ເພື່ອເປັນການທົບທວນ, ເສີມຂະຫຍາຍການຮ່ວມມື ລະຫວ່າງ ສອງລັດຖະບານ ລາວ-ຍີປຸ່ນ, ເວົ້າສະເພາະ ກໍຄືກະຊວງແຮງງານ ແລະ ສະຫວັດດີການສັງຄົມ ແລະ ແຂວງໂທຈິກິ ປະເທດຍີ່ປຸນ ໃຫ້ນັບມື້ຂະຫຍາຍຕົວຍິ່ງໆຂື້ນ. ໃນລະຫວ່າງວັນທີ 30 ມີນາ – 6 ເມສາ 2024 ທ່ານ ນາງ ໃບຄຳ ຂັດທິຍະ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ(ຮສສ) ພ້ອມດ້ວຍຄະນະ ເດີນທາງໄປປະເທດຍີ່ປຸ່ນ. ເຊິ່ງຕ້ອນຮັບໂດຍ ທ່ານ ນາງ ຟອງສະໝຸດ ອັ່ນລາວັນ ເອກອັກຄະລັດຖະທູດ ສປປ ລາວ ປະຈຳ ປະເທດຍີ່ປຸ່ນ.
ຈາກນັ້ນ , ກໍໄດ້ເດີນທາງເຂົ້າພົບປະ ທ່ານ ຟູກຸດະ ໂທມີກາຊຸ, ເຈົ້າແຂວງໆໂທຈິກິ ເພື່ອເສີມຂະຫຍາຍການຮ່ວມມື ພ້ອມທັງຍັງປຶກສາຫາລືແລກປ່ຽນບົດຮຽນວຽກງານແຮງງານໃນການສົ່ງເສີມນັກຝຶກອົບຮົບຂອງລາວ ໃຫ້ໄດ້ຮັບສະຫວັດດີການ ແລະ ນະໂຍບາຍທີ່ດີ ແນໃສ່ເຮັດໃຫ້ນັກຝຶກອົບຮົມລາວມີໂອກາດໃນການສ້າງລາຍຮັບທີ່ດີໃຫ້ກັບຄອບຄົວ, ພັດທະນາທັກສະສີມືແຮງງານ, ຮຽນຮູ້ການເຮັດວຽກແບບປະເທດອຸດສາຫະກຳ ລວມທັງການຮຽນຮູ້ວັດທະນະທຳສັງຄົມຂອງປະເທດສີວິໄລ ເພື່ອປະກອບສ່ວນເຂົ້າໃນການພັດທະນາເສດຖະກິດສັງຄົມຢູ່ລາວ. ພາຍໃຕ້ຂອບບົດບັນທຶກການຮ່ວມມື ລະຫວ່າງ ກະຊວງແຮງງານ ແລະ ສະຫວັດດີການສັງຄົມແຫ່ງ ສປປ ລາວ ແລະ ກະຊວງແຮງງານ, ສາທາ ແລະ ສະຫວັດດີການ, ກະຊວງການຕ່າງປະເທດ ແລະ ກະຊວງຍຸຕິທຳ ແຫ່ງປະເທດຍີ່ປຸ່ນ.
ພ້ອມນີ້, ແຂວງ ໂທຈິກີ ຖືໄດ້ວ່າເປັນແຂວງໜຶ່ງ ທີ່ມີຊື່ສຽງ ໃນການປູກໝາກສະຕໍເບີລີ (ເປັນອັນດັບ ໜຶ່ງ ຂອງປະເທດ ຍີ່ປຸ່ນ). ນອກຈາກນີ້ ຍັງມີຊື່ສຽງຫຼາຍດ້ານ ເປັນຕົ້ນ: ຂະແໜງອຸດສາຫະກໍາຜະລິດລົດໃຫຍ່ ແລະ ຂະແໜງກະສິກໍາ ເຊັ່ນ: ການປູກໝາກສະຕໍເບີລີ, ການລ້ຽງງົວ ວາກິວ ຊຶ່ງເປັນຊິ້ນງົວ ທີ່ມີຄວາມແຊບ ແລະ ລາຄາສູງ ຂົງເຂດທີ່ກ່າວມານັ້ນ ແມ່ນມີຄວາມຕ້ອງການຜູ້ອອກແຮງງານຈຳນວນຫຼາຍ. ຖ້າຜູ້ອອກແຮງງານລາວ ໄດ້ມີໂອກາດໄປຝຶກອົບຮົມ ກໍ່ຈະເປັນຜົນປະໂຫຍດຢ່າງຫຼວງຫຼາຍໃຫ້ແກ່ຜູ້ອອກແຮງງານ ນຳເອົາເຕັກນິກວິຊາການໃນຂະແໜງການຕ່າງໆ ໝູນໃຊ້ເຂົ້າໃນການປະກອບອາຊີບເວລາກັບຄືນປະເທດ.
ປະຈຸບັນ, ມີນັກຝຶກອົບຮົມລາວ ທີ່ກຳລັງຝຶກເຮັດວຽກຢູ່ປະເທດຍີ່ປຸ່ນ ທັງໝົດ ຈຳນວນ 1.296 ຄົນ, ຍິງ 518 ຄົນ. ໃນນີ້ ມີນັກຝຶກອົບຮົມລາວທີ່ກຳລັງຝຶກເຮັດວຽກຢູ່ ແຂວງໂທຈິກິ ຈຳນວນ 6 ຄົນ.
ຈາກນັ້ນ, ໃນວັນຕໍ່ມາ ທ່ານ ນາງ ໃບຄຳ ຂັດທິຍະ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ພ້ອມດ້ວຍຄະນະ, ຍັງໄດ້ໄປຢ້ຽມຢາມເພື່ອເປັນຂວັນກຳລັງໃຈ ໃຫ້ກັບນັກຝຶກອົບຮົມລາວ ທີ່ຢູ່ແຂວງໂອຊາກາ, ແຂວງອີບາລາກິ ແລະ ນະຄອນຫຼວງໂຕກຽວ ທີ່ກຳລັງຝຶກອົບຮົມໃນໂຮງງານປຸງແຕ່ງປາ, ຟາມມັນດ້າງ ແລະ ໂຮງງານ ຜະລິດແຜ່ນໜ້າຈໍສຳຜັດລົດຍົນ ເພື່ອເປັນການຕິດຕາມ, ເກັບກຳຂໍ້ມູນໃນ ການຝຶກອົບຮົມ , ພ້ອມທັງຊຸກຍູ້ສົ່ງເສີມໃຫ້ນັກຝຶກອົບຮົມມີຄວາມພາກພຽນດຸໝັ່ນ, ຫ້າວຫັນ ແລະ ສ້າງຄວາມປະທັບໃຈໃຫ້ກັບປະເທດຍີປຸ່ນໃນໄລຍະເວລາການຝຶກອົບຮົມ.
ຂ່າວຈາກ: ຂ່າວສານຮສສ