ໃນປີ 2019 ຜ່ານມາ ຂະແໜງການແຮງງານ ແລະ ສະຫວັດດີການສັງຄົມ ໄດ້ເອົາໃຈໃສ່ໃນການຈັດຕັ້ງປະຕິບັດການສຳຫຼວດ ແລະ ເກັບກູ້ລະເບີດບໍ່ທັນແຕກ ເຊິ່ງສາມາດສຳຫຼວດຈຸດຫຼັກຖານລະເບີດບໍ່ທັນແຕກ ໄດ້ທັງໝົດ 543 ບ້ານ ແລະ ຄົ້ນຄວ້າເຊັນບົດບັນທຶກ ຄວາມເຂົ້າໃຈກັບບັນດາອົງການຈັດຕັ້ງສາກົນ ມູນຄ່າ 45,5 ລ້ານໂດລາສະຫະລັດ.
ທ່ານ ຢ່າງກູ້ ຢ່າງລືໄຊ ຫົວໜ້າກົມແຜນການ ແລະ ການຮ່ວມມືສາກົນ ກະຊວງແຮງງານ ແລະ ສະຫວັດດີການສັງຄົມໄດ້ລາຍງານຕໍ່ກອງປະຊຸມວິຊາການແຮງງານ ແລະ ສະຫວັດດີການສັງຄົມ ( ຮສສ ) ປະຈໍາປີ 2019 ວ່າ: ໃນປີ 2019 ຜ່ານມາ ກະຊວງ ຮສສ ໄດ້ເອົາໃຈໃສ່ເຄື່ອນໄຫວໂຄສະນາຜົນຮ້າຍ ແລະ ທີ່ມາຂອງລະເບີດບໍ່ທັນແຕກ ( ລບຕ ) ໃນລາວ ໄດ້ 527 ບ້ານ, ມີປະຊາຊົນເຂົ້າຮ່ວມຮັບຟັງທັງໝົດ ຈໍານວນ 233.259 ຄົນ ຍິງ 116.945 ຄົນ
ໃນນັ້ນ, ມີອຸບັດເຫດເກີດຂຶ້ນ 6 ຄັ້ງ, ມີຜູ້ໄດ້ຮັບບາດເຈັບ 5 ຄົນ ແລະ ເສຍຊີວິດ 5 ຄົນ; ສາມາດຊ່ວຍເຫຼືອຜູ້ຖືກເຄາະຮ້າຍຈາກລະເບີດບໍ່ທັນແຕກຕົກຄ້າງ ທັງໝົດ 78 ຄົນ ເທົ່າກັບ 78% ຂອງແຜນການ 100 ຄົນ. ໃນນີ້, ປິ່ນປົວການແພດ 28 ຄົນ, ຟື້ນຟູສຸຂະພາບຈິດ ແລະ ສຸຂະພາບຮ່າງກາຍ 24 ຄົນ ແລະ ສະໜອງທຶນການສຶກສາ 32 ຄົນ. ສໍາຫຼວດບໍ່ແມ່ນວິຊາການ ເພື່ອຊອກຫາຈຸດຫຼັກຖານ ລບຕ ຢູ່ 543 ບ້ານ ເທົ່າກັບ 49% ຂອງແຜນການ 1.106 ບ້ານ
ສໍາຫຼວດວິຊາການຕາມຈຸດຫຼັກຖານ ລບຕ ສາມາດກໍານົດເປັນພື້ນທີ່ ລບຕ ໄດ້ 18.384 ເຮັກຕາ ເທົ່າກັບ 80% ຂອງແຜນການປີ 27.750 ເຮັກຕາ, ພົບເຫັນ ລບຕ ຕົກຄ້າງຈຳນວນ 20.082 ໜ່ວຍ; ໃນນີ້, ມີລະເບີດລູກຫວ່ານ 18.567 ໜ່ວຍ ແລະ ກວດກູ້ລະເບີດບໍ່ທັນແຕກຕົກຄ້າງອອກຈາກພື້ນທີ່ໄດ້ທັງໝົດ 5.116 ເຮັກຕາ ເທົ່າກັບ 113,68% ຂອງແຜນການ 4.500 ເຮັກຕາ ແລະ ທໍາລາຍ ລບຕ ໄດ້ທັງໝົດ 79.335 ໜ່ວຍ. ໃນນີ້, ມີລະເບີດລູກຫວ່ານ 62.46 ໜ່ວຍ.
ນອກນັ້ນ, ຍັງໄດ້ປະສານສົມທົບ ແລະ ຮ່ວມມືກັບບັນດາພາກສ່ວນກ່ຽວຂ້ອງ ໂດຍສະເພາະແມ່ນອົງການຈັດຕັ້ງສາກົນ, ຄົ້ນຄວ້າສະເໜີລັດຖະບານຮັບຮອງບົດບັນທຶກຄວາມເຂົ້າໃຈກັບສາກົນ 6 ສະບັບ ລວມມູນຄ່າ 45,5 ລ້ານໂດລາສະຫະລັດ. ໃນນີ້, ເຊັນບົດບັນທຶກຄວາມເຂົ້າໃຈກັບອົງການແມັກ 2 ສະບັບ ມູນຄ່າ 5 ລ້ານໂດລາ (ສະບັບທີ 1 ມູນຄ່າ 4,5 ລ້ານໂດລາສະຫະລັດ ແລະ ສະບັບທີ 2 ມູນຄ່າ 5 ແສນໂດລາ), ອົງການເອັຈ໌ໄອ ມູນຄ່າ 2,7 ລ້ານໂດລາສະຫະລັດ; ອົງການຮ່ວມມືສາກົນ ສ.ເກົາຫຼີ ( ກອຍກາ ) ປະຈໍາ ສປປ ລາວ ມູນຄ່າ 5,5 ລ້ານໂດລາສະຫະລັດ; ອົງການເຮໂລທຼາດ ມູນຄ່າ 21 ກວ່າລ້ານໂດລາ ແລະ ອົງການເອັນພີເອ ມູນຄ່າ 11,2 ລ້ານໂດລາສະຫະລັດ.
ຂ່າວ: ກາວຊົ່ງ
ຂໍ້ມູນຈາກ: ກະຊວງ ຮສສ
