ໃນກາງເດືອນກໍລະກົດ ທີ່ຜ່ານມານີ້ ຄະນະກຳມະການຕ້ານການຄ້າມະນຸດ ແຂວງສະຫວັນນະເຂດ, ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານຕ້ານການຄ້າມະນຸດປະຈຳປີ 2022 ແລະ ທິດທາງແຜນການ ປີ 2023, ໂດຍເປັນປະທານຂອງ ທ່ານນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ, ປະທານຄະນະກຳມະການ ຕ້ານການຄ້າມະນຸດ ແຂວງສະຫວັນນະເຂດ, ມີທ່ານ ພົຈວ ສົມໝາຍ ພົມມະຈັນ ຫົວໜ້າກອງບັນຊາການ ປກສ ແຂວງ ຮອງປະທານຄະນະກຳມະການ ຕ້ານການຄ້າມະນຸດແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນໂອກາດດັ່ງກ່າວ ທ່ານ ແຖວຄຳ ພົມມະວົງ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ໄດ້ສະຫຼຸບສັງລວມການຈັດຕັ້ງປະຕິບັດວຽກງານຕ້ານການຄ້າມະນຸດໃນ 1 ປີຜ່ານມາ ເຫັນວ່າ: ແຂວງສະຫວັນນະເຂດ ກໍ່ແມ່ນໜຶ່ງແຂວງ ທີ່ຍັງມີກຸ່ມຄົນຈຳນວນໜຶ່ງ ເຄື່ອນໄຫວປຸກລະດົມຂົນຂວາຍເອົາຊາວໜຸ່ມ-ຍິງສາວ ແລະ ເດັກນ້ອຍທີ່ມີອາຍຸຕໍ່າກວ່າ 18 ປີ ໄປຂາຍແຮງງານ, ຂາຍບໍລິການທາງເພດ ແລະ ອື່ນໆ ຢູ່ຕ່າງປະເທດໂດຍຮູບການໂຄສະນາຊວນເຊື່ອ ຫຼື ຮູບການອື່ນໆ ເປັນຕົ້ນການສ້າງຄອບຄົວກັບຄົນຕ່າງປະເທດ, ເປີດຮ້ານບໍລິການກິນດື່ມ ແລະ ອື່ນໆ.
ເຊິ່ງທາງຄະນະກຳມະການຕ້ານການຄ້າມະນຸດທຸກຂັ້ນ ໄດ້ເອົາໃຈໃສ່ປ້ອງກັນ ແລະ ແກ້ໄຂການຄ້າມະນຸດ ໂດຍການປະສານສົມທົບກັບທຸກພາກສ່ວນທີ່ກ່ຽວຂ້ອງ ໂຄສະນາເຜີຍແຜ່ກົດໝາຍ ແລະ ນິຕິກຳຕ່າງໆ ທີ່ພົວພັນເຖິງວຽກງານຕ້ານການຄ້າມະນຸດ ໃຫ້ບັນດາຂະແໜງການທາງພາກລັດ ແລະ ເອກະຊົນພາຍໃນແຂວງ, ນະຄອນ, ເມືອງ ແລະ ບ້ານ ເພື່ອສ້າງຄວາມເຂັ້ມແຂງ, ຄວາມຮັບຮູ້ ແລະ ເຂົ້າໃຈຕໍ່ວຽກງານຕ້ານການຄ້າມະນຸດ, ປູກຈິດສຳນຶກໃຫ້ປະຊາຊົນບັນດາເຜົ່າໃນທົ່ວແຂວງສະຫວັນນະເຂດ ໃຫ້ຮູ້ເຖິງຜົນຮ້າຍ ແລະ ຄວາມເປັນອັນຕະລາຍຂອງການຄ້າມະນຸດ.
(ຮູບປະກອບ)
ໃນປີຜ່ານມາ ທາງພາກສ່່ວນກ່ຽວຂ້ອງ ສາມາດມ້າງລາຍຄະດີຄ້າມະນຸດໄດ້ 2 ລາຍ, ຜູ້ຖືກຫາ 2 ຄົນ, ຄົນຕ່າງປະເທດ 1 ຄົນ, ຜູ້ຖືກເຄາະຮ້າຍ 2 ຄົນ, ຍິງ 1 ຄົນ, ອາຍຸຕໍ່າກວ່າ 18 ປີ 2 ຄົນ.ນອກນັ້ນໄດ້ມອບເຄື່ອງຊ່ວຍເຫຼືອໃຫ້ແມ່ຍິງ ແລະ ເດັກນ້ອຍ ທີ່ດ້ອຍໂອກາດ ແລະ ກຸ່ມສ່ຽງຂອງການຄ້າມະນຸດ ມີ 72 ຄົນ, ຊ່ວຍເຫຼືອຢູ່ຮ້ານກິນດື່ມມີ 5 ຄົນ, ເກັບກໍາຂໍ້ມູນແຮງງານລາວທີ່ຂ້າມຜ່ານດ່ານຂົວມິດຕະພາບ2 ໂດຍມີທັງໝົດ 114 ຄົນ, ຍິງ 38 ຄົນ, ຄົນລາວທີ່ປະຕິບັດໂທດສິ້ນສຸດມາແຕ່ໄທມີ 78ຄົນ, ຍິງ 31 ຄົນ, ແຮງງານລາວຖືກຜັກດັນມາ ມີ 33 ຄົນ, ຍິງ 7 ຄົນ.
ໂດຍ: ວິທະຍຸກະຈາຍສຽງ ແຂວງສະຫວັນນະເຂດ
