ການຜະລິດສິນຄ້າແມ່ນເພື່ອທຸລະກິດ ແຕ່ເມື່ອເຖິງໄລຍະໃດໜຶ່ງສິ່ງທີ່ຕ້ອງການຄືການຢັ້ງຢືນຕົວຕົນ ແລະຄຸນນະພາບຂອງມັນ ເຊັ່ນດຽວກັບກາໝາຍສິນຄ້າໂອດັອບ ຖືເປັນເຄື່ອງໝາຍການຄ້າທີ່ຜູ້ປະກອບການພະຍາຍາມສ້າງຜະລິດຕະພັນຂອງຕົນໃຫ້ບັນລຸຕາມເງື່ອນໄຂ ມາດຕະຖານຂອງມັນ ຊຶ່ງຢາສະໝູນໄພລາວໃຕ້ກາພູເຂົາຂຽວແມ່ນໜຶ່ງໃນສິນຄ້າທີ່ຫາກໍ່ໄດ້ຮັບການໝາຍໂອດັອບ.
ພິທີມອບປ້າຍ ແລະ ກາໝາຍ ສິນຄ້າ ໜຶ່ງເມືອງ ໜຶ່ງຜະລິດຕະພັນແຫ່ງຊາດ ໃຫ້ກຸ່ມການຜະລິດຢາສະໝຸນໄພລາວໃຕ້ກາພູເຂົາຂຽວ ບ້ານລົ່ມສັກເໜືອ ເມືອງບາຈຽງຈະເລີນສຸກ ແຂວງຈໍາປາສັກ ໄດ້ຈັດຂຶ້ນວັນທີ 19 ມິຖຸນາ 2023 ທີ່ຜ່ານມາ, ໂດຍເປັນກຽດເຂົ້າຮ່ວມຂອງທ່ານ ຄໍາມ່ວນ ຊາພິຈິດ ຮອງເຈົ້າເມືອງບາຈຽງຈະເລີນສຸກ, ມີຫົວໜ້າຫ້ອງການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ຄໍາພູວັນ ສີຈັນທອນ ເຈົ້າຂອງຜະລິດຕະພັນຢາສະໝຸນໄພລາວໃຕ້ກາພູເຂົາຂຽວ ໄດ້ກ່າວວ່າ: ຜະລິດຕະພັນຢາສະໝຸນໄພລາວໃຕ້ກາພູເຂົາຂຽວ ໄດ້ສືບທອດມາຮຸ່ນຕໍ່ຮຸ່ນ ຈາກປູ່ຍ່າ-ພໍ່ແມ່ທີ່ເພີ່ນເຄີຍປຸງແຕ່ງມາແຕ່ປີ 1959-1989 ຈົນມາຮອດປີ 2016 ຕົນຈິ່ງໄດ້ສືບຕໍ່ຜັນຂະຫຍາຍເປັນຜະລິດຕະພັນເຄິ່ງສໍາເລັດຮູບຄື: ເປັນນໍ້າ ແລະ ບັນຈຸຂວດຂາຍ ສ່ວນການຜະລິດຫຼັກໆແມ່ນຢານໍ້າດຳທີ່ຊ່ວຍຢັບຢັ້ງການເປັນໂລກກະເພາະ, ມຶນຊາ, ອໍາມະພຶກ, ອຳມະພາດ ແລະ ບໍາລຸງສົ່ງເສີມຮ່າງກາຍ.
ນອກນັ້ນກໍ່ມີ ຢາມ່ອງ ແລະ ຢາຕົ້ມ. ປີໜຶ່ງສາມາດຜະລິດໄດ້ 10.000 ຫາ 15.000 ຂວດຕໍ່ປີ ສາມາດສ້າງລາຍຮັບສະເລ່ຍ 1 ຕືິ້ກວ່າກີບຕໍ່ປີ ເຮັດໃຫ້ຄອບຄົວຫຼຸດພົ້ນອອກຈາກຄວາມທຸກຍາກ ແລະ ກາຍເປັນຄອບຄົວກຸ້ມຢູ່ກຸ້ມກິນ ຈົນກ້າວໄປເຖິງຄອບຄົວຢູ່ດີກີນດີ ແລະ ຮັ່ງມີ.
ທ່ານເລົ່າວ່າ: ແຕ່ກ່ອນຄອບຄົວຂອງຕົນແມ່ນຢູ່ເມືອງປະທຸມພອນ ແລະຍົກຍ້ານມາຕັ້ງຖິ່ນຖານຢູ່ບ້ານລົມສັກເໜືອກຸ່ມ V ເມືອງບາຈຽງຈະເລີນສຸກ ໃນປີ 2015 ແລະ ມາຮອດວັນທີ 7 ມີນາ 2023 ກະຊວງອຸດສາຫະກຳ ແລະ ການຄ້າໄດ້ອະນຸຍາດໃຫ້ຜະລິດຕະພັນຢາສະໝຸນໄພລາວໃຕ້ກາພູເຂົາຂຽວ ເປັນຜະລິດຕະພັນສິນຄ້າທີ່ໄດ້ກາຕິດກາໜາຍ ໜຶ່ງເມືອງໜຶ່ງຜະລິດຕະພັນ ( ODOP ).
ຜົນສຳເລັດດັ່ງກ່າວກໍ່ຍ້ອນຄວາມເອົາໃຈໃສ່ຊຸກຍູ້ສົ່ງເສີມ ຂອງຄະນະພັກອຳນາດການປົກຄອງເມືອງ ແລະ ບ້ານເວົ້າລວມເວົ້າສະເພາະແມ່ນຄະນະຫ້ອງການອຸດສະຫະກຳ ແລະ ການຄ້າເມືອງທີ່ໄດ້ຊີ້ນຳຢ່າງເປັນປົກກະຕິຕໍ່ເນື່ອງ.
ໂດຍ: ສື່ມວນຊົນແຂວງຈຳປາສັກ