ການປະກວດ Miss Universe ປີນີ້ໄດ້ຈົບລົງໄປແລ້ວດ້ວຍຄວາມຈົບງາມ ຕ້ອງຂໍສະແດງຄວາມຍິນດີກັບ Sheynnis Palacios ສາວ ນິກາຣາໄກວ ຜູ້ໄດ້ຮັບຕໍາແໜ່ງ Miss Universe 2023 ມິສຢູນິເວີຣສ໌ ຄົນທີ 72 ຂອງໂລກໄປຄອງໄດ້ ດ້ວຍ ຄວາມງາມ ແລະ ຄວາມພ້ອມທຸກປະການ ສາມາດເອົາຊະນະໃຈຄະນະກຳມະການ ແລະ ກອງເຊຍຈົນໄດ້ຮັບຕໍາແໜ່ງ ພ້ອມມົງກຸດອັນຊົງກຽດໄປຄອງໄດ້ໃນປີນີ້.
ງານນີ້ຜູ້ທີ່ໄດ້ຮັບຕໍາແໜ່ງ ຮອງອັນດັບ 1 ແມ່ນເປັນໃຜໄປບໍ່ໄດ້ເລີຍກອງເຊຍຫຼາຍແຮງ ນັ້ນກໍຄື Anntonia Porslid ຈາກປະເທດໄທ ແລະ ຮອງອັນດັບ 2 ແມ່ນ Moraya Wilson ສາວງາມຈາກອົດສະຕຣາລີ ນັ້ນເອງ.
ສໍາລັບການປະກວດ Miss Universe ປີນີ້ ມີຕົວແທນຈາກ 84 ປະເທດທີ່ໄດ້ເຂົ້າຮ່ວມການປະກວດ Miss Universe 2023 ທີ່ປະເທດ ເອລຊາວາດໍ ເຊິ່ງການປະກວດປີນີ້ຖືວ່າມີຄວາມທ້າທາຍສໍາລັບນາງງາມທັງຫຼາຍ ເພາະມີແຕ່ສາວງາມທີ່ເກັ່ງ ພ້ອມໄປດ້ວຍຄວາມງາມ ແລະ ຄວາມຮູ້, ຄວາມສາມາດທັງນັ້ນ ແຕ່ພວກເຂົາກໍສູ້ຊົນທົນຊ້ອມມາຈົນຮອດມື້ສຸດທ້າຍ ຂອງການປະກວດ. ນອກຈາກນີ້ ສໍາລັບເວທີ Miss Universe ການປະກວດປີນີ້ມີການປ່ຽນແປງຄັ້ງໃຫຍ່ນັ້ນກໍຄື ສາວປະເພດສອງ ແລະ ຍິງທີ່ແຕ່ງງານແລ້ວກໍສາມາດຮ່ວມປະກວດໄດ້ ຫວັງວ່າປີຕໍ່ໄປເຮົາຈະໄດ້ເຫັນຄວາມກ້າວໜ້າຂອງເວທີຈັກກະວານໃນອີກລະດັບໜຶ່ງເດີ ເວທີໃຫຍ່ແຟນຄັບໜາແໜ້ນແບບນີ້ ໜ້າຕິດຕາມອີ່ຫຼີເລີຍ.
ແຕ່ເຖິງຢ່າງໃດກໍຕາມເຖິງແມ່ນວ່າປີນີ້ຕົວແທນສາຍສະພາຍລາວ ປາເປົ້າ ໄພມະນີ ລາດສະບັນເທົາ Phaimany Lathsabanthao ເຖິງຈະບໍ່ໄດ້ຜ່ານເຂົ້າຮອບ ແຕ່ນ້ອງກໍເຮັດດີທີ່ສຸດແລ້ວ! ເຊິ່ງຂ່າວບັນເທີງເອງໄດ້ໄປສ່ອງວີດີໂອແຕ່ລະຮອບຂອງນ້ອງການໂຊ ການເດີນແບບເທິງເວທີຂອງ ປາເປົ້າ ນ້ອງກໍບໍ່ພາດເລີຍເຮັດດີທີ່ສຸດໃນທຸກຮອບ ເຊິ່ງທຸກຮອບ ປາເປົ້າ ສາມາດສະແດງຄວາມສາມາດອອກມາໄດ້ດີທີ່ສຸດ ແລະ ຍັງນໍາພາ “ ຜ້າໄໝລາວໄປຈັກກະວານ ” ຕັ້ງແຕ່ມື້ທໍາອິດທີ່ເຂົ້າກອງແມ່ຈົນຮອດມື້ສຸດທ້າຍອີກດ້ວຍ ສະນັ້ນ, ປາເປົ້າ ຄືຄວາມພູມໃຈຂອງຄົນລາວເດີ.
ຂ່າວບັນເທີງຍັງໄປເຫັນມາວ່າທາງສື່ໄທ ກໍໄດ້ຍ້ອງຍໍປາເປົ້າຫຼາຍກັບແຟຊັນທີ່ໃຊ້ເກັບຕົວ ແລະ ເຂົ້າແຂ່ງຂັນໃນແຕ່ລະຮອບໃນກອງປະກວດໃນແຕ່ລະມື້ ເຊິ່ງທາງເພຈ ໄມ່ມົງຈະງົງມາກບອກວ່າ: “ ປາເປົ້າ ມີສຢູນິເວີສລາວ ເດີນທາງອອກຈາກເອລຊະວາດໍແລ້ວ. ປີນີ້ເຖິງແມ່ນວ່າລາວຈະບໍ່ໄດ້ເຂົ້າຮອບ ແຕ່ຂໍຍົກຕໍາແໜ່ງ Miss Fashion ປະຈໍາກອງ Miss Universe 2023 ໃຫ້ກັບລາວເລີຍ ຊຸດເກັບຕົວບໍ່ບົກພ່ອງຈັກມື້ ສະຕໍຣີ່ຊຸດລວມເຖິງການຂັບເຄື່ອນ Soft Power ຜ້າໄໝລາວອີກ ພີ່ນ້ອງລາວຄືຈະເຊຍມ່ວນທຸກມື້ແນ່ນອນປີນີ້ ຂໍໃຫ້ພູມໃຈໃນໂຕນາງກັນເດີ ” ທ້າຍນີ້ຝາກແຟນຂ່າວເປັນກໍາລັງໃຈ ແລະ ຕິດຕາມຜົນງານຂອງນ້ອງກັນຫຼາຍໆເດີ.
