ສປປ ລາວ ແລະ ສປ ຈີນ ເປັນປະເທດເພື່ອມິດຍຸດທະສາດ ເມື່ອປະເທດໜຶ່ງລຳບາກອີກຝ່າຍກໍ່ຕ້ອງສົ່ງກຳລັງໃຈໃຫ້ ເປັນເລື່ອງທຳມະດາ ດັ່ງປະຈຸບັນທີ່ ສປ ຈີນກຳລັງປະເຊີນກັບການລະບາດຂອງໄວຣັສຮ້າຍປະເທດເຮົາຈິ່ງລະດົມການຊ່ວຍເຫຼືອທະຍອຍສົ່ງໃຫ້ຕາມກຳລັງທີ່ມີ ເພື່ອປະກອບສ່ວນເຂົ້າໃນການຊື້ອຸປະກອນການແພດ ແລະ ນໍາໃຊ້ເຂົ້າໃນວຽກງານການຕ້ານ ແລະ ສະກັດກັ້ນການແຜ່ລະບາດພະຍາດດັ່ງກ່າວ.
ໃນວັນທີ 25 ກຸມພາ 2020 ຜ່ານມາ ທີ່ຫ້ອງຮັບແຂກ ກະຊວງປ້ອງກັນປະເທດແຫ່ງ ສປປ ລາວ ໄດ້ມີພີທີມອບເງິນຊ່ວຍເຫຼືອໃຫ້ກະຊວງປ້ອງກັນປະເທດແຫ່ງ ສປ ຈີນ ຕາງໜ້າມອບໂດຍ ທ່ານ ຄໍາມ່ວນ ເລືອງວັນຫຼ້າ ຮອງຫົວໜ້າຫ້ອງການ ກະຊວງປ້ອງກັນປະເທດລາວ ແລະ ຕາງໜ້າຮັບໂດຍທ່ານ ເສີນຢົງຈິ່ງ ທີ່ປຶກສາການທະຫານຈີນ ປະຈໍາລາວ, ໂດຍເປັນສັກຂີພິຍານຂອງ ທ່ານ ພູວົງ ວົງພົມ ຮອງລັດຖະມົນຕີກະຊວງປ້ອງກັນປະເທດ ແລະທ່ານ ຈ່ຽງຈ່າຍຕົງ ເອກອັກຄະລັດຖະທູດຈີນປະຈໍາ ລາວ ພ້ອມດ້ວຍຄະນະນໍາທັງສອງຝ່າຍເຂົ້າຮ່ວມ.
ໃນການຊ່ວຍເຫຼືອຄັ້ງນີ້ ປະກອບດ້ວຍເງິນຈໍານວນ 2,6 ຕື້ກວ່າກີບເພື່ອຊ່ວຍເຫຼືອກະຊວງປ້ອງກັນປະເທດຈີນໃນການຊື້ອຸປະກອນການແພດ ແລະວຽກງານຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດ COVID-19 ຢູ່ ສປ ຈີນ.
ໂອກາດນີ້, ທ່ານ ພູວົງ ວົງພົມ ໄດ້ຕາງໜ້າກະຊວງ ປກຊ ກໍຄືກອງທັບປະຊາຊົນລາວ ສະແດງຄວາມຊົມເຊີຍຕໍ່ພັກ,ລັດ ກໍຄືກອງທັບຈີນ ໄດ້ນຳໃຊ້ມາດຕະການ ທີ່ຮອບດ້ານ, ເດັດຂາດແລະມີປະສິດທິພາບ ເພື່ອຄວບຄຸມພະຍາດພະຍາດອັກເສບປອດຈາກເຊື້ອຈຸລະໂລກສາຍພັນໃໝ່.
ການຊ່ວຍເຫຼືອຄັ້ງນີ້ ແມ່ນເພື່ອສະໜັບສະໜູນກອງ ທັບຈີນສືບຕໍ່ຄວບຄຸມ ແລະສະກັດກັ້ນພະຍາດດັ່ງກ່າວ. ນອກນີ້ຍັງເປັນການປະກອບສ່ວນເສີມຂະຫຍາຍສາຍພົວພັນຖານຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ, ປະກອບສ່ວນເຂົ້າໃນ ການສ້າງຄູ່ຮ່ວມຊະຕາກຳລາວ-ຈີນຮ່ວມກັນ, ເຊິ່ງໄດ້ສ່ອງແສງໃຫ້ເຫັນເຖິງນ້ຳໃຈ ມິດຕະພາບການຊ່ວຍເຫຼືອເຊິ່ງກັນ ແລະກັນຂອງກອງທັບລາວທີ່ມີຕໍ່ກອງທັບ ຈີນ.
ຝ່າຍລາວຍັງເຊື່ອໝັ້ນວ່າ, ພາຍໃຕ້ການຊີ້ນຳ-ນຳພາທີ່ເຂັ້ມແຂງຂອງພັກ ແລະລັດຖະບານຈີນ, ປະຊາຊົນຈີນອ້າຍນ້ອງຈະໄດ້ຜ່ານພົ້ນຈາກພະຍາດດັ່ງກ່າວ ແລະຟື້ນຟູການດຳລົງຊີວິດໃຫ້ກັບຄືນສູ່ສະພາບປົກກະຕິໂດຍໄວ.
ທ່ານ ຈ່ຽງ ຈ່າຍຕົງ ໄດ້ສະແດງຄວາມຂອບອົກຂອບໃຈທີ່ກະຊວງ ປກຊ ບໍລິຈາກເງິນຊ່ວຍເຫຼືອ ກະຊວງ ປກຊ ຈີນ, ທ່ານກ່າວວ່າ: ຫວ່າງບໍ່ດົນມານີ້, ລາວໄດ້ຈັດກອງປະຊຸມລັດຖະມົນຕີຕ່າງປະເທດສະໄໝພິເສດກ່ຽວກັບພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ແລະໄດ້ມອບເງິນໃຫ້ແກ່ລັດຖະບານຈີນ ແລະ ມື້ນີ້ຍັງ ຈັດພິທີມອບເງິນໃຫ້ກອງທັບຈີນອີກດ້ວຍ ເຊິ່ງໄດ້ສ່ອງແສງໃຫ້ເຫັນເຖິງນໍ້າໃຈມິດຕະພາບ ຂອງປະຊາຊົນລາວທີ່ມີຕໍ່ປະຊາຊົນຈີນ, ທັງໄດ້ສ່ອງແສງໃຫ້ເຫັນເຖິງຈິດໃຈຂອງຄູ່ຮ່ວມ ຊະຕາກໍາຈີນ-ລາວອີກດ້ວຍ. ດັ່ງນັ້ນ, ຈີນຈະນຳເອົາມິດຕະພາບອັນຈົບງາມນີ້ ໃຫ້ກາຍເປັນພະລັງແຮງໃນການຊຸກຍູ້ການສ້າງຄູ່ຮ່ວມຊະຕາກໍາຈີນ-ລາວຮ່ວມກັນ ເພື່ອນຳເອົາຜົນປະໂຫຍດທີ່ແທ້ຈິງມາສູ່ປະຊາຊົນສອງປະເທດໃຫ້ຫຼາຍກວ່າເກົ່າ.
ທີ່ມາ: CRI
