ການຮຽນຂອງນ້ອງໆທີ່ຈົບສາມັນປີນີ້ ມ7 ແມ່ນສອບເສັງສຳເລັດແລ້ວໃນອາທິດຜ່ານມາ ຫຼັງຈາກນີ້ກໍ່ຈະປ່ຽນຈາກນັກຮຽນເປັນນັກສຶກສາໃນອີກບໍ່ດົນ ຫຼື ໄປປະກອບອາຊີບອື່ນສຳລັບຜູ້ບໍ່ໄດ້ຮຽນຕໍ່ວິຊາຊີບ ໃນນັ້ນທົ່ວນະຄອນຫຼວງວຽງຈັນມີນັກຮຽນສອບເສັງຈົບຊັ້ນ ມ7 ໃນສົກປີ 2022-2023 ທັງໝົດ 9.000 ກວ່າຄົນ ຈາກໂຮງຮຽນ 100 ກວ່າແຫ່ງ.
ຕາມການໃຫ້ສຳພາດຂອງ ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ໄດ້ລົງຢ້ຽມຢາມສູນສອບເສັງຈົບຊັ້ນ ມ7 ຢູ່ທີ່ ໂຮງຮຽນ ມັດທະຍົມສົມບູນສຶກສາໜອງບອນ ໃນວັນທີ 22 ກໍລະກົດ 2023 ທີ່ຜ່ານມາວ່າ:
ການສອບຈົບຊັ້ນ ມ7 ໃນນະຄອນຫຼວງວຽງຈັນ ເຊິ່ງມີທັງໝົດ 22 ສູນສອບເສັງ ມີ 108 ໂຮງຮຽນ ມີນັກສອບເສັງທັງໝົດ 9.456 ຄົນ ໃນໄລຍະການສອບເສັງເຫັນວ່າສະພາບການມີຄວາມສະຫງົບເປັນລະບຽບຮຽບຮ້ອຍ ອະນຸກໍາມະການຮັບຜິດຊອບທຸກພາກສ່ວນໄດ້ມີຄວາມຮັບຜິດຊອບສູງ ປະຕິບັດຕາມກົດລະບຽບທີ່ກະຊວງສຶກສາທິການ ແລະ ກິລາ ກໍານົດໃຫ້ຢ່າງເຂັ້ມງວດ.
ສ່ວນການສອບເສັງຈົບຊັ້ນ ມ7 ໄດ້ເປັນເອກະພາບກັນທົ່ວປະເທດ ວັນທີ 21-23 ມິຖຸນາ 2023 ປະກອບມີວິຊາຄະນິດສາດ ພາສາລາວ-ວັນນະຄະດີ ກຸ່ມວິທະຍາສາດທໍາມະຊາດ ກຸ່ມວິທະຍາສາດສັງຄົມ ແລະ ວິຊາພາສາ ອັງກິດ.
