ຮູ້ຈັກ ອີກໜຶ່ງສາວງາມ ສາຍເທ້ ໃນເວທີ ຈັກກະວານ miss universe laos 2024 ພົກຄວາມໝັ້ນໃຈມາເຕັມ ຜູ້ມີຄາດຫວັງວ່າເວທີນີ້ຈະເປັນພື້ນທີ່ທີ່ມອບໂອກາດເຮົາໄດ້ເປັນກະບອກສຽງແກ່ກຸ່ມຊາຍຂອບ ຢ່າງເຊັ່ນຜູ້ຍິງ LGBTQIA+
ສະບາຍດີ ຂ້ອຍຊື່ວະນິດາ ສຸວັນນະວົງ ຊື່ຫຼິ້ນແມ່ນນານ່າ ມາຈາກນະຄອນຫຼວງວຽງຈັນ ແຕ່ໄດ້ຮັບເລືອກໃຫ້ນຳສະເໜີແຂວງບໍລິຄຳໄຊ ຮຽນຈົບປະລິນຍາຕີຈາກ Oklahoma City University ຜ່ານສູນການສຶກສາ MDIS ທີ່ສິງກະໂປ ປັດຈຸບັນອາໄສຢູ່ໃນນະຄອນຫຼວງ.
ການມາໃນຄັ້ງນີ້ ແມ່ນຢາກມາພິສູດດ້ວຍຕົວເອງວ່າຜູ້ຍິງແບບເຮົາ ທີ່ບໍ່ໄດ້ມີພາບລັກແບບຜູ້ຍິງຕາມຂະນົບທຳນຽມ ສາມາດເປັນທີ່ຍອມຮັບ ແລະ ປະສົບຜົນສຳເລັດໃນເວທີນາງງາມບໍ່!
ຂ້ອຍເປັນຄົນທຳອິດໃນການປະກວດທີ່ມາໃນລຸກສາວເທ້ຜົມສັ້ນ ຢາກຈະມາສະແດງໃຫ້ທຸກຄົນເຫັນວ່າການສະແດງອອກທາງເພດສະພາບ (Gender Expression) ນັ້ນມັນຍືດຍຸ່ນໄດ້ ບໍ່ຕ້ອງຢຶດຕິດວ່າຈະໄປທາງໃດ
ຄະຕິປະຈໍາໃຈ “ບໍ່ຄາດຫວັງ ບໍ່ຜິດຫວັງ ເຮັດມື້ນີ້ໃຫ້ຄືມື້ສຸດທ້າຍ”
ນ້ອງເອງ ສາມາດສະແດງໃຫ້ເຫັນວ່າຄົນຈາກຊຸມຊົນ LGBTQIA+ ສາມາດປະສົບຜົນສຳເລັດໃນເວທີນີ້ໄດ້ ແລະ ການເປັນຜູ້ຍິງນັ້ນມັນບໍ່ມີກົດຕາຍຕົວ ເຮົາຢາກຈະທຳລາຍກອບທີ່ຈຳກັດຄວາມເປັນຜູ້ຍິງ. ການທີ່ເຮົາກ້າທີ່ຈະເປັນຕົວເອງ ແລະ ເປັນແຮງບັນດານໃຈໃຫ້ແກ່ຄົນທີ່ບໍ່ຍອມຢູ່ໃນກອບ ເຮົາເຊື່ອວ່ານີ້ແຫຼະຄືສິ່ງທີ່ເຮົາເຮັດໄດ້ນະຕອນນີ້, ນ້ອງສາມາດ ຮ້ອງເພງ, ພາກສຽງ, ອອກແບບກຣາຟຟິກ ແລະ ສາມາດເວົ້າພາສາອັງກິດໄດ້ຄ່ອງແຄ່ວ ແລະ ພໍຮູ້ພາສາເກົາຫຼີໃນລະດັບພື້ນຖານ.
ນ້ອງຢາກຈະເປັນກະບອກສຽງໃຫ້ແກ່ຄົນທີ່ຢູ່ຊາຍຂອບ ແລະ ສືບຕໍ່ເຮັດວຽກສົ່ງເສີມສິດທິສະເໝີພາບ ໃຫ້ສັງຄົມມີຄວາມເທົ່າທຽມ ແລະ ມີສ່ວນຮ່ວມ ຜ່ານການໃຫ້ຄວາມຮູ້ບວກຄວາມບັນເທີງ (Edutainment) ຫຼື ຮ່ວມງານກັບອົງການຕ່າງໆທີ່ມີໂຄງການຊ່ວຍເຫຼືອດ້ານນີ້
ຖ້ານ້ອງໄດ້ມີໂອກາດໄປຕ່າງປະເທດ ຢາກເອົາອາຫານລາວ ແລະ ວັດທະນະທຳການກິນຂອງບ້ານເຮົາໄປສະເໜີໃຫ້ຕ່າງຊາດໄດ້ຮັບຮູ້ ເພາະເຮົາເຊື່ອວ່າອາຫານຈະສາມາດເປີດໃຈຄົນຕ່າງປະເທດຮັບຮູ້ກ່ຽວກັບປະເທດລາວຫຼາຍຂຶ້ນ
ຢາກຈະສະແດງໃຫ້ເຫັນວ່າຜູ້ຍິງເຮົາມີຄວາມສາມາດຫຼາຍຢ່າງ ເປັນຜູ້ນຳໃນຄອບຄົວ ຫຼື ອົງການ ແລະ ຜູ້ຍິງເຮົານັ້ນສາມາດເລືອກໃຊ້ຊີວິດແບບໃດກໍໄດ້ ໂດຍທີ່ບໍ່ຈຳເປັນຕ້ອງຍຶດຕິດກັບຂະນົບທຳນຽມຢ່າງໃດຢ່າງໜຶ່ງ ຄຸນຄ່າຂອງຄວາມເປັນຜູ້ຍິງນັ້ນສາມາດກຳໜົດໄດ້ດ້ວຍຕົວເອງ ບໍ່ແມ່ນໃຜອື່ນ.
ຖ້າຫາກບໍ່ໄດ້ຮັບຕໍາແໜ່ງ ເຮົາຈະຍັງສືບຕໍ່ເຮັດວຽກສົ່ງເສີມຄວາມເທົ່າທຽມຕໍ່ໄປ ຜ່ານວຽກອາສາສະໝັກ ແລະ ຜ່ານການເປັນ Content Creator
ສຸດທ້າຍ ຊ່ວຍເປັນກຳລັງໃຈໃຫ້ຕົວແທນນຳສະເໜີແຂວງບໍລິຄຳໄຊຄົນນີ້ແນ່ເດີ.
ໂດຍ: ເມລີ ພາບ: Nana Souvannavong
