ແຂວງໄຊສົມບູນ ຮ່ວມກັບ ແຂວງວຽຽງຈັນ ຈັດພິທີສົ່ງຮ່າງອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດປາງສົງຄາມ ຢ່າງສົມກຽດ ພິທີຈັດສົ່ງຮ່າງອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດປາງສົງຄາມ ຢູ່ແຂວງໄຊສົມບູນ ແລະ ແຂວງວຽງຈັນ ໄດ້ຈັດຂຶ້ນ ໃນຕອນເຊົ້າຂອງວັນທີ 2 ພຶດສະພາ 2024 ນີ້ ທີ່ເດີ່ນບິນເກົ່າເມືອງລ້ອງແຈ້ງ ແຂວງໄຊສົມບູນ.
ເຂົ້າຮ່ວມພິທີໃນຄັ້ງນີ້ມີທ່ານ ພົຕ ວົງສອນ ອິນປານພິມ, ຮອງເລຂາພັກແຂວງ ຜູ້ຊີ້ນຳວຽກງານພັກ – ພະນັກງານ, ມີທ່ານພູວົງ ບຸນຊູ, ຮອງເຈົ້າແຂວງ ວຽງຈັນ ແລະ ທ່ານ ໂຮ່ສີແມ້ງ ປະທານບໍລິສັດ ແຮ່ທາດ ແລະ ຫຼອມໂລຫະວຽງຈັນ, ພ້ອມດ້ວຍຄະນະປະຕິບັດງານພິເສດ ແຂວງໄຊສົມບູນ, ແຂວງວຽງຈັນ ແຫ່ງສປປ ລາວ ແລະ ແຂວງເຫງະອານ ສສ ຫວຽດນາມ ຕະຫຼອດຮອດການນໍາເມືອງລ້ອງແຈ້ງ, ພຣະສົງ, ເຖົ້າແກ່ແນວໂຮມ, ທະຫານ-ຕໍາຫຼວດແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ກ່ອນເຂົ້າສູ່ພິທີທາງສາສະໜາ ທ່ານ ພົນຈັດຕະວາ ໝອນຄໍາ ດວງສະຫວັນ ຫົວໜ້າການເມືອງ ກອງບັນຊາການທະຫານ ແຂວງໄຊສົມບູນ ໄດ້ລາຍງານຜົນການຊອກຄົ້ນ, ຂຸດຄົ້ນ ຮ່າງອັດຖິນັກຮົບວິລະນາມ ໃນຊ່ວງລະດູແລ້ງ ຂອງສົກປີ 2023-2024 ນີ້. ໂດຍຄະນະປະຕິບັດງານພິເສດຂອງທັງສອງແຂວງ ໄດ້ເອົາໃຈໃສ່ສົມທົບກັບຄະນະປະຕິບັດງານພິເສດ ແຂວງເຫງະອານ ໃນການຊອກຄົ້ນ, ຂຸດຄົ້ນ ຊຶ່ງສາມາດຂຸດຄົ້ນໄດ້ທັງໝົດ 9 ຮ່າງອັດຖິ. ໃນນີ້ ຢູ່ແຂວງໄຊສົມບູນ 6 ຮ່າງອັດຖິ; ແຂວງວຽງຈັນ 3 ຮ່າງອັດຖິ. ຈາກນັ້ນ ໄດ້ດຳເນີນພິທີທາງສາສະໜາ ພ້ອມທັງກ່າວບົດສະດຸດີ, ວາງພວງມາລາ, ຈູດທູບ, ທຽນ ເພື່ອໄຫວ້ອາໄລເຖິງດວງວິນຍານຂອງເຫຼົ່າທະຫານດັ່ງກ່າວ.
ໂດຍພິທີໃນຄັ້ງນີ້ ກໍເພື່ອເປັນການຈັດສົ່ງບັນດາຮ່າງອັດຖິດັ່ງກ່າວກັບຄືນປະເທດ ທັງຍັງເປັນການຈາລຶກ, ສັນລະເສີນຄຸນງາມຄວາມດີ ຂອງເຫຼົ່າທະຫານອາສາສະໝັກ ແລະ ຊ່ຽວຊານ ຫວຽດນາມ ທີ່ໄດ້ເສຍສະຫະຊີວິດ ໃນການຕໍ່ສູ້ກູ້ຊາດ ຢ່າງຄຽງບ່າຄຽງໄຫຼ່ກັບທະຫານ ແລະ ປະຊາຊົນລາວ ເພື່ອນໍາເອົາຄວາມເປັນເອກະລາດ ແລະ ອິດສະລະພາບ ມາໃຫ້ປະເທດລາວ. ຈາກນັ້ນ ໄດ້ມີພິທີມອບໃບຍ້ອງຍໍໃຫ້ພະນັກງານ-ນັກຮົບຂອງກອງຂຸດຄົ້ນອັດຖິແຂວງເຫງະອານ ທີ່ມີຜົນງານດີເດັ່ນໃນການເຄືອນໄຫວເຮັດໜ້າທີ່ຢູ່ແຂວງໄຊສົມບູນ ແລະ ແຂວງວຽງຈັນຕື່ມອີກ.
ພາບ, ຂ່າວ: ຈົດໝາຍຂ່າວໄຊສົມູບນ
