ໃນວັນທີ 20 ພຶດສະພາ, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ພ້ອມດ້ວຍທີມງານຂັ້ນແຂວງ ໄດ້ລົງເຄື່ອນໄຫວຕິດຕາມຊີ້ນຳວຽກງານຮອບດ້ານຂອງເມືອງທ່າປາງທອງ ພ້ອມທັງຊຸກຍູ້ການກະກຽມກອງປະຊຸມໃຫຍ່ 3 ຂັ້ນຂອງເມືອງດັ່ງກ່າວ ໂດຍໄດ້ຮັບການຕ້ອນຮັບຈາກ ທ່ານ ຄຳປະສົງ ຂົງຄຳ ເຈົ້າເມືອງທ່າປາງທອງ ພ້ອມຄະນະພັກ – ອຳນາດການປົກຄອງ ແລະ ພະນັກງານຫຼັກແຫຼ່ງພາຍໃນເມືອງ.
ໃນໂອກາດນີ້, ທ່ານເຈົ້າແຂວງ ໄດ້ຮັບຟັງການລາຍງານກ່ຽວກັບວຽກພັກ – ພະນັກງານ, ການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງເມືອງຈາກ ທ່ານ ຄຳປະສົງ ຂົງຄຳ ເຊິ່ງໄດ້ຍົກໃຫ້ຮູ້ວ່າ: ທົ່ວເມືອງມີບ້ານທັງໝົດ 49 ບ້ານ ມີຈຳນວນຄອບຄົວທັງໝົດ 7.942 ຄອບຄົວ, ບ້ານພົ້ນທຸກແລ້ວ 30 ບ້ານ, ບ້ານທຸກຍາກຍັງມີ 19 ບ້ານ, ມີຄອບຄົວທຸກຍາກ 1.416 ຄອບຄົວ, ມີຄອບຄົວພັດທະນາທັງໝົດ 5.117 ຄອບຄົວ.
ໃນປີ 2024 ຈະສູ້ຊົນສ້າງເມືອງໃຫ້ກາຍເປັນເມືອງພົ້ນທຸກ, ຖ້າຫາກສາມາດສ້າງບ້ານພົ້ນທຸກໄດ້ຕື່ມອີກ 7 ບ້ານ; ໃນນີ້ ເມືອງໄດ້ກຳນົດບ້ານເປົ້າໝາຍສ້າງໃຫ້ກາຍເປັນບ້ານພົ້ນທຸກໃນຈຳນວນ 10 ບ້ານ ແລະ ສູ້ຊົນສ້າງບ້ານພັດທະນາໃຫ້ໄດ້ 1 ບ້ານ ( ບ້ານທ່າສະລາຄໍາ ) ແລະ ສືບຕໍ່ສ້າງບ້ານໂນນຈານ, ບ້ານຫ້ວຍໝື່ນ, ບ້ານທ່າພີ່ ແລະ ບ້ານເຊກື ໃຫ້ເປັນຕົວເມືອງນ້ອຍໃນຊົນນະບົດຕາມແຜນທີ່ວາງໄວ້ໃນປີ 2024.
ທົ່ວອົງຄະນະພັກເມືອງ ປະກອບມີ 9 ຄະນະພັກຮາກຖານ, ມີ 89 ໜ່ວຍພັກ, ຂະຫຍາຍໃໝ່ໄດ້ 1 ໜ່ວຍ. ສຳລັບການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ສຳເລັດກອງປະຊຸມໃຫຍ່ ຂອງໜ່ວຍພັກ, ຄະນະພັກຮາກຖານ ມີ 46 ໜ່ວຍພັກ ເທົ່າກັບ 51,68%, ຍັງບໍ່ທັນສຳເລັດກອງປະຊຸມໃຫຍ່ຂັ້ນຕົນ 9 ຄະນະພັກຮາກຖານ, 38 ໜ່ວຍພັກ ເຊິ່ງຈະສືບຕໍ່ໃຫ້ສຳເລັດໃນເດືອນມິຖຸນານີ້.
ວາລະຕໍ່ມາ, ບັນດາພະແນກການກົມກອງຂອງແຂວງ ກໍໄດ້ຜັດປ່ຽນກັນຂຶ້ນປະກອບຄຳຄິດເຫັນ ເພື່ອເປັນການຊຸກຍູ້ໃຫ້ບັນດາຂະແໜງການຕ່າງໆຂອງເມືອງ ເລັ່ງຈັດຕັ້ງປະຕິບັດໃຫ້ສຳເລັດຕາມແຜນການທີ່ວາງໄວ້ໃນຂອບເຂດຄວາມຮັບຜິດຊອບຂອງຕົນ.
ໂອກາດນີ້, ທ່ານ ບຸນໂຈມ ອຸບົນປະເສີດ ໄດ້ກ່າວມີຄຳເຫັນໂອ້ລົມ ແລະ ຊີ້ນຳຕໍ່ຄະນະພັກ – ຄະນະນຳຂອງເມືອງໃນຫຼາຍບັນຫາສຳຄັນ ໂດຍເນັ້ນໃຫ້ເມືອງຂຸ້ນຂ້ຽວໃນການເຮັດຮ່າງບົດລາຍງານການເມືອງ ກໍຄືແຜນພັດທະນາເສດຖະກິດ – ສັງຄົມຂອງເມືອງໃຫ້ສຳເລັດໂດຍໄວ ເພື່ອກະກຽມສູ່ການດຳເນີນກອງປະຊຸມໃຫຍ່ 3 ຂັ້ນຂອງພັກໃຫ້ທັນຕາມກຳນົດເວລາທີ່ວາງໄວ້.
ພ້ອມນີ້, ກໍໃຫ້ມີການປະເມີນຄືນການປັບປຸງການຈັດຕັ້ງໃນຂັ້ນຮາກຖານບ້ານ – ກຸ່ມບ້ານພາຍໃນເມືອງ ໂດຍອີງໃສ່ຂໍ້ກຳນົດຂອງຄະນະເລຂາທິການສູນກາງພັກເລກທີ 416/ຄລສພ, ທັງນີ້ກໍເພື່ອເຮັດໃຫ້ລະບົບຮາກຖານການເມືອງໃນຂັ້ນຮາກຖານ ໂດຍສະເພາະຂັ້ນບ້ານມີ ຄວາມໜັກແໜ້ນ ເຂັ້ມແຂງ.
ຈາກນີ້, ທ່ານເຈົ້າແຂວງສະຫວັນນະເຂດ ກໍຍັງໄດ້ໃຫ້ທິດຊີ້ນຳໃນຫຼາຍບັນຫາສຳຄັນທີ່ເປັນປະໂຫຍດຕໍ່ການພັດທະນາເສດຖະກິດ – ສັງຄົມຂອງເມືອງທ່າປາງທອງນຳອີກ.
ວາລະຕໍ່ມາ, ທ່ານ ບຸນໂຈມ ອຸບົນປະເສີດ ພ້ອມຄະນະ ກໍໄດ້ຕິດຕາມຊຸກຍູ້ການກໍ່ສ້າງສະໂມສອນຂອງເມືອງທ່າປາງທອງ. ຕໍ່ຈາກນັ້ນ, ກໍໄດ້ລົງຊີ້ນຳການພັດທະນາໃນເຂດອ່າງເກັບນ້ຳເຊກື ແລະ ເຂດພື້ນທີ່ກໍ່ສ້າງຄອງເໝືອງ ເພື່ອສະໜອງນ້ຳທຳການຜະລິດຂອງປະຊາຊົນພາຍໃນເມືອງ.
