ເມື່ອວັນທີ 28 ກໍລະກົດຜ່ານມາ ສານມາເລເຊຍໄດ້ຕັດສິນຕັດອິດສະຫຼະພາບ ທ່ານ ນາຈິບ ຣາຊັກ ອະດີດນາຍົກລັດຖະມົນຕີມາເລເຊຍ ເປັນເວລາ 12 ປີ ໃນຄວາມຜິດ 7 ຂໍ້ກ່າວຫາ ໃນຄະດີສໍ້ລາດບັງຫຼວງ ກອງທຶນພັດທະນາມາເລເຊຍ ( 1 MDB ).
ລາຍງານລະບຸວ່າ: ສານສູງມາເລເຊຍໄດ້ສັ່ງຕັດອິດສະຫຼະພາບ ທ່ານ ນາຈິບ ຣາຊັກ ເປັນເວລາ 12 ປີ ໃນຂໍ້ຫາສວຍໃຊ້ອຳນາດໜ້າທີ່ເກີນຂອບເຂດ ແລະ ອີກ 10 ປີ ເປັນຄວາມຜິດໃນຂໍ້ຫາຟອກເງິນ ແລະ ກະທຳຜິດຕໍ່ໜ້າທີ່ຕາມທີ່ໄດ້ມອບໝາຍ ຈົນເປັນເຫດໃຫ້ເກີດຄວາມເສຍຫາຍຕໍ່ຊັບສິນຂອງລັດ ໂດຍຫຼັກເກນການລົງໂທດໃຫ້ນັບເວລາການຕິດຄຸກໄປພ້ອມໆກັນ ໂດຍຖືເອົາໂທດສູງສຸດຄືຕັດອິດສະຫຼະພາບເປັນເວລາ 12 ປີ.
ຜູ້ພິພາກສາສານສູງຂອງນະຄອນຫຼວງກົວລາລຳເປີ ກ່າວວ່າ: ຫຼັງຈາກພິຈາລະນາຈາກພິຍານຫຼັກຖານທັງໝົດໃນຄະດີດັ່ງກ່າວນີ້ແລ້ວ, ໄອຍະການປະສົບຜົນສຳເລັດໃນການພິສູດຫຼັກຖານໃນທຸກຂໍ້ກ່າວຫາ ໂດຍປາສະຈາກຂໍ້ສົງໄສ.
ທ່ານ ນາຈິບ ດຳລົງຕຳແໜ່ງນາຍົກລັດຖະມົນຕີມາເລເຊຍ ແຕ່ປີ 2009 – 2018 ໄດ້ກະທຳຄວາມຜິດທາງອາຍາໃນ 7 ຂໍ້ກ່າວຫາ ກ່ຽວກັບການຟອກເງິນ ແລະ ສວຍໃຊ້ອຳນາດໜ້າທີ່ເກີນຂອບເຂດ ຈາກກໍລະນີຮັບໂອນເງິນ ຈຳນວນ 10 ລ້ານໂດລາສະຫະລັດ ຈາກບໍລິສັດ SRC International ເຊິ່ງເປັນສ່ວນໜຶ່ງຂອງກອງທຶນ 1 MDB ມາເຂົ້າບັນຊີສ່ວນຕົວ.
ແນວໃດກໍຕາມ, ທ່ານ ນາຈິບ ໄດ້ປະຕິເສດທຸກຂໍ້ກ່າວຫາ ແລະ ຍື່ນປະກັນຕົວ ພ້ອມປະກາດວ່າ: ຈະຂໍອຸທອນໃນຄະດີດັ່ງກ່າວ ຈຶ່ງຍັງບໍ່ໄດ້ຕິດຄຸກຈົນກວ່າຄະດີນີ້ຈະສິ້ນສຸດລົງ.
ທ່ານ ນາຈິບ ເປັນຜູ້ນຳມາເລເຊຍຄົນທໍາອິດທີ່ຖືກສານຕັດສິນວ່າມີຄວາມຜິດຖານການສໍ້ລາດບັງຫຼວງ ເຊິ່ງຄະດີທີ່ມີການຕັດສິນຄັ້ງນີ້ເປັນພຽງສ່ວນໜຶ່ງຂອງຂໍ້ກ່າວຫາວ່າລາວມີສ່ວນພົວພັນເຖິງການສໍ້ລາດບັງຫຼວງກອງທຶນ 1 MDB ເຊິ່ງກອງທຶນດັ່ງກ່າວຖືກຍັກຍອກເງິນໄປຈຳນວນ 4.500 ລ້ານໂດລາສະຫະລັດ ຈາກການກວດສອບເສັ້ນທາງການເງິນພົບວ່າ ເງິນສ່ວນໜຶ່ງຖືກນຳໄປຊື້ອະສັງຫາລິມະຊັບຢູ່ຕ່າງປະເທດ, ອີກສ່ວນໜຶ່ງນຳໄປຊື້ເຮືອຢອດມາໃຊ້ສ່ວນຕົວລວມເຖິງຊື້ອັນຍະມະນີຕ່າງໆໃຫ້ຄອບຄົວ.
