ໃນເຊົ້າວັນນີ້ 26 ເມສາ 2024, ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີປະກາດການຈັດຕັ້ງຄະນະນໍາ ມຊ. ຂຶ້ນທີ່ສະໂມສອນ ສະຖາບັນຂົງຈື ໃນພິທີ ທ່ານ ປອ. ນາງ ວິໄລ ພິລາວົງ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຂຶ້ນຜ່ານ ດໍາລັດນາຍົກລັດຖະມົນຕີ ວ່າດ້ວຍການອະນຸມັດໃຫ້ພະນັກງານການນໍາຂັ້ນສູງ ອອກພັກການ-ຮັບອຸດໜູນບໍານານ ສະບັບເລກທີ 122/ນຍ, ລົງວັນທີ 29 ມັງກອນ 2024 ອະນຸມັດໃຫ້ທ່ານ ຮສ. ປອ. ອຸດົມ ພອນຄໍາເພັງ ອະທິການບໍດີ ມຊ, ລວມອາຍຸການ 37 ປີ ອອກພັກການ-ຮັບອຸດໜູນບໍານານ.
ພ້ອມນີ້ກໍ່ໄດ້ຜ່ານຂໍ້ຕົກລົງຂອງທ່ານລັດຖະມົນຕີ ວ່າດ້ວຍການແຕ່ງຕັ້ງ ພະນັກງານດຳລົງຕໍາແໜ່ງບໍລິຫານຂອງ ມຊ ສະບັບເລກທີ 1569/ສສກ, ລົງວັນທີ 09 ເມສາ 2024, ວ່າດ້ວຍການແຕ່ງຕັ້ງທ່ານ ຮສ. ປອ. ເດຊານຸລາດ ແສນດວງເດດ ເປັນວ່າການແທນອະທິການບໍດີ ມຊ; ດໍາລັດນາຍົກລັດຖະມົນຕີ ວ່າດ້ວຍການແຕ່ງຕັ້ງ ຮອງອະທິການບໍດີ ມຊ ສະບັບເລກທີ 224/ນຍ ລົງວັນທີ 08 ເມສາ 2024 ວ່າດ້ວຍການແຕ່ງຕັ້ງທ່ານ ສຈ.ປອ. ພູເພັດ ກ້ຽວພິລາວົງ ເປັນຮອງອະທິການບໍດີ ມຊ;
ດໍາລັດນາຍົກລັດຖະມົນຕີ ວ່າດ້ວຍການແຕ່ງຕັ້ງ ຮອງອະທິການບໍດີ ມຊ. ເລກທີ 225/ນຍ ລົງວັນທີ 08 ເມສາ 2024 ວ່າດ້ວຍການແຕ່ງຕັ້ງທ່ານ ທອງສຸກ ແກ້ວມະນີ ເປັນຮອງອະທິການບໍດີ ມຊ.
ໃນພິທີສໍາຄັນນີ້, ທ່ານ ຮສ. ປອ. ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະກີລາ ໄດ້ສະແດງຄວາມຍ້ອງຍໍ ແລະ ຊົມເຊີຍຕໍ່ຜົນງານ ຂອງທ່ານ ຮສ. ປອ. ອຸດົມ ພອນຄໍາເພັງ ອະດີດອະທິການບໍດີ ມຊ, ທີ່ໄດ້ທຸ່ມເທສະຕິປັນຍາ ແລະ ເຫື່ອແຮງຂອງຕົນປະກອບສ່ວນເຂົ້າໃນການພັດທະນາປະເທດຊາດ ເວົ້າລວມ ແລະ ເວົ້າສະເພາະແມ່ນ ການພັດທະນາ ມຊ;
ທ່ານລັດຖະມົນຕີກ່າວອີກວ່າ: ໃນໄລຍະການຮ່ວມວຽກງານນໍາທ່ານ ອະດີດອະທິການບໍດີວ່າ ທ່ານເປັນບຸກຄົນໜຶ່ງທີ່ມີຄຸນທາດການເມືອງ, ມີຄຸນສົມບັດສິນທຳປະຕິວັດ, ມີວິໄສທັດອັນກວ້າງໄກ, ມີຄວາມສາມາດໃນການນຳໃຊ້ ແລະຂຸດຄົ້ນຄວາມສາມາດບົ່ມຊ້ອນ ແລະກໍາລັງແຮງສັງລວມທັງຢູ່ພາຍໃນ ແລະ ພາຍນອກເຂົ້າໃນການພັດທະນາມະຫາວິທະຍາໄລ, ເປັນຜູ້ນຳທີ່ມີມະນຸດສຳພັນດີ ແລະມີຄວາມໂອບເອື້ອອາລີ ຊຶ່ງເປັນຈຸດເດັ່ນອັນໜຶ່ງຂອງທ່ານ, ແຕ່ທ່ານກໍເປັນຜູ້ນຳທີ່ມີຄວາມເດັດຂາດ, ກ້າຄິດ, ກ້າເຮັດ ແລະກ້າຮັບຜິດຊອບ; ເປັນແບບຢ່າງອັນດີໃຫ້ໝູ່ຄະນະ ແລະບຸກຄະລາກອນໃນ ມຊ, ເປັນຜູ້ໜຶ່ງທີ່ມີຄວາມບຸກໜ້າບືນຕົວຜ່ານຜ່າຂໍ້ຫຍຸ້ງຍາກ ໂດຍສະເພາະແມ່ນໄລຍະທີ່ທ່ານຮັບຕໍາແໜ່ງໄດ້ມີການລະບາດຂອງພະຍາດໂຄວິດ19 ແຕ່ທ່ານກໍສາມາດນໍາພາ ມຊ ຜ່ານວິກິດນັ້ນມາໄດ້.
ໃນໂອກາດດຽວກັນ ທ່ານລັດຖະມົນຕີ ໄດ້ຝາກເຖິງ ວ່າການແທນອະທິການບໍດີ ແລະທ່ານຮອງອະທິການບໍດີທີ່ຂຶ້ນຮັບໜ້າທີ່ໃໝ່ ໃຫ້ຮັກສາສະຖຽນລະພາບຂອງ ມຊ. ໃຫ້ຄົງຢູ່ ແລະສ້າງ ມຊ ໃຫ້ມີຄວາມນໍາໜ້າ, ຄວາມເຂັ້ມແຂງດ້ານການບໍລິຫານ-ຄຸ້ມຄອງ, ໃຫ້ເປັນມະຫາວິທະຍາໄລ ທີ່ນໍາໜ້າທາງດ້ານວິຊາການ, ດ້ານສິ່ງແວດລ້ອມ ແລະນໍາໜ້າທາງດ້ານການຮ່ວມມືກັບຕ່າງປະເທດ, ທ່ານໄດ້ກ່າວເນັ້ນອີກວ່າ ໃຫ້ທຸກພາກສ່ວນທົ່ວ ມຊ. ຈົ່ງໃຫ້ຄວາມຮ່ວມມື-ຮ່ວມໃຈ ໃນການປະຕິບັດໜ້າທີ່ຂອງຄະນະນໍາຊຸດໃໝ່ ເພື່ອໃຫ້ ມຊ ກາຍເປັນສູນກາງການສຶກສາທີ່ມີຄວາມກ້າວໜ້າ ແລະມີຄຸນນະພາບຍິ່ງຂຶ້ນໃນທຸກໆດ້ານ.
