະກອບຂ່າວເທົ່ານັ້ນ

ອີງຕາມແຈ້ງການເຕືອນໄພ ລະດັບນໍ້າເຊກອງ ແຕ່ວັນທີ 7 ຫາ 10 ຕຸລາ 2020 ສະບັບເລກທີ 86/ພຊສ.ຊກ, ລົງວັນທີ 6 ຕຸລາ 2020; ອີງໃສ່ແຈ້ງການຂອງບໍລິສັດຫຸ້ນສ່ວນເຂື່ອນໄຟຟ້າ ນໍ້າຕົກພາກກາງຂອງ ສສ ຫວຽດນາມ ສະບັບເລກທີ 1057/TB-EVNCHP ລົງວັນທີ 6 ຕຸລາ 2020 ວ່າດ້ວຍການປ່ອຍນໍ້າບໍລິຫານອ່າງເກັບນໍ້າເຂື່ອນໄຟຟ້າອາເລື້ອຍ ໃນລະຫວ່າງວັນທີ 7-10 ຕຸລາ 2020.

ພາບປະກອບຂ່າວເທົ່ານັ້ນ

ລະດັບນໍ້າເຊກອງ ຈະມີປະລິມານເພິ່ມຂຶ້ນຈາກລະດັບປົກກະຕິພຽງເລັກນ້ອຍ ເນື່ອງຈາກວ່າ ບໍລິສັດຫຸ້ນສ່ວນເຂື່ອນໄຟຟ້ານໍ້າຕົກພາກກາງ(ອາເລື້ອຍ) ປະເທດ ສສ ຫວຽດນາມ ຈະໄດ້ປ່ອຍນໍ້າອອກຈາກເຂື່ອນ ໃນເວລາ 8:00 ໂມງ ຂອງວັນທີ 9 ຕຸລາ 2020 ໃນບໍລິມາດ 100-1.000 ແມັດກ້ອນຕໍ່ວິນາທີ ແລະ ຄາດວ່າລະດັບນໍ້າ-ນໍ້າເຊກອງ ໃນລະຫວ່າງວັນທີ 7-10 ຕຸລາ 2020 ຈະມີປະລິມານສູງຂຶ້ນເຖິງ 5,50-6,50 ແມັດ, ສ່ວນລະດັບນໍ້າ-ນໍ້າເຊກອງໃນເວລາ 07:00ໂມງ 2,52ແມັດ(ລະດັບນໍ້າເຂດເຕືອນໄພແມ່ນ 17,50 ແມັດ, ເຂດອັນຕະລາຍແມ່ນ 18,50 ແມັດ).

ດັ່ງນັ້ນ, ຈຶ່ງຂໍແຈ້ງເຕືອນມາຍັງອໍານາດການປົກຄອງ ແລະ ອົງການຈັດຕັ້ງທຸກພາກສ່ວນ ຕະຫຼອດຮອດພໍ່ແມ່ປະຊາຊົນທີ່ອາໄສ ແລະ ດໍາລົງຊີວິດ ຢູ່ລຽບຕາມນໍ້າເຊກອງ ຈົ່ງມີສະຕິ ລະມັດລະວັງຕໍ່ສະພາບການດັ່ງທີ່ຈະເກີດຂຶ້ນ ພ້ອມທັງໃຫ້ຕິດຕາມຂ່າວ ສະພາບອາກາດ ແລະ ນໍ້າ ຈາກພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ(ຂະແໜງຊັບພະຍາກອນນໍ້າ ແລະ ອຸຕຸນິຍົມ) ໂດຍອອກຂ່າວທາງວິທະຍຸ ແລະ ໂທລະພາບຂອງແຂວງເປັນປະຈໍາ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ