ເປົ້າໝາຍທາງການເງິນທີ່ຫຼາຍຄົນຕັ້ງເອົາໄວ້ ບໍ່ວ່າຈະເປັນການອອມເງິນຊື້ເຮືອນ, ຊື້ລົດ, ໄປທ່ອງທ່ຽວ, ເປັນທຶນການສຶກສາ ແລະ ອື່ນໆ. ອາດຈະພົບກັບອຸປະສັກທີ່ແຕກຕ່າງກັນ ເຮັດໃຫ້ບໍ່ສາມາດໄປເຖິງຈຸດໝາຍທີ່ຄິດໄວ້, ນັ້ນອາດເປັນຍ້ອນເຮົາບໍ່ມີຄວາມຮູ້ທາງການເງິນຫຼາຍ ຫຼື ເປັນຍ້ອນຮູ້ບໍ່ທັນກັບສະພາບການ ຈຶ່ງເຮັດໃຫ້ເສຍທ່າຕົກລົງໄປໃນຂຸມພາງທາງການເງິນ. ສະນັ້ນ, ມື້ນີ້ເຮົາຈະມາແນະນຳກ່ຽວກັບຂຸມພາງການເງິນ ເພື່ອເປັນແນວທາງໃຫ້ຜູ້ອ່ານນຳໄປສຶກສາວ່າ ທີ່ຈິງແລ້ວເປັນຍ້ອນຫຍັງ, ເຮົາຂາດຈຸດໃດ ແລະ ຂຸມພາງທີ່ວ່ານີ້ມີຫຍັງແດ່ ເພື່ອຈະໄດ້ລະມັດລະວັງບໍ່ໃຫ້ເກີດຂຶ້ນກັບຕົວເຮົາ ເຊິ່ງຂຸມພາງດັ່ງກ່າວປະກອບມີຄືດັ່ງລຸ່ມນີ້:
ຢ່າຄິດວ່າຍັງມີເວລາຫຼາຍທີ່ຈະອອມເງິນ: ຫຼາຍຄົນມັກອ້າງວ່າ ການອອມເງິນນັ້ນບໍ່ເຫັນຕ້ອງຮີບຮ້ອນປານໃດກໍໄດ້ ເພາະເງິນທີ່ຫາມາໄດ້ແມ່ນຈະຕ້ອງເອົາມາຊື້ຄວາມສຸກໃຫ້ກັບຕົນເອງກ່ອນ. ຫຼັງຈາກນັ້ນ, ຫາກເຫຼືອເທົ່າໃດແລ້ວຈຶ່ງອອມໄວ້ ແຕ່ທ່ານຮູ້ບໍວ່າການເຮັດແບບນີ້ ອາດຈະເຮັດໃຫ້ເຮົາບໍ່ມີເງິນອອມເລີຍກໍເປັນໄດ້ ແລະ ໂອກາດທີ່ຈະຍັບເຂົ້າໃກ້ຜົນສໍາເລັດ ຫຼື ເປົ້າໝາຍກໍຕ້ອງໃຊ້ເວລາອີກດົນ. ສະນັ້ນ, ຄວນເລີ່ມຕົ້ນອອມເງິນໃນມື້ນີ້ ເພາະວ່າຖ້າທ່ານເລີ່ມໄວເທົ່າໃດ ກໍມີໂອກາດທີ່ຈະບັນລຸເປົ້າໝາຍໄວຂຶ້ນເທົ່ານັ້ນ.
ບໍ່ມີເງິນສໍາຮອງ ເພື່ອກໍລະນີສຸກເສີນ: ເງິນອຸດໜູນສຸກເສີນ ເປັນສິ່ງໜຶ່ງທີ່ບໍ່ຄວນເບິ່ງຂ້າມ ເມື່ອເກີດເຫດການທີ່ບໍ່ຄາດຄິດຂຶ້ນ ຫຼື ມີເຫດສຸກເສີນຈະຕ້ອງໄດ້ຈົກເງິນດັ່ງກ່າວມາໃຊ້ຈ່າຍ ເຊັ່ນ: ການເຈັບເປັນ, ອຸບັດເຫດ, ປິ່ນປົວສຸຂະພາບ ແລະ ອື່ນໆ. ສະນັ້ນ, ຈຶ່ງແນະນຳໃຫ້ເກັບຮັກສາເງິນສຳຮອງສຸກເສີນຢ່າງໜ້ອຍ 6 ເທົ່າ ຂອງເງິນເດືອນທີ່ໄດ້ຮັບປະຈໍາ ເພື່ອປ້ອງກັນ ແລະ ສາມາດຮັບມືກັບເຫດການທີ່ບໍ່ຄາດຄິດໄດ້ ແລະ ບໍ່ສົ່ງຜົນກະທົບຕໍ່ການປະຢັດສຳລັບເປົ້າໝາຍຂອງຕົນເອງ.
ຂາດວິໄນການໃຊ້ບັດເຄຣ ດິດ: ບັດເຄຣດິດ ແມ່ນສິ່ງທີ່ຫຼາຍຄົນໃຊ້ໃນແຕ່ລະມື້. ສະນັ້ນ, ຖ້າຂາດວິໄນການໃຊ້ຈ່າຍຈະເຮັດໃຫ້ເຮົາເປັນໜີ້ທັນທີ ເພາະວ່າການໃຊ້ບັດເຄຣດິດມີຄວາມສະດວກຈົນບາງຄັ້ງກໍລືມກ່ຽວກັບຄວາມສາມາດໃນການຊໍາລະຄືນ ແຕ່ທ່ານຈະຕ້ອງຈ່າຍດອກເບ້ຍສູງເຖິງ 20% ຕໍ່ປີ, ເຮັດໃຫ້ທ່ານຕົກຢູ່ໃນວົງຈອນໜີ້ ແລະ ເຮັດໃຫ້ທ່ານທີ່ບໍ່ສາມາດປະຢັດເງິນເພື່ອນໍາໃຊ້ກັບຈຸດປະສົງທີ່ຢາກໄດ້.
ລົງທຶນໃນສິ່ງທີ່ບໍ່ຖະໜັດ ຫຼື ບໍ່ໄດ້ສຶກສາຂໍ້ມູນ: ສຳລັບຜູ້ທີ່ຕັ້ງໃຈລົງທຶນເພື່ອສ້າງຜົນຕອບແທນທີ່ດີກວ່າ ແຕ່ບໍ່ໄດ້ສຶກສາຂໍ້ມູນການລົງທຶນກ່ອນ ຫຼື ລົງທຶນໃນສິ່ງທີ່ທ່ານບໍ່ຖະໜັດ ຈະເຮັດໃຫ້ເກີດຄວາມຜິດພາດຂອງການລົງທຶນ ແລະ ສ້າງຄວາມເສຍຫາຍຕໍ່ການລົງທຶນ ເຊິ່ງຈະສົ່ງຜົນໃຫ້ເປົ້າໝາຍທີ່ວາງໄວ້ບໍ່ບັນລຸຜົນທີ່ຕ້ອງການ. ສະນັ້ນ, ທ່ານຄວນສຶກສາຂໍ້ມູນການລົງທຶນທີ່ທ່ານສົນໃຈກ່ອນ ເພື່ອຊ່ວຍປ້ອງກັນຄວາມຜິດພາດຂອງການລົງທຶນທີ່ຈະເກີດຂຶ້ນ.
ລົງທຶນບໍ່ສອດຄ່ອງກັບເປົ້າໝາຍ ແລະ ໄລຍະເວລາ: ນອກເໜືອຈາກການລົງທຶນໃນສິ່ງທີ່ບໍ່ຄຸ້ນເຄີຍ ຫຼື ບໍ່ໄດ້ສຶກສາຂໍ້ມູນມາກ່ອນແລ້ວ ຍັງເຮັດໃຫ້ການລົງທຶນບໍ່ສອດຄ່ອງກັບເປົ້າໝາຍ ແລະ ກຳນົດເວລານຳອີກ ເຊິ່ງກໍເປັນອີກເຫດຜົນໜຶ່ງທີ່ເຮັດໃຫ້ເປົ້າໝາຍບໍ່ບັນລຸໄດ້ ເພາະວ່າແຕ່ລະປະເພດຂອງສິນຊັບມີ ຄວາມສ່ຽງແຕກຕ່າງກັນ ແລະ ໄລຍະເວລາຂອງການລົງທຶນເພື່ອຜົນຕອບແທນກໍແຕກຕ່າງກັນ.
ໂດຍລວມແລ້ວສິ່ງທີ່ກ່າວມາຂ້າງເທິງນີ້ແມ່ນເປັນພຽງແຕ່ບາງສ່ວນຂອງຂຸມພາງທາງການເງິນ ທີ່ຈະສົ່ງຜົນເຮັດໃຫ້ບໍ່ສາມາດປະສົບຜົນສຳເລັດໃນເປົ້າໝາຍທາງການເງິນໄດ້, ນອກນັ້ນຍັງມີອີກສິ່ງທີ່ເປັນຂຸມພາງ. ດັ່ງນັ້ນ, ເພື່ອຈະປະສົບຜົນສຳເລັດໃນເປົ້າໝາຍທາງການເງິນໄດ້ ຕ້ອງຫຼີກລ່ຽງຂຸມພາງດັ່ງກ່າວ ມີແຜນການທາງດ້ານການເງິນ ແລະ ມີສະຕິໃນການໃຊ້ຈ່າຍທຸກຄັ້ງ ເພື່ອທີ່ຈະສາມາດກ້າວໄປສູ່ເປົ້າໝາຍທາງການເງິນທີ່ຕັ້ງໄວ້ໄດ້.
[ ໂດຍ: ຕລຊລ ]
