ກອງປະຊຸມສະຫຼຸບການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ໄດ້ຈັດຂຶ້ນໃນວັນທີ 26 ກໍລະກົດ 2023, ທີ່ກອງບັນຊາການ ປກສ ເມືອງໄຊເສດຖາ, ເປັນປະທານໂດຍ ພັທ ສີເພັດ ພີມມະສອນ ຫົວໜ້າກອງບັນຊາການ ປກສ ເມືອງໄຊເສດຖາ, ໂດຍມີ ທ່ານ ຄຳມາ ແສງມີໄຊ ເຈົ້າເມືອງໄຊເສດຖາ, ພັອ ແສງທອງ ເກື້ອບຸນລໍ່າ ຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນໂອກາດດັ່ງກ່າວ ພັທ ອຸດ ສິງວົງໄຊ ຫົວໜ້າຫ້ອງການ ກອງບັນຊາການ ປກສ ເມືອງໄຊເສດຖາ ໄດ້ຜ່ານບົດສະຫຼຸບວຽກງານປ້ອງຄວາມສະຫງົບ ໂດຍທ່ານໄດ້ລາຍງານວ່າ: ໃນໄລຍະ 6 ເດືອນຜ່ານມາ, ຄະນະພັກ-ຄະນບັນຊາ ໄດ້ສຸມໃສ່ກໍ່ສ້າງກຳລັງປ້ອງກັນຄວາມສະຫງົບ ທົ່ວເມືອງໄຊເສດຖາ ໃຫ້ມີຄວາມເຂັ້ມແຂງໜັກແໜ້ນ, ປັບປຸງແຜນວິທີເຮັດວຽກ, ການຊີ້ນຳ-ນຳພາທີ່ເດັດດ່ຽວ ແລະ ເດັດຂາດ, ເພີ່ມຂີດຄວາມສາມາດ, ມີຈັນຍາບັນ, ຈັນຍາທຳ ແລະ ໃຫ້ມີຄວາມທັນສະໄໝເຊີດຊູບົດບາດການນຳພາເດັດຂາດ-ໂດຍກົງ ແລະ ຮອບດ້ານຂອງພັກ ຕໍ່ກັບວຽກງານປ້ອງກັນຄວາມສະຫງົບ.
ໃນນີ້, ທົ່ວເມືອງໄຊເສດຖາ ມີສະພາບປະກົດການຫຍໍ້ທໍ້ເກີດຂຶ້ນທັງໝົດ 241 ເລື່ອງ, ບັນຫາສະພາບທີ່ພົ້ນເດັ່ນແມ່ນ ລັກຊັບພົນລະເມືອງ 133 ເລື່ອງ, ຄຳຮ້ອງຟ້ອງຍັກຍອກຊັບ ແລະ ສໍ້ໂກງຊັບ 99 ເລື່ອງ, ອາລະວາດ 1 ເລື່ອງ, ຊິງຊັບ 3 ເລື່ອງ, ທຳຮ້າຍຮ່າງກາຍ 1 ເລື່ອງ, ປຸ້ນຈີ້ 1 ເລື່ອງ, ຄາດຕະກໍາ 1 ເລື່ອງ, ທຸບແວ່ນລົດ 2 ເລື່ອງ.
ຈາກສະພາບບັນຫາປະກົດການຫຍໍ້ທໍ້ທີ່ເກີດຂຶ້ນ, ທາງກອງບັນຊາການ ກໍໄດ້ເອົາໃຈໃສ່ສະກັດກັ້ນ ແລະ ແກ້ໄຂຢ່າງຕໍ່ເນື່ອງ ໄດ້ນໍາໃຊ້ກຳລັງວິຊາສະເພາະສືບສວນ-ສອບສວນ ສົມທົບກັບກຳລັງຫຼາຍພາກສ່ວນ ພ້ອມກັນຈັດຕັ້ງແກ້ໄຂໄດ້ທັງໝົດ 94 ເລື່ອງ ກັກຕົວຜູ້ຖືກຫາໄດ້ 49 ຄົນ ຍິງ 9 ຄົນ, ໃນນີ້ປະກອບມີ:
ລັກຊັບພົນລະເມືອງ 22 ເລື່ອງ ກັກຕົວຜູ້ຖືກຫາໄດ້ 26 ຄົນ, ທໍາຮ້າຍຮ່າງກາຍ 1 ເລື່ອງ ກັກຕົວຜູ້ຖືກຫາໄດ້ 1 ຄົນ, ຊື້ຊັບຜິດກົດໝາຍ 1 ເລື່ອງ ກັກຕົວຜູ້ຖືກຫາໄດ້ 1 ຄົນ, ຂົ່ມຂືນທຳສຳເລົາ 1 ເລື່ອງ ກັກຕົວຜູ້ຖືກຫາໄດ້ 1 ຄົນ, ທຳມິດສະຈານ 2 ເລື່ອງ ກັກຕົວຜູ້ຖືກຫາໄດ້ 4 ຄົນ ຍິງ 2 ຄົນ, ຍັກຍອກຊັບ 2 ເລື່ອງ ກັກຕົວຜູ້ຖືກຫາໄດ້ 2 ຄົນ ຍິງ 2 ຄົນ, ສໍ້ໂກງຊັບ 9 ເລື່ອງ ກັກຕົວຜູ້ຖືກຫາໄດ້ 14 ຄົນ ຍິງ 5 ຄົນ ແລະ ແກ້ໄຂຄໍາຮ້ອງຟ້ອງ 56 ເລື່ອງ (ຄູ່ກໍລະນີຕົກລົງກັນໄດ້ ແລະ ຊັດມ້ຽນ).
ພ້ອມດຽວກັນນີ້, ຍັງໄດ້ສຸມໃສ່ແກ້ໄຂບັນຫາການຄ້າ-ຂາຍຢາເສບຕິດ ໂດຍການປະສານສົມທົບກັບ ບັນດາ ປກສ ກຸ່ມບ້ານ ແລະ ອຳນາດການປົກຄອງຂັ້ນບ້ານ ເພື່ອສຶກສາອົບຮົບເປົ້າໝາຍທີ່ພົວພັນກັບຢາເສບຕິດ ແລະ ມອບຄືນໃຫ້ຜູ້ປົກຄອງ 16 ຄັ້ງ, ເປົ້າໝາຍທີ່ພົວພັນກັບຢາເສບຕິດ ເຂົ້າຮ່ວມຮັບຟັງທັງໝົດ 125 ຄົນ ຍິງ 21 ຄົນ. ໃນນີ້, ສາມາດແກ້ໄຂຄະດີຢາເສບຕິດ 18 ເລື່ອງ, ກັກຕົວຜູ້ຖືກຫາ 48 ຄົນ ຍິງ 6 ຄົນ, ຢຶດຂອງກາງປະເພດຢາບ້າ 103.499 ເມັດ, ຢາໄອສ໌ 883 ກຼາມ ຄື:
ແກ້ໄຂເປົ້າໝາຍຄ້າ-ຂາຍຢາເສບຕິດ 13 ເລື່ອງ ກັກຕົວໄດ້ 43 ຄົນ ຍິງ 4 ຄົນ, ແກ້ໄຂເປົ້າໝາຍມີຢາເສບຕິດໄວ້ໃນຄອບຄອງ 5 ເລື່ອງ ກັກຕົວໄດ້ 5 ຄົນ. ສຳລັບເປົ້າໝາຍມົ້ວສຸມຢາເສບຕິດ ຜູ້ທີ່ຖືກເຄາະຮ້າຍ ແມ່ນບໍ່ໄດ້ດຳເນີນຄະດີນຳສົ່ງສູນປິ່ນປົວ ເເລະ ຝຶກວິຊາຊີບ 35 ເລື່ອງ ມີຈຳນວນ 35 ຄົນ ຍິງ 2 ຄົນ.
ໂດຍ: ຂ່າວຄວາມສະຫງົບ
