ໃນວັນທີ 29 ພຶດສະພາ 2023 ທີ່ຜ່ານມານີ້ ຢູ່ຫໍຫຼັກເມືອງ ບ້ານທ່າຫຼວງ ນະຄອນປາກເຊ ແຂວງຈຳປາສັກ, ຄະນະພັກ-ອົງການປົກຄອງນະຄອນປາກເຊ ແຂວງຈໍາປາສັກ ໄດ້ຈັດພິທີສະເຫຼີມສະຫຼອງການສ້າງຕັ້ງນະຄອນ ຄົບຮອບ 5 ປີ (31/5/2018 – 31/5/2023). ໂດຍການເຂົ້າຮ່ວມຂອງ ທ່ານ ສະນັ່ນ ສີພາພົມມະຈັນ ຫົວໜ້າຄະນະຈັດຕັ້ງແຂວງ, ທ່ານ ນິສິດ ແກ້ວປັນຍາ ຮອງລັດຖະມົນຕີກະຊວງພາຍໃນ, ທ່ານ ບົວລີ ເພັດສົງຄາມ ເຈົ້ານະຄອນປາກເຊ, ພຣະອາຈານ ສຸວັນ ຈັນທະລາຊ ປະທານ ອພສ ແຂວງຈໍາປາສັກ ພ້ອມດ້ວຍພຣະເຖລານຸເຖລະ, ຕ່າງໜ້າຈາກພ່ວນຕ່າງໆ ແລະ ປະຊາຊົນບັນດາເຜົາເຂົ້າຮ່ວມ.
ທ່ານ ບົວລີ ເພັດສົງຄາມ ເຈົ້ານະຄອນປາກເຊ ມີຄໍາເຫັນໃນໂອກາດກ່າວເປີດພິທີວ່າ: ມື້ນີ້ ປະຊາຊົນບັນດາເຜົ່າ ຊາວນະຄອນປາກເຊ ເວົ້າສະເພາະ, ເວົ້າລວມຊາວແຂວງຈຳປາສັກ ສຸດທີ່ມີຄວາມເບີກບານມ່ວນຊື່ນ ໄດ້ພ້ອມພຽງກັນຈັດຕັ້ງສະເຫຼີມສະຫຼອງວັນສ້າງຕັ້ງນະຄອນປາກເຊ ຄົບຮອບ 5 ປີ. ຈຸດປະສົງ ກໍ່ເພື່ອຫວນຄືນເຖິງວັນທີ່ມີຄວາມໝາຍປະຫວັດສາດ ແຫ່ງການເຕີບໃຫຍ່ຂະຫຍາຍຕົວ, ການສ້າງສາພັດທະນາບ້ານເມືອງ.
ພ້ອມນັ້ນຍັງຍົກໃຫ້ເຫັນຄວາມໝາຍສໍາຄັນຂອງຫໍຫຼັກເມືອງ, ສະພາບການສ້າງສາພັດນາ ນະຄອນປາກເຊ ໃນປັດຈຸບັນ ແລະ ຍຸດທະສາດການພັດທະນາ ນະຄອນປາກເຊ ໃນຕໍ່ໜ້າ ເພື່ອປັບປຸງຍົກສູງຄຸນນະພາບ ຂອງການພັດທະນານະຄອນປາກເຊ ໃຫ້ທັນສະໄໝ ແລະ ສີວິໄລ.
ໃນພິທີດັ່ງກ່າວ, ທ່ານ ສະນັ່ນ ສີພາພົມມະຈັນ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ກໍ່ໄດ້ໃຫ້ກຽດລັ່ນຄ້ອງ 9 ບາດ ເພື່ອເປັນສີລິມຸງຄຸນ ແລະ ເປັນນີມິດໝາຍອັນດີ ແກ່ການເປີດງານ ໂດຍມີການນໍາແຂວງ, ການນໍານະຄອນ ແລະ ແຂກເຊື່ອເຊີນເຂົ້າຮ່ວມ. ຈາກນັ້ນ ກໍ່ໄດ້ດໍາເນີນພິທີທາງສາສະໜາ ຄື: ໄຫວ້ພຣະ, ຮັບສິນ, ຖວາຍທານ ແລະ ໃສ່ບາດ ສະເຫຼີມສະຫຼອງການປະກາດສ້າຕັ້ງນະຄອນປາກເຊ ແລະ ຫຫຼັກເມືອງປາກເຊ ໄປພ້ອມໆກັນ. ມາຮອດຕອນແລງວັນດຽວກັນ ກໍ່ມີພິທີສົມໂພດຫໍຫຼັກເມືອງຕາມຮີດຄອງປະເພນີເປັນປີທີ 3 ຕື່ມອີກ.
ໂດຍ: ສູນຂ່າວຊາວພາກໃຕ້