ທ່ານລັດຖະມົນຕີກະຊວງສຶກສາທິການ ແລະ ກີລາ ແຫ່ງ ສປປ ລາວ ແລະ ທ່ານ ເອກອັກຄະລັດຖະທູດອົດສະຕຣາລີ ໄດ້ເຂົ້າຮ່ວມສັງເກດການສອນໃນຫ້ອງຮຽນໃນການນຳໃຊ້ຫຼັກສູດຊັ້ນປະຖົມສຶກສາແຫ່ງຊາດ ສະບັບປັບປຸງໃໝ່ ທີ່ໂຮງຮຽນປະຖົມແຫ່ງໜຶ່ງໃນແຂວງຊຽງຂວາງ ແລະ ຢືນຢັນຄືນຄວາມມຸ່ງໝັ້ນຂອງລັດຖະບານອົດສະ ຕຣາລີ ໃນການຊ່ວຍເຫຼືອການສຶກສາຊັ້ນປະຖົມທີ່ມີຄຸນນະພາບໃຫ້ແກ່ເດັກນ້ອຍທຸກຄົນໃນ ສປປ ລາວ.
ເມື່ອບໍ່ດົນມານີ້, ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກີລາ ແຫ່ງ ສປປ ລາວ ແລະ ທ່ານ ນາງ ເມແກນ ຈອນສ, ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ໄດ້ລົງຢ້ຽມຢາມໂຮງຮຽນປະຖົມແຫ່ງໜຶ່ງຢູ່ເມືອງຄຳ ແຂວງ ຊຽງຂວາງ ເພື່ອສັງເກດການສອນຫຼັກສູດຊັ້ນປະຖົມສຶກສາແຫ່ງຊາດ ສະບັບປັບປຸງໃໝ່.
ໃນລະຫວ່າງການຢ້ຽມຢາມໂຮງຮຽນ, ທ່ານລັດຖະມົນຕີ ໄດ້ກ່າວວ່າ “ ລັດຖະບານ ສປປ ລາວ ຮັບຮູ້ວ່າ ການສຶກສາຂັ້ນພື້ນຖານທີ່ມີຄຸນນະພາບ ເປັນພື້ນຖານຂອງປະເທດຊາດທີ່ຈະເລີນຮຸ່ງເຮືອງ ແລະ ສະຫງົບສຸກ. ດ້ວຍການສະໜັບສະໜູນຂອງລັດຖະບານອົດສະຕຣາລີ, ພວກເຮົາໄດ້ປັບປຸງຫຼັກສູດຊັ້ນປະຖົມສຶກສາແຫ່ງຊາດ ເພື່ອປະສົມປະສານວິທີການສິດສອນແບບໃໝ່ ເຊິ່ງສົ່ງເສີມການມີສ່ວນຮ່ວມ ແລະ ການຮຽນຮູ້ຂອງນັກຮຽນຜ່ານກິດຈະກຳການຮຽນການສອນ, ການປະຕິບັດຕົວຈິງ ແລະ ການນຳໃຊ້ໃນຊີວິດຕົວຈິງ. ຂ້າພະເຈົ້າດີໃຈທີ່ໄດ້ມາຮ່ວມກັບທ່ານເອກອັກຄະລັດຖະທູດ ຈອນສ ໃນມື້ນີ້ ເພື່ອສັງເກດວິທີການສອນ ແລະ ການຮຽນແບບໃໝ່ທີ່ເປັນທິດທາງໃນການພັດທະນາຊັບພະຍາກອນມະນຸດຢູ່ ສປປ ລາວ ໃນອະນາຄົດ ”.
ທ່ານເອກອັກຄະລັດຖະທູດ ໄດ້ໃຫ້ຄຳເຫັນວ່າ: “ ລັດຖະບານອົດສະຕຣາລີ ມີການຮ່ວມມືອັນຍາວນານກັບລັດຖະບານລາວ ໃນດ້ານການສຶກສາ. ເປົ້າໝາຍຂອງພວກເຮົາ, ໂດຍການຮ່ວມມືກັບກະຊວງສຶກສາທິການ ແລະ ກີລາ ແມ່ນເພື່ອຊ່ວຍໃຫ້ເດັກນ້ອຍໃນເກນເຂົ້າຮຽນຊັ້ນປະຖົມສຶກສາໃນ ສປປ ລາວ ໂດຍສະເພາະແມ່ນຜູ້ທີ່ດ້ອຍໂອກາດ, ມີຄວາມຫ້າວຫັນປະກອບສ່ວນໃນການຮຽນຫຼາຍຂຶ້ນ ແລະ ມີຜົນການຮຽນທີ່ດີຂຶ້ນ. ພວກເຮົາຮູ້ສຶກເປັນກຽດຢ່າງຍິ່ງທີ່ລັດຖະບານ ແຫ່ງ ສປປ ລາວ ມອບໃຫ້ອົດສະ ຕຣາລີ ໂດຍຜ່ານແຜນງານປັບປຸງການສຶກສາຂັ້ນພື້ນຖານ ( ບີຄວາ ) ເປັນຜູ້ສະໜັບສະໜູນການປັບປຸງການສຶກສາຊັ້ນປະຖົມ ແລະ ການປັບປຸງຫຼັກສູດຊັ້ນປະຖົມສຶກສາແຫ່ງຊາດ.
ວຽກງານດັ່ງກ່າວແມ່ນຄວາມພະຍາຍາມອັນໃຫຍ່ຫຼວງ ແລະ ຂ້າພະເຈົ້າດີໃຈທີ່ໄດ້ມາທີ່ໂຮງຮຽນປະຖົມທີ່ມີສະພາບແວດລ້ອມເອື້ອອຳນວຍແກ່ການຮຽນການສອນແຫ່ງນີ້ ໂດຍມີ ທ່ານ ລັດຖະມົນຕີ ກະຊວງສຶກສາທິການ ແລະ ກີລາ ມາຮ່ວມນຳ ເພື່ອໃຫ້ເຫັນປະຈັກຕາຕໍ່ໝາກຜົນຂອງຄວາມພະຍາຍາມຮ່ວມກັນຂອງພວກເຮົາ.
ທ່ານລັດຖະມົນຕີ ແລະ ທ່ານເອກອັກຄະລັດຖະທູດ ໄດ້ຮ່ວມສັງເກດການຮຽນ – ການສອນວິຊາພາສາລາວ, ວິຊາວິທະຍາສາດ ແລະ ສິ່ງແວດລ້ອມ ແລະ ວິຊາພາສາອັງກິດ ໂດຍໄດ້ນຳໃຊ້ຫຼັກສູດສະບັບປັບປຸງໃໝ່ ພ້ອມດ້ວຍສື່ການຮຽນ – ການສອນ ທີ່ພັດທະນາໂດຍການສະໜັບສະໜູນຈາກລັດຖະບານອົດສະ ຕຣາລີ. ທັງສອງທ່ານດີໃຈທີ່ໄດ້ເຫັນນັກຮຽນຮ່ວມມືຊ່ວຍເຫຼືອກັນໃນການຮຽນ, ມີສ່ວນຮ່ວມກັບສື່ການຮຽນການສອນ, ຮຽນຮູ້ໂດຍຜ່ານການທົດລອງ ແລະ ການທົບທວນຄືນໃນສິ່ງທີ່ເຂົາເຈົ້າກໍາລັງເຮັດ. ທັງສອງທ່ານຍັງໄດ້ເນັ້ນໜັກເຖິງບົດບາດສໍາຄັນຂອງຄູທີ່ຈະນໍາເອົາຫຼັກສູດສະບັບປັບປຸງໃໝ່ໄປຈັດຕັ້ງປະຕິບັດໃຫ້ປະກົດຜົນເປັນຈິງ.
ທ່ານເອກອັກຄະລັດຖະທູດ ຈອນສ ຍັງໄດ້ກ່າວຕື່ມອີກວ່າ: ກະຊວງສຶກສາທິການ ແລະ ກີລາ, ໂດຍການສະໜັບສະໜູນຂອງລັດຖະບານອົດສະຕຣາລີ ໄດ້ປະຕິຮູບການສຶກສາຊັ້ນປະຖົມຜ່ານການປັບປຸງຫຼັກສູດຊັ້ນປະຖົມສຶກສາ. ການປ່ຽນແປງອັນສຳຄັນ ແມ່ນການເລີ່ມນຳໃຊ້ວິທີການຮຽນທີ່ເນັ້ນໃສ່ນັກຮຽນເປັນໃຈກາງ ແລະ ເນັ້ນການປະຕິບັດຕົວຈິງ, ໄດ້ຫັນຈາກການຮຽນຮູ້ແບບເກົ່າ ໄປສູ່ການຊ່ວຍໃຫ້ນັກຮຽນໄດ້ຮຽນຮູ້ທັກສະທີ່ຈຳເປັນສຳລັບສະຕະວັດທີ 21. ພວກເຮົາຮັບຮູ້ວ່າຄູຈະຕ້ອງໄດ້ສືບຕໍ່ຝຶກອົບຮົມ ແລະ ສ້າງຄວາມເຂັ້ມແຂງຢ່າງຕໍ່ເນື່ອງ ເພື່ອຮັບປະກັນວ່າເຂົາເຈົ້າສາມາດປະຕິບັດການຮຽນ – ການສອນແບບໃໝ່ຢ່າງຄົບຖ້ວນ. ລັດຖະບານອົດສະຕຣາລີ ຈະສືບຕໍ່ຮ່ວມມືກັບກະຊວງສຶກສາທິການ ແລະ ກີລາ ໂດຍຜ່ານແຜນງານບີຄວາ ແລະ ຈະສຸມໃສ່ການພັດທະນາວິຊາຊີບຄູໃຫ້ເຂັ້ມແຂງຂຶ້ນກວ່າເກົ່າ ”.
