ໃນອາທິດແລ້ວນີ້ໂຮງຮຽນ ປກສ ຊັ້ນສູງ ເລກ3 ແຂວງສະຫວັນນະເຂດ ໄດ້ຈັດພິທີສອບເສັງ ຈົບພາກວິຊາມວຍວິຊາສະເພາະຂຶ້ນ ໂດຍເປັນປະທານຂອງ ທ່ານ ພັທ ບຸນເພັງ ວິຈິດຕີ ຮອງຫົວໜ້າອຳນວຍການໂຮງຮຽນ ປກສ ຊັ້ນສູງເລກ 3, ມີບັນດາພະນັກງານຄູ-ອາຈານ ແລະ ນັກນຶກສາລະບົບກໍ່ສ້າງຮຸ່ນທີ 06 ເຂົ້າຮ່ວມ.
ພັທ ບຸນເພັງ ວິຈິດຕີ ຮອງຫົວໜ້າອຳນວຍການໂຮງຮຽນ ປກສ ຊັ້ນສູງເລກ 3 ໄດ້ກ່າວວ່າ:, ຈຸດປະສົງ ກໍ່ເພື່ອໃຫ້ນັກສຶກສາຮັບຮູ້, ເຕັກນິກ, ຍຸດທະວີທີໃນການເຂົ້າຈັບກຸມເປົ້າໝາຍ, ແລະ ກ່ອນລົງປະຕິບັດຕົວຈິງ ກ່ຽວກັບພາກວິຊາມວຍວິຊາສະເພາະ ແມ່ນໄດ້ມີການຮຽນຮູ້ພາກທິດສະດີມາແລ້ວ, ໃຫ້ຖືກຕ້ອງ ແລະ ສອດຄ່ອງກັບທິດສະດີທີ່ໄດ້ຮຽນມາ ຈຶ່ງໄດ້ມີການສອບເສັງປະຕິບັດຕົວຈິງ ເພື່ອທົດສອບຄວາມຮັບຮູ້, ຄວາມສາມາດຂອງນັກສຶກສາແຕ່ລະສະຫາຍ.
ເຊິ່ງການຮຽນມວຍວິຊາສະເພາະໃນຄັ້ງນີ້ແມ່ນກຳນົດເວລາ 20 ວັນ(ນັບແຕ່ວັນທີ 13 ພະຈິກ ຫາ ວັນທີ 14 ທັນວາ 2023) ເຊິ່ງມີ ນັກສຶກສາທັງໝົດຈຳນວນ 200 ສະຫາຍ, ຍິງ 41 ສະຫາຍ, ການສອບເສັງ ແມ່ນເປັນຮູບແບບການກວດກາ ຕີລາຄືນຂອງການໄດ້ຮັບຮູ້ແລະ ການສິດສອນ.
ພ້ອມນີ້ທ່ານຍັງໄດ້ເນັ້ນໃຫ້ ນັກສຶກສາທຸກສະຫາຍ ຈົ່ງເອົາໃຈໃສ່ໃນການສອບເສັງ ແລະ ປະຕິບັດລະບຽບວິໄນຢ່າງເຂັ້ມງວດ, ມີຄວາມອຸ່ນອ່ຽນທຸ່ນທ່ຽງ, ມີຄວາມຕັ້ງໃຈກັບການສະແດງ ບັນດາສິນລະປະມວຍຕ່າງໆ ໃຫ້ຖືກຕ້ອງ ພ້ອມທັງກຳແໜ້ນທາງດ້ານທິດສະດີ,ຫຼັກການ ແລະ ເນື້ອໃນບົດຮຽນທີ່ຄູ-ອາຈານຖ່າຍທອດໃຫ້ແຕ່ລະຈັງຫວະ, ທຸກທ່າທາງເຄື່ອນໄຫວເໜັງຕິງເປັນຕົ້ນແມ່ນຈັງຫວະ ແລະ ສິນລະປະມວຍຕ່າງໆໃຫ້ອອກມາໄດ້ດີ, ງົດງາມ ແລະ ແຂງແຮງຖືກຕ້ອງຕາມຫຼັກການທີ່ວາງອອກ, ປະເມີນຜົນການສອບເສັງແມ່ນໄດ້100 %.
ຂ່າວຈາກ: ວິທະຍຸກະຈາຍສຽງສະຫວັນນະເຂດ