ລາຄານໍ້າມັນດິບເວັດເທັກຊັດປິດຕະຫຼາດ ວັນຈັນທີ 20 ພຶດສະພາ ປັບລົງ26ເຊັນ ທ່າມກາງທີ່ນັກລົງທຶນກຳລັງເຝົ້າຕິດຕາມທິດທາງນະໂຍບາຍການຜະລິດນໍ້າມັນຂອງອີຣານ ຫຼັງການເສຍຊີວິດຂອງທ່ານ ອິບຣາຮິມ ໄຣຊີ ປະທານາທິບໍດີ ຈາກອຸບັດເຫດເຮລິຄອບແຕຕົກ.
ລາຄານໍ້າມັນດິບເວັດເທັກຊັດ ຫລື (WTI) ງວດສົ່ງມອບເດືອນມິຖຸນາ ປັບລົງ26ເຊັນມາຢູ່ທີ່79,80ໂດລາສະຫະລັດຕໍ່ບາເຣລ; ສ່ວນນໍ້າມັນດິບເບຣນ ງວດສົ່ງມອບເດືອນກໍລະກົດ ຫຼຸດລົງ27ເຊັນ ມາຢູ່ທີ່83,71ໂດລາສະຫະລັດຕໍ່ບາເຣລ.
ຕະຫຼາດມີການຄາດການກັນວ່າອີຣານ ເຊິ່ງເປັນຜູ້ຜະລິດນໍ້າມັນລາຍໃຫຍ່ອັນດັບ 3 ຂອງກຸ່ມປະເທດຜູ້ສົ່ງອອກນໍ້າມັນ(ໂອເປັກ)ຈະຍັງຮັກສານະໂຍບາຍການຜະລິດນໍ້າມັນຕໍ່ໄປ ຂະນະທີ່ມີການແຕ່ງຕັ້ງທ່ານ ໂມຮຳໝັດ ມອດເບີ ຮອງປະທານາທິບໍດີຂຶ້ນເປັນຮັກສາການປະທານາທິບໍດີ.
ນອກຈາກນີ້ຕະຫຼາດ ຍັງຕິດຕາມການປະຊຸມກຳນົດນະໂຍບາຍການຜະລິດນໍ້າມັນຂອງໂອເປັກແລະຊາດພັນທະມິດ ຫລື ໂອເປັກບວກໃນວັນທີ 1 ມິຖຸນາ ຈະມາເຖິງ ໂດຍຄາດການວ່າທີ່ປະຊຸມຈະຍັງມີມະຕິປັບຫຼຸດກຳລັງການຜະລິດນໍ້າມັນຕໍ່ໄປໃນເຄິ່ງປີຫຼັງ.
ນັກລົງທຶນຍັງຕິດຕາມຄັງນໍ້າມັນດິບຂອງສະຖາບັນປີໂຕລ້ຽມອາເມຣິກາ (API) ກ່ອນທີ່ສຳນັກງານດ້ານພະລັງງານຂອງລັດຖະບານສະຫະລັດ(EIA) ຈະເປີດເຜີຍຂໍ້ມມູນໃນວັນພຸດນີ້ຕາມເວລາສະຫະລັດອາເມຣິກາ.
