ການຊື້ຄຳຂອງທະນາຄານກາງຈີນຫຼຸດລົງ62%ໃນເດືອນເມສາ ຫຼັງຊື້ຄໍາຫຼາຍສຸດ18ເດືອນຕິດຕໍ່ກັນ ທ່າມກາງລາຄາຄຳແທ່ງທີ່ທະຍານຂຶ້ນສ້າງສະຖິຕິໃໝ່. ດ້ານໂກແມນແຊັກ ເບິ່ງວ່າທະນາຄານກາງໃນຕະຫຼາດເກີດໃໝ່ຍັງຈະຊື້ຄຳຕໍ່ໄປ.
ສຳນັກຂ່າມບລູມເບີກລາຍງານວ່າ: ທະນາຄານກາງຈີນ ຫລື PBOC ໄດ້ຫຼຸດຜ່ອນການຊື້ຄຳ ເນື່ອງຈາກລາຄາທີ່ສູງເປັນປະຫວັດການ ຫຼັງຈາກຈີນສ້າງສະຖະຕິຊື້ຄຳຫຼາຍເປັນເດືອນທີ 18 ຕິດຕໍ່ກັນ.
ຕາມຂໍ້ມູນຢ່າງເປັນທາງການທີ່ເຜີຍແຜ່ໃນວັນອັງຄານ ໂດຍທະນາຄານກາງຈີນ ພົບວ່າໃນເດືອນເມສາ ມີການຊື້ຄຳຫຼຸດລົງ62,5% ຢູ່ທີ່ 60.000 ອອນ ຫຼຸດລົງຈາກ160.000ອອນໃນເດືອນມີນາ ແລະ ຫຼຸດລົງ84,6% ຈາກການຊື້390.000ອອນໃນເດືອນກຸມພາ.
ທະນາຄານກາງຈີນເປັນໜຶ່ງໃນຜູ້ຊື້ຄຳລາຍໃຫຍ່ທີ່ສຸດໃນຕະຫຼາດໂລກມາດົນ ໂດຍສະສົມຄຳແທ່ງຢ່າງຕໍ່ເນື່ອງຕັ້ງແຕ່ປີ2022. ຢ່າງໃດກໍຕາມລາຄາທີ່ຂຶ້ນສູງຈົນສ້າງສະຖິຕິໃໝ່ຕະຫຼອດເດືອນກຸມພາຫຼາຍຄັ້ງ ອາດເຮັດໃຫ້ ຄວາມຕ້ອງການຊື້ຄຳຂອງຈີນຫຼຸດລົງ.
ສະພາຄຳໂລກ ຫລື World Gold Council ລາຍງານວ່າ: ການຊື້ຂອງທະນາຄານກາງທົ່ວໂລກໃນໄຕມາດທຳອິດຂອງປີ 2024 ຍັງເຂັ້ມແຂງເຊິ່ງນຳໂດຍຈີນ.
ນັກວິເຄາະຕະຫຼາດບາງທ່ານຊີ້ວ່າລາຄາຄຳທີ່ທະຍານຂຶ້ນເຖິງ12%ໃນປີນີ້ສ່ວນໜຶ່ງອາດມາຈາກແຮງຊື້ຂອງບັນດາທະນາຄານກາງໃນທົ່ວໂລກ.
ດ້ານນັກວິໄຈຈາກໂກແມນແຊັກ ລະບຸວ່າ: ທະນາຄານກາງຕະຫຼາດເກີດໃໝ່ ເປັນກຳລັງຂັບເຄື່ອນເບື້ອງຫຼັງການແຫ່ຊື້ຄຳ.
ປັດຈຸບັນ ສັດສ່ວນການສຳຮອງຄຳຂອງທະນາຄານກາງໃນຕະຫຼາດເກີດໃໝ່ມີພຽງ6% ຂອງທຶນສຳຮອງລະຫວ່າງປະເທດທັງໝົດ ເຊິ່ງຖືເປັນພຽງເຄິ່ງໜຶ່ງຂອງສັດສ່ວນໃນຕະຫຼາດພັດທະນາແລ້ວ.
