ລັດຖະບານເອຢິບ ໄດ້ຖະແຫຼງການເມື່ອວັນທີ 29 ສິງຫາຜ່ານມາ ໂດຍປະກາດແຜນເຈາະຂຸມສຳຫຼວດແກ໊ສທໍາມະຊາດ 45 ຂຸມ ໃນທະເລເມດິເຕີເຣນຽນ ແລະ ສາມຫຼ່ຽມປາກແມ່ນໍ້າໄນລ໌ ດ້ວຍເງິນລົງທຶນ 1,9 ຕື້ໂດລາ ໃນໄລຍະແຕ່ນີ້ຈົນເຖິງກາງປີ 2025.
ແຜນການນີ້ ແມ່ນລວມເຖິງການຂຸດເຈາະ 10 ຂຸມ ໃນລະ ຫວ່າງເດືອນກໍລະກົດປີ 2022 ເຖິງເດືອນມິຖຸນາປີນີ້ ສົ່ງຜົນໃຫ້ມີການຄົ້ນພົບແຫຼ່ງແກ໊ສຂະໜາດໃຫຍ່ ເຊິ່ງ ທ່ານ Tarek El-Molla ລັດຖະມົນຕີກະຊວງຊັບພະຍາກອນປຣີໂຕຣຽມ ແລະ ແຮ່ທາດ ກໍໄດ້ກ່າວໃນພື້ນທີ່ສຳປະທານໃນທະເລເມດິເຕີເຣນຽນ ຢູ່ນອກຊາຍຝັ່ງ ເມືອງ Nargis ແຂວງ North Sinai ວ່າມີປະລິມານສຳຮອງແກ໊ສເພີ່ມຕື່ມອີກ 2,5 ລ້ານໆລູກບາດຟຸດ ( 1 ລູກບາດຟຸດ ເທົ່າກັບ 0,0283 ແມັດກ້ອນ ).
ທ່ານ Tarek El-Molla ຍັງເປີດເຜີຍວ່າ: ໃນສົກປີ 2023 – 2024 ແລະ 2024 – 2025 ຈະມີການຂຸດເຈາະຂຸມສຳຫຼວດທັງໝົດ 35 ຂຸມ ດ້ວຍເງິນລົງທຶນ 1,5 ຕື້ໂດລາ. ນອກນີ້, ເອຢິບ ຍັງມີແຜນທີ່ຈະເຈາະ 25 ຂຸມ ໃນເຂດພື້ນທີ່ຂຸດຄົ້ນບໍ່ແຮ່ Zohr ໃນທະເລເມດິເຕີເຣນຽນ ແນໃສ່ເພີ່ມກຳລັງການຜະລິດເປັນ 2,2 ຕື້ແມັດກ້ອນຕໍ່ວັນ.
ໃນຂະນະດຽວກັນ, British Petroleum ( BP ) ບໍລິສັດພະລັງງານຍັກໃຫຍ່ລະດັບໂລກ ກຳລັງວາງແຜນທີ່ຈະລົງທຶນ 3,5 ຕື້ໂດລາ ໃນການສຳຫຼວດ ແລະ ພັດທະນາແກ໊ສທໍາມະຊາດໃນເອຢິບ ໃນອີກ 3 ປີຕໍ່ໜ້າ.
ລາຍງານຍັງລະບຸວ່າ: ລາຍໄດ້ຈາກການສົ່ງອອກແກ໊ສຂອງເອຢິບ ເພີ່ມຂຶ້ນ 8 ເທົ່າ ນັບຕັ້ງແຕ່ປີ 2014, ເອຢິບ ຍັງຕັ້ງເປົ້າໝາຍຈະເປັນຜູ້ຈັດຫາແກ໊ສລາຍໃຫຍ່ໄປຍັງເອີຣົບ ໂດຍສະເພາະໃນທ່າມກາງວິກິດການດ້ານພະລັງງານໃນປັດຈຸບັນ.
ນອກນີ້, ກໍຍັງມີຄາດການວ່າ: ເອຢິບຈະຜະລິດແກ໊ສທໍາມະຊາດແຫຼວ “ Liquefied Natural Gas ” ( LNG ) ປະມານ 8 ລ້ານໂຕນໃນປີນີ້ ຫຼັງຈາກຄົ້ນພົບແຫຼ່ງແກ໊ສແຫ່ງໃໝ່ໃນພື້ນທີ່ Nargis ເມື່ອເດືອນມັງກອນທີ່ຜ່ານມາ. ການສົ່ງອອກ LNG ຂອງເອຢິບເຕີບໂຕ 14% ເມື່ອທຽບເປັນລາຍປີ ເປັນ 7,5 ລ້ານໂຕນ ໃນປີ 2022.
