ການກໍ່ສ້າງຂົວເບຕົງເສີມເຫຼັກອັດແຮງຂ້າມນ້ຳເຊຈຳພອນ ເຂດບ້ານນາທົ່ມ ຍາວ 100 ແມັດ ກວ້າງ 5,5 ແມັດ ລວມມູນຄ່າເກືອບ 20 ຕື້ກີບ ໂດຍບໍລິສັດວີແອວພີ ພັດທະນາກໍ່ສ້າງ ຈຳກັດຜູ້ດຽວ ເປັນຜູ້ຮັບເໝົາການກໍ່ສ້າງຈະໃຫ້ສຳເລັດທ້າຍປີນີ້.
ທ່ານ ແສນສັກ ສຸລິສັກ ຮອງເຈົ້າແຂວງສະຫວັນນະເຂດ ພ້ອມດ້ວຍທ່ານຫົວໜ້າພະແນກແຜນການ ແລະ ການລົງທຶນແຂວງ, ຕາງໜ້າພະແນກໂຍທາທິການ ແລະ ຂົນສົ່ງ, ພະແນກການເງິນແຂວງ ພ້ອມຄະນະ ໄດ້ລົງຕິດຕາມເບິ່ງ ຄວາມຄືບໜ້າ ໂຄງການກໍ່ສ້າງຂົວເບຕົງເສີມເຫຼັກ – ອັດແຮງ ຂ້າມນ້ຳເຊຈຳພອນ ເຂດບ້ານນາທົ່ມ ເມືອງອາດສະພອນ ໃນຕອນບ່າຍວັນທີ 25 ມີນາ 2024 ໂດຍມີທ່ານ ນາງ ບຸນທະລັງສີ ຄຳມະນີວົງ ເຈົ້າເມືອງອາດສະພອນ ພ້ອມການນຳເມືອງຮ່ວມຕິດຕາມ.
ທ່ານ ບຸນທອນ ສິດທິໂສ ຮອງຫົວໜ້າຂະແໜງຂົວທາງ, ພະແນກໂຍທາທິການ ແລະ ຂົນສົ່ງ ທັງເປັນຫົວໜ້າໂຄງການກໍ່ສ້າງຂົວເບຕົງເສີມເຫຼັກອັດແຮງຂ້າມນ້ຳເຊຈຳພອນ ລາຍງານວ່າ: ເພື່ອເຮັດໃຫ້ການສັນຈອນໄປ – ມາຂອງປະຊາຊົນພາຍໃນເມືອງອາດສະພອນ ມີຄວາມສະດວກສະບາຍຂຶ້ນກວ່າເກົ່າ; ດັ່ງນັ້ນ ການນຳຂອງແຂວງສະຫວັນນະເຂດ ຈຶ່ງໄດ້ສຸມທຶນຮອນໃນຮ່ວງເງິນເກີນແຜນປີ 2023 – 2024 ເພື່ອກໍ່ສ້າງຂົວເບຕົງເສີມເຫຼັກອັດແຮງຂ້າມນ້ຳເຊຈຳພອນ ເຂດບ້ານນາທົ່ມ ຍາວ 100 ແມັດ ກວ້າງ 5,5 ແມັດ ລວມມູນຄ່າເກືອບ 20 ຕື້ກີບ ໂດຍບໍລິສັດ ວີແອວພີ ພັດທະນາກໍ່ສ້າງ ຈຳກັດຜູ້ດຽວ ເປັນຜູ້ຮັບເໝົາການກໍ່ສ້າງ.
ຈຸດທີ່ໄດ້ມີການກໍ່ສ້າງຂົວ ແມ່ນເປັນເສັ້ນທາງສາຍຫຼັກຂອງເມືອງອາດສະພອນ ທີ່ນອນໃນເຂດບ້ານນາທົ່ມ ຫາຈຸດສຸມນາເລົ່າ ເປັນຂົວທີ່ເຊື່ອມຕໍ່ໄປຫາຫຼາຍບ້ານ ໃນເຂດຈຸດຜ່ານມາສາມາດທຽວໄດ້ພຽງລະດູດຽວ. ປັດຈຸບັນການສັນຈອນໄປ – ມາຂອງພໍ່ແມ່ປະຊາຊົນຍັງບໍ່ສະດວກ ເພາະຍັງບໍ່ມີຂົວຂ້າມເຊ ແລະ ໃນລະດູຝົນ ແມ່ນບໍ່ສາມາດສັນຈອນໄປ – ມາໄດ້.
ຖ້າຫາກວ່າຂົວດັ່ງກ່າວ ກໍ່ສ້າງສຳເລັດກໍຈະເຮັດໃຫ້ເມືອງອາດສະພອນ ກາຍເປັນເມືອງພົ້ນທຸກຕາມດຳລັດ 348/ລບ ກໍຄືມີເສັ້ນທາງທຽວໄດ້ສອງລະດູ ກວມ 100% ແລະ ເຮັດໃຫ້ປະຊາຊົນໃນເຂດຈຸດສຸມນາເລົ່າ ແລະ ບ້ານໃກ້ຄຽງ ຈຳນວນ 13 ບ້ານ ມີ 11.887 ຄົນ ໄດ້ຮັບຜົນປະໂຫຍດ.
ສຳລັບຄວາມຄືບໜ້າຂອງການກໍ່ສ້າງ, ທ່ານ ທິບພະວອນ ສີລາຊາ ປະທານ ບໍລິສັດວີແອວພີພັດທະນາກໍ່ສ້າງ ຈຳກັດຜູ້ດຽວ ລາຍງານວ່າ: ໂຄງການກໍ່ສ້າງຂົວເບຕົງເສີມເຫຼັກອັດແຮງຂ້າມນ້ຳເຊຈຳພອນ ໄດ້ເລີ່ມລົງມືກໍ່ສ້າງໃນທ້າຍເດືອນພະຈິກ 2023 ສະເພາະວຽກຕອກເສົາເຂັມທັງໝົດ 28 ຕົ້ນ ສຳເລັດ 76%; ມາຮອດປັດຈຸບັນສາມາດປະຕິບັດສຳເລັດໃນຫຼາຍໜ້າວຽກ ຄື: ວຽກດິນ, ວຽກທົ່ວໄປ, ວຽກຕອກເສົາເຂັມ, ວຽກກໍ່ສ້າງຮາກຖານ, ວຽກກໍ່ສ້າງລຳເສົາ, ວຽກຜະລິດຂາງຂົວ, ວຽກຜະລິດສິ້ນສ່ວນເບຕົງ ເທົ່າກັບ 77,60% ແລະ ຈະໃຫ້ສຳເລັດໃນ 100% ໃນທ້າຍປີ 2024. ຄາດວ່າໃນລະດູຝົນປີນີ້ ຈະໃຫ້ປະຊາຊົນສາມາດທຽວໄປ – ມາໄດ້.
ໂອກາດນີ້, ທ່ານຮອງເຈົ້າແຂວງ ກໍໄດ້ສະແດງຄວາມຍ້ອງຍໍຊົມເຊີຍຕໍ່ການເອົາໃຈໃສ່ກໍ່ສ້າງຂອງບໍລິສັດ ທີ່ໄດ້ສຸມໃສ່ເຮັດໃຫ້ການກໍ່ສ້າງມີຄວາມຄືບໜ້າໄວ ເພື່ອໃຫ້ປະຊາຊົນມີການຄົມມະນາຄົມທີ່ສະດວກສະບາຍ; ພ້ອມນີ້ ທ່ານກໍໄດ້ລົງສຳຫຼວດເບິ່ງເຂດການກໍ່ສ້າງຕົວຈິງຂອງຂົວດັ່ງກ່າວນຳອີກ.